العَصّارة - الحلقة الثالثة

.. في نوبة ضحك طفولية نادرة ،

لفتت أنظار بنت الذوات ، الواقفة في البلكونة المقابلة للمحل ،

 تلبس قميصا بدون أكمام ، يكشف عن ذراعين كالجيلاتي ،

 لتلفت ضحكاتها أنظار حمادة ، فيطير عقله !

يا نهار أسود ، العمال رجعوا ، وعمي جي وراهم ،

 زمانه شافني ، استر يارب !

قاعد بتدلع ، هه ..

وسايب المكان مش نضيف ليه ،

أخفى روح ، رجع الشغل الورشة ،

حسابك لما ترجع ، أنا هعرف ازاي ابطلك الدلع ده ، امشي غور  ..

يسرع ، وكأن كلبا مسعورا يطارده ،

يحاول العودة بأقصى سرعة ،عسى أن يخفف ذلك من غضبة عمه ،

يدخل من باب المحل عائدا يتصبب عرقا ،

أيوه كده ، هو دا الشغل ،

 تفتح عينك بعد كده قبل ما تستلم حاجة ، فاهم ؟!

حاضر ،

شغل قرآن تمانية ، واطلع فوق ،

حاضر ،

لم يكد حمادة يجلس على كرسيه الخشبي ، الذي يضعضع مؤخرته الهزيلة ،

ليجفف عرقه ، ويلتقط أنفاسه ..

 حتى ينضب الهواء !

 يشفطه من المكان ،  ذو اليدين ،عامل العصارة ، بجثته المهولة ،

.. جاء لتصفية حساب اليوم ،

 يهرب ريق حماده ، وتغلق رئتاه أبوابها ،

 لشعوره بفداحة الثمن الذي سيدفعه ،على كوب العصير الذي تجرعه بدون اذن ،

أحصاه ذو اليدين ، وشربه هو .. ثم نسيه !

بصوت عميق ، مساء الخيير ،

تعال يا مصطفى ،

 حسابك كام النهاردة ؟!

خمستاشر قرش ،

ليه ؟!

سبعة كبير ، وواحد صغير ،

مخدناش صغير ،

حمادة ابن أخوك شربه ، في العصارة ،

لم يكد ذو اليدين ينهي جملته اللعينة ،

 التي كانت بمثابة اعلان حرب ،

 حتى صرخ العم ، كفرس النهر ،

واد ياحمادة ،

لم يعد لدى حمادة ريقا ، لينطق ، ولا نفسا ، ليرد ،

لم يدري بنفسه ، الا متدحرجا على السلالم ،

ازاي تاخد حاجة من غير أذن ؟!

وقبل أن يجيب ..

تجتاح جسده النحيل، عاصفة ساحقة ، من الصفعات واللكمات والركلات ،

 ياكداب ياسافل ، من ورايا يامجرم ، طب قوللي وأنا أجيبلك ،

ثور هائج .. يتصور حمادة كخرقة حمراء ، لن يهدأ حتى يمزقها !

.. أخيرا أستطاع ذو اليدين تخليص حماده من براثن الهلاك ،

مش كده ، وحد الله .. دا مهما كان عيل برضه ، ونفسه راحت لكوباية عصير من الحر .. ذو اليدين بتأثر ،

ما قلناش حاجة ، يستأذن ، أنا ماعنديش حد يكدب  .. ليفلت من ذي اليدين ، مسددا لحمادة ركلة في جنبه ،

ان ماربيتك ، هتجيبوا من بره ، طالع لأبوك يا وسخ ،

لا مالكش حق ، طب عشان قرآن ربنا اللي شغال ده ، خلاص ياسيدي ، خليها علينا المره دي .. ذو اليدين باستياء

ما قولتلك مش موضوع فلوس ، عايز الواد يبوظ مني ؟!

خد حسابك يامصطفى ، واتكل على الله ،

طب علشان خاطري تسيبه .. ذو اليدين باستعطاف ،

 قوم ياحبيبي أغسل وشك ، معلش ، دا مهما كان عمك ، وزي والدك ، ذو اليدين  بحنان،

قوم يامجرم ، اخفى من قدامي ، غور ، يالا أمشي روح !

