العَصّارة - الحلقة السابعة

لم يبق مع حمادة الا نسمة صباح السادس من أكتوبر الفاترة ،

 تزاحمها الشمس ، لتزيدها كسلا وضجرا ،

وعوكل الذي مل الأنتظار الطويل بباب الجامع ، فتسكع يلتمس رزقه !

حتى اذا لمح حمادة ، طار يتبعه ،

انتبهت أم حمادة على صوته ، يردد أذكاره الصباحية ،

فيحدث طنينا على السلم النائم ، يتردد صداه مبهما ،

 ليبدد صمت صباح يوم أجازة كسول خامل ،

السلام عليكم ، صباح الخير ياماما ،

صباح النور ياحبيبي ، كنت فين دا كله ،

 أبدا الشيخ زغبي مسك فيا ، بلغته سلامك وبيدعيلك ،

 ينفع كده ، تفضل من غير نوم من امبارح ، بس لو أعرف ايه اللي شاغلك ،

 والكتب اللي هتضيع فلوسك عليها دي ، احنا يابني مش أولى بكل قرش ،

خليها على الله ،

خش يا ضنايا أرتاح لك شوية ، علشان تروح المحل ،

 تعمل لك كام حتة شغل ، نسدد بقية مصاريف أخواتك ،

هو عمك هيحاسبك ، أيام الدراسة ، يومية ولا بالحتة ،

بالحتة طبعا ، أنا أشطر واحد في الشغل دلوقتي ،

وهيديك في الحته كام ؟

انا مش هتحاسب زي الغريب ، دا عمي برضه وأفضاله عليا ،

صحيح مهما كان دا برضه عمك ، أصيل ياحمادة ، رباية المعلم جميل النادي الله برحمه ،

بس متهيأ لي ، مش أقل من نص جنيه في الحته ، نفس أجرة توفيق ،

وماله يابني ، نعمة ، كنا فين وبقينا فين ، رضا ، الحمد لله ،

 قلبي وربي راضيين عنك يا حمادة يابني ،

قوم ارتاح شوية ، وحسن هيجيب الفطار والطلبات لينا ولنينة ،

ياريت متنسوش فطار عوكل !

السلام عليكم ، ازيك ياعمي ،

 ازيك ياحمادة ، ازاي ماما واخواتك ..

اتأخرت ليه ؟! مش النهاردة أجازة ؟!

يادوب صليت الظهر وجيت ،

احنا عايزين نشوف شغلنا ، بلاش دروشة ،

 كلنا بنصلي ، بس بنشوف شغلنا ،

ان شاء الله ،

شغلك فوق عند توفيق ، تخلصه وتحاسب على مصنعيتك ، وتتكل على الله ،

الشغل كله لازم يخلص النهاردة ،

حاضر ،

حلوة بلادي السمرة بلادي ، الحرة بلادي ..

ماتعلي الراديو يا حمادة ، خلينا نسمع هيقولوا ايه ،

هيقولوا ايه ياتوفيق ؟!

 هيغنوا لنصر ملحقناش ندوق طعمه ، ولفخ سموه افتراءا ، سلام ،
ما أخطر وأخبث ُطُعمه ،

 وبطولة حشدونا ليها ومنعونا نكملها ، علشان نروح في سكة ياعالم بطول ليلها !

ماتكبرهاش ياحمادة ، خليها على الله ، مالك شايل طاجن ستك اليومين دول ،

على فين ؟ .. عمه متسائلا ،

هصلي العصر ،

ما تغبش ، فوت على البيت اتغدى ، طنط عايزة تشوفك ،

السلام عليكم ،

هيييه ، ايهاب ونورا ، مرحبان ،

مين يا ولاد ، حمادة ابن عمي  ياماما ،

تعال يا حبيبي ، أنت فين ، ماما عاملة ايه واخواتك ،

الحمد لله ،

ايه ، ما وحشكش أكل طنط ، دا أنا عاملالك البامية الي بتحبها ، باللحمة الضاني ،

تعيشي يا طنط ، خيركم مغرقني ،

هنتغدى مع حمادة ياماما ، يتقافزان ،

عمكم منعم اتصل وقال هفوت أتغدى ،

ايه ياحمادة مش بتيجي لي تلاعبنا ، وتقولنا فوازير ونكت ،

الدراسة بدأت ، والسنة دي ، ثانوية عامة ،

هيه ، بتحافظوا على الصلاة ؟!