يغور حمادة منكسرا ، يمسح أنفه بكمه ، من أثر اللكمات ،

يغمغم منتحبا .. خد باله من الكدب ، وما خدش باله من البهدلة والعطش في الحر ،

كل آلام جسده تهون ، الا ألم روحه ، التي أنصدعت لمعايرته بأبيه ،

 وتذكيره بوجيعته التي يجهد للهروب منها ..

 بالأستسلام للتعب والنصب تارة ، أوبالتظاهر بالغناء والتضاحك واللعب ، تارة أخرى !

سامحك الله يا أبتي ، كم يشقينا غيابك ، ويطفئ أنوار أيامنا ،

أيرضيك هواني ، وأنا أول ذكر تبشر به ، ليمد في عمرك ويباركه ..عمرك الذي تصر على نثره كهباء !

متى تعود لأفخر بك ؟! متي تصحبني في يدك لتفخر بي ؟!

لما لم تصحبني في يدك ، لأتفسح وتشتري لي الحلوى ؟!

كل الأولاد ذهبوا الى المدرسة لأول مرة بصحبة آباءهم ، الا أنا ، ذهبت وحيدا ،

تائها ، خائفا ، تتقاذفني الأرجل ،

 لأعود الى البيت باكيا ، فكل الأولاد عرفوا فصولهم ، الا أنا ،

حتى ظنني الناس يتيما !

واد ياحمادة ، أنت جيت ؟! .. بدري يعني ! 

مالك ، وشك مزرود كدا ليه ؟! حد ضربك ؟!

عمي ،

تلاقيك عملت حاجة غلط ،

شربت كوباية عصير بقرش ، من الحر،

أخدت الفلوس من وراه ؟!

لأ طبعا ، أنا ما اعملش كده ،

أمال نيلت ايه على عين أمك ؟! انطق ..

مفيش ، هموت من الحر والعطش ، رايح جاي أشيل في عصير ،

 وما حدش عنده رحمة ، يحس بيا ! وحضرتك مش بتديني مصروف ، وبخاف أطلب منه يضربني ،

تقوم تكدب ! الا الكدب ، حسك عينك تكدب أبدا ، أو تاخد حاجة مش ليك ،

يقوم يموتني من الضرب ، شايفة وشي ، شايفة ضهري ،

 يرضى بابايا يعمل كده في ابنه ؟!

باباك ، والنبي تتلهي على عين باباك ، هو المرار اللي بنشربه ده ، 
بسبب مين غير باباك !

مش اللي يكدب بيروح النار ، خلاص ، علقة عمك أهون من النار!

مش رايح له تاني أبدا ،

وحياة أمك ، من الصبح تروح تفتح المحل ، ورجلك فوق رقبتك ،

 وتراضي عمك كمان ، وتقوله مش هعمل كده تاني .. فاهم ،

يمضي الى سريره باكيا ،

اياك تنام من غير ماتتعشى ، نايبك في الأكل ، متغطي في المطبخ ،

 روح أغسل وشك وتعال كل !

بالكاد ، تكتم نحيبها ، حتى تلج الى غرفتها ، تغلق بابها لتنفجر ..

ياضنايا ياابني ، ان شاالله كنت انضرب أنا في قلبي وأنت لأ ،

ان شاالله تنشك ايد عمك اللي ضربك ، وينشك قلب أبوك اللي سابني وسابك للعذاب ده ،

معلش ياكبدي ، سامحني يا نن عين أمك ،مقدرش ألين معاك ، تقعد جنبي وناكل منين ؟!

بدري عليك يا حبيبي ، تكون أنت سندي وعكازي ، نصيبنا أنا وأنت كده !

الهي ، وأنت جاهي ، تهديه وتبارك فيه وتصبره ،

وتهدي أبوه ، و تحنن قلبه علينا ، بحق جاه الحبيب النبي !

تنتفض على الأذان ..

 تتشهد وتوحد ، تحولق وتبسمل ، تبتهل وتستغفر ،

 تتوضأ وتصلي  جالسة ، من صداع يكاد يفجر رأسها ،

تطل على حمادة نائما ، كعائد من سفر شاق ،

ليتجدد بكاؤها ، وينهمر دعاؤها ،

تأخذ وجبتها من الشاي والأسبرين ،

تجلس بشرفتها ، تلتمس في نسمة البكور ما يبرد نارها ،

يغشاها قرآن السادسة ،

 غلالة حريرية تلف قلبها .. " الله لطيف بعباده .. "

تشهق ، ياالله ، ألطف بحمادة ياالله ، أهدي جوزي يا الله ..

 تظل في توسلها ، كمجذوب تألق ، حتى يغلبها النوم في مكانها !

ياولاد ..

 الساعة كام ؟! أخوكو حمادة صحي ..

ايوه ياماما .. نزل من بدري ، راح لنينة ، وهيجيب الفطار ، أهو جه أهه ..

مش كنت تصحيني ياابني ، كده تخضني عليك ،

معلش ، يالا نفطر ، أتأخرت على المحل ،

ربنا يهديك !

يذهب حمادة ، وقد عصر على نفسه ، ألف ليمونة ،

تتلبسه روح تحد غريبة ، حتي حرارة الشمس ، لم يعد يعبأ لها ،

ففي كبده من اللهيب ، مايكفي !

يذهب فقط ..  برا بأمه ، وتأديبا لنفسه ، على فعلته اللي جابتله البهدلة ،

 وليثبت لعمه ، أنه شاطر ، ومش كداب ،

 وأن أبوه أحسن منه ، وسيرجع أفضل مما كان !

يؤدي عمله الروتيني اليومي ، حزينا منكسرا ، لايهمس ببنت شفه ،

يلحظه عمه ،

حمادة ،

نعم ،

أنت زعلان ؟!

يظل صامتا ..

أنا بقسى عليك ، علشان تطلع راجل ،

أوعى تكدب تاني ، الناس يقولوا علينا ايه ! لما تعوز حاجة قوللي ..

 بس أوعى تتمرع ، أكسر رقبتك ،

يمشى من أمامه ، وقد بدل صمته بكاءا !

تعال ، أنا مش بكلمك ، بتعيط ليه ؟!

أنا مش زعلان علشان ضربتني .. علشان عايرتني ببابا ،

ماهو باباك قاطع بينا كلنا ياابني ،

يشهق حمادة منسحبا ، تلاحقه تنبيهات عمه ..

 امشي عدل ، وخليك شاطر ، علشان ما تجبش لنفسك الضرب !

نسمة عابرة من الرحمة ترف على حمادة اليوم ،

 يستشعرها في معاملة عمه ، وفي خفة المشاوير نسبيا ،

ومن زوجة عمه ، التي أبدت مزيدا من الأهتمام به على الغداء ،

مما ساهم في تهدئة روحه المتعبة .. بعض الشيء  !

متلهف هو الآن على خيمة العصاري ، يستعجل انصراف الجميع لراحة الغداء ،

ظنا منه أن نسمة العصاري ، لاتحب وجوههم ، ولاتأتي في وجودهم ،

قبل أن يخرج كرسيا ، ليرتع و ينجعص ،

يفزعه طارق ومعه أحمد ،

 باندفاعهم فجأة من حيث يختبآن ..

 بخخخخ ،

خضتوني ،

فين الراديو اللي وعدتنا بيه امبارح ؟!

حالا ..

 بطرف عينه يلمح الحلوة الدلوعة ، نانسي ،

 مترقبة هي الأخري ، لتنصت متفرجة من شرفتها ،

 بدت تبرق من العز وفرط الأستحمام !

من كرسيه ..

 والكراسي الأنيقة المحندقة ، التي أخرجها الخادم ، للبيه الصغير ، طارق ،

أكتملت خيمة العصاري ، حيث الحب والضحك والفرح ،

آه ، ما أحلى الفرح ..  لايعيبه الا شحه وكثرة غيابه !

وشششش ، فزززززز ، زنننننننننننن ، ترررررررر ..

 يصفر، ويحرك أصابعه ، كمن يدير مؤشر الراديو ،

أعزائي المستمعين ..

 طارق وأحمد ، يتقافزان ويصفقان ..

 ومن شرفتها تفعل نانسي ، كأطفال في صبيحة العيد !

بالسلامة ياحبيبي بالسلامة ..

فريرة للعيل ، يا ابو العيال ميل ..

اززززززززززز، رررررر، سسسسسسسس...

فين هي زكية ، في الأوضة دي ..

أيها المواطنون ،

ياحلو صبح ، ياحلو طلللل .. نهارنا أبيض ، نهارنا فلللل ،

اذاعة فلسطين ،

صوت العرب من ..

 الأرض بتتكلم عربي ، الأرررض الأرررض ..

يفيق من تجليه واستغراقه ،

 ليجد جمهوره فطسان من الضحك ، بل ازداد عددهم بقدوم متابعين جدد ،

 تصبغ وجوههم الدهشة ، من هذا الراديو الصغير الجميل !

بقرب رجوع عمه ، تنفض خيمة العصاري ،

 ليقضي بقية يومه ، ساكنا سارحا ، يجتاحه حنين طاغ لرؤية أبيه ،

 للذهاب الي البيت مبكرا ، ليقف بالبلكونه مزاحما أمه وأخوته ،

 يشمون الهواء ويتسامرون ، وسط الذرة المشوية والتسالي ،

 السوداني السخن المقرمش ، والجيلاتي المبهج الفاتن ،

 يتراصون ..

 لمشاهدة الرائح والغادي ، لعب الصغار وشجار الكبار ،

 صخب المقاهي و تعاليق الأفراح ، أصوات المآذن ومووايل الباعة ،

 شبابيك الحب ، وشرفات الثرثرة ! 

يحلم بقوة خارقة ، تحمله ليجثو على ركبتيه ، وسط أصحابه ،

 ملطخا بالصمغ ، غارقا فى الورق الملون وأعواد البوص والخيوط ،

 ليصنع طائرته الورقية الملونة ، ومن فوق السطوح ..

 يصعد بها الى السماء ، ليحلق مع أصحابه !

 ليصنعون كرة شراب ، يتشاجرون عليها أكثر مما يلعبون بها ،

 ليكوم مع أصحابه ، كومة ضخمة من كل لعبهم ، ولعب الدنيا كلها ،

 الليدو والسلم والثعبان ، البلي والنحلة ، مضارب الراكت والبنج بونج ،

 صندوق السيما الكرتوني العجيب ، الأستغماية ، نط الحبل والحجلة .. كل الألعاب ،

 ليلعبها معهم ، لايملون ، ولا يشبعون ، ولايكبرون !

حمادة ، واد ياحمادة ..

نعم ، حاضر ، جي ..

أنت انطرشت ، مش هتبطل تسرح ،

روح لطنط – زوجة عمه – وصلها السنترال تكلم البلد ،

وبعدين وديها عند نينة ، وروح أنت ،

حاضر ،

تعال .. جالك بقشيش كام النهاردة ؟!

أربعة صاغ ، بكف صغيرة مرتعشة ، يضعها أمام عمه ،

خد ، جمدتهملك ، شلن .. أوعى تضيعه أو تصرف منه حاجة ،

 تروح تديه لمامتك ، فاهم ،

حاضر ،

يصحب حمادة زوجة عمه ، الى حيث السنترال،

فهي غريبة عن المدينة ولم تحفظ شوارعها بعد ،ومنه الي جدته ،

 يباغت جدته دون قصد ، ليجد أبناء عمه أحمد ، يتحلقون حولها ،

توزع عليهم ما يبدو أنه جاتوه فاخر ،

 مما يحضره أبوهم لدى عودته من سفره المتكرر في شئون تجارته ،

 تشعر بحمادة ، فتسارع الى تفريق الأولاد ،

 ودس علبة الحلوى في دولاب ملابسها المشرع ،

 تغلق عليها بمفتاح صدئ ، تعيده الى صدرها ، لتلتفت مرتبكة ،

 ياد النور ياد النور ، أهلا بعروستنا ،

 أهلا بك يا نينة ،

 خطوة عزيزة ،

 يعز مقدارك ،

 جيتي مع حمادة ؟!

 والنبي ياحمادة ، ان شاالله تعيش ، خد هاتلي طحينة ،

 أصل خلصت ، وزمان جدك جي يتعشا ،

 حاضر ،

بخطى متثاقلة ، يمضي .. متسائلا ،

 لماذا أخفت جدته ، الحلوى منه  ؟! أهو خوف من أن يلتهمها كلها ؟!

كيف وهو ليس أكولا ، بل يلتقط طعامه نتفا ، كالعصافير !

 لماذا تفضل أبناء عمه أحمد ، عنه هو وأخوته ؟!

 هل يحترقون في الشمس لقضاء طلباتها ، مثلما يحترق هو ، كل يوم ؟!

 لم يبق من سبب الا أن أباهم موجود وينفعها ،

 أما أبوه فلا وجود له ، ولا نفع منه !

 كل يوم يكتشف حمادة حجم الضروالهوان ، الذى يتسبب فيه غياب ابيه !

 لقد كسرت جدته قلبه ، بانكشاف نفاقها و نفعيتها وابتزازها  .. لابأس ،

 كأنه يخدمها عوضا عن أبيه ، سامحهما الله .

يلقاه جده على ناصية الشارع ، غير مصدق ،

 يفتح ذراعيه الطوليتين ، كدلتا النيل  ..  أهلالالالا ، حمادة ،

حضن كبير لجدو ..

 ليغطس في حضن جده ، القوي الدافئ ،

 يغيب فى توليفة من روائح العرق والقرنفل ، القهوة والسجائر ،

 يتشبث بجده ، ليروي ظمأ للحنان ، يكاد يقتله ،

 يود لو يقضي بقية عمره في حضن جده الفردوسي ،حيث الخلود بلا خوف ،

 تنزل قبلات جده على خده النحيل ، كقطرات ندى ، على ورد ذابل !

هات لعمك حمادة ، اللي نفسه فيه ، يا زقزوق ..
( جده المعلم جميل ، مداعبا زقزوق الحلواني )

 اؤمر يا معلمي  .. تعالى يا غالي يا ابن الغالي ،

 يقف حماده ، أما فاترينة العم زقزوق الحلواني ،  مندهشا ،

يسكره عبق المانجو و الفانيليا ، متحيرا بين أصناف الحلوى ،

 تارة ،

 وبين كتلة الجيلاتي البيضاء الضخمة ، التي يلفها زقزوق ،

 ثم يدفعها بعصا خشبية في الماكينة ،
تمهيدا لأغراقها بالمانجو أو الشيكولاته والمكسرات ، تارة أخرى !

 عايز بسبوسة بالقشطة ، وجيلاتي بالمانجة ،

 بس كده ، غالي والطلب رخيص .. هات له  يازقزوق ،

 وحياة النبي تخليها علينا المرة دي ، يا معلمي ،

تعيش يا زقزوق ، أدها وأدود ياابني ، تسلم

ايه النور ده ، عروستنا هنا !

 تهرع زوجة العم الي يد جده تقبلها .. خدامتك يا حاج ،

 يسحب يده بقوة ، حاشا لله ، يا ست الكل ، خطوة عزيزة ،

 يعز مقدارك ، ويخليك لينا ،

 هيه ، عاملين ايه ، مبسوطين ،

 رضا الحمد لله ، بحسك في الدنيا يا حاج .

شغل قرآن تمانية يا حمادة ،

 هيه ، مين هيسعدنا الليلة بالتلاوة ، ياحبيب جدك ،

 فضيلة مولانا الشيخ محمد صديق المنشاوي ،

 الله أكبر ، روح ربنا يزينك بنور كتابه الكريم ، بحق جاه الحبيب النبي ،

 هيه ، ومين اللي بيقول تقديم التلاوة ده ؟!

 فضيلة مولانا الشيخ أحمد الشرباصي ،

 اللهم صلي على جمال النبي ، الله ينور عليك ،

أجيب العشا يا حاج ؟

 وماله يابنتي ، نفسي مفتوحة علشان حبيبي معايا الليلة ،

 يحتضن حمادة ويمسح على رأسه ،

 هيه ، هتتعشى مع جدك ؟

 شبعت من البسبوسة والجيلاتي ،

( سارحا .. أخفت جدتي مني حلواها ، لأشبع من حلوى جدي )

 يفرغ جده من عشاءه الخفيف ، لتبدأ التلاوة ،

 يضع حمادة رأسه في حجر جده ،

 ليلفها أنس التلاوة الغضة الطرية ، على حنان جده الدافئ الغامر ،

 فيسحبان من رأسه الصغير كل مشقة وألم ،

 ثم ينسابان الي صدره وقلبه ، ليزيلا في طريقهما كل حيرة وغضب ،

 ويظلان يطهراه ويغسلاه ، لتغشاه سكينة لم يعرفها من قبل ،

 وراحة لم يذقها من زمن .. لينام كطفل برئ !

ينتفض على صوت جدته ..

 حمادة ، قوم ياضنايا ، نام على سرير جدك ،

بالكاد يفتح عينيه ،

لأ ها روح البيت ، ماما زمانها قلقانة عليا ،

خليك مع جدك ، علشان تصلي معاه الفجر فى الجامع ،

لأ أروح البيت ،

يحتضن جده ويقبله ،

أغسل وشك الأول ، علشان تفوق ،

مع السلامة ياابني ، خد بالك من السكة ،