أنا بصلي ، نورا اللي بتكسل ، ياسلام ياغلس ، أنا بصلي أحسن منك ،

ياولاد ، مع ان الصلاة من أهم الحاجات في الإسلام ، 
الا ان الإسلام فيه حاجات مهمة كتير ،

زي ايه ؟!

حب العلم و التفوق ، والقوة ، والدفاع عن الوطن ،

يعني يبقى دمنا تقيل ، ومفيش لعب وهزار تاني ،

أنا قولت كده ،

ماهو انت شكلك مش هتلاعبنا تاني ،

طب ازاي ،

تعلوا أقلدلكم شفشق ، شفيق جلال ،

هذا ومن المقرر أن يحضر السيد الرئيس احتفالات عيد الفن الثالث ، و المقامة غدا ..

بس وطوا الراديو ده ، أو اقفلوه

يحضر ايهاب ملابس الفقرة الفنية ، كما عوده حمادة ،

 احدى جلاليب والده المخططة ، ومعها طاقية بحافة ، من نفس قماش الجلابية ،

خسسسيس قال للأصيل تعال عندنا خداااام ، تاكل وتيشرب ...

افتحوا لعمكم منعم ياولاد .. يوه ، مالناش دعوة هتكمل برضه ،

يقبل ضخما مهولا ، شاغلا نصف الحجرة

ازيك ياعمي ، كل سنة وانت طيب ، يابطل

على أيه ؟!

ذكرى الأنتصار

ياسيدي ، دول كانوا يومين ، عملنا اللي علينا ، والباقي على .. السلام

عاش عاش ، عاش ، عاش اللي قال ..

اقفل الراديو يا ايهاب ، انا مصدع

دي أغاني الحرب ياعمو منعم ،

حمادة يغنيهالك ، حافظها كلها ،

الغداء يامنعم ، ياللا ياحمادة ، 

خلصت شغلك ،

 الحمد لله ،

كام حتة ؟

 تلاتاشر ،

وريني كده، عال عال ، الله ينور ، تمرت فيك الرباية ، ربنا يهديك ،

حسابك ستة جنيه ونص ، ونص جنيه من عندي ، سبعة جنيه أهم ،

 يالا اتوكل على الله ، سلم على ماما ، وخد بالك من مذاكرتك ،

ربنا يخليك يا عمي ،

الا قولي ، هامسا ، بتوتر ، بتشوف بابا ؟!

يطرق صامتا ، يغادر ممسكا بنقوده ، قابضا على دموعه ،  الحمد لله

لاحول ولاقوة الا بالله ، عمه متأثرا

يمضي حمادة مسرعا ليلحق بصلاة العشاء بجامع الرشاد ،

 ليصلي بصحبة الأستاذ عبد الحفيظ المنياوي ، معشما نفسه أن يكون من الأخوان فيوصله اليهم ،

بعد أن قرر مقابلته منفردا دون عادل الزيني ، تحسبا لأية مفاجآت ، وليتكلم معه على راحته ،

يسلك نفس الدرب الذي كم سلكه منذ كان طفلا صغيرا نحيلا ،

 تستقوي عليه الشمس ، ويقرصه الجوع والعطش ،

 ويعكر صفوه القلق على أمه ، والخوف من عمه ،

 ويضنيه الشوق لأبيه ..

 كل العذاب هان عليه ، كل التعب زال منه ، الا الشوق لأبيه !

 يزيد من سرعته هربا من هياج الذكرى ، التى تأبى أن تتعلق بتلابيبه ،
كتعلق طفل بأمه ،

 يود لو ينسف كل مقاهي الأرض ، بعد أن يحطم مابها من شيشة وطاولة ودمينو ،

علّ لاجئيها يعودون الى فلذات أكبادهم ،

 يوما وراء يوم ، يتفهم محنة أبيه ، لا لا ، ليست المقهى ،
 ما المقهى الا مهرب وملاذ ، مهرب من المسئولية ، وملاذ بالصحبة المسلية !

يسقط محنته على حال أمته ، الذي يشغله ويستغرق تفكيره ، و يصبغ حديثه مع كل من يلقاه ،

فيرى محنة أمته في غياب ولي الأمر المسئول الرشيد ، الذي يكد من أجل أمنها ووحدتها ، ورخائها ورفعتها !

آه لو يجمع الناس ، في صعيد واحد ، ليبوح لهم بما في قلبه الذى صار جمرة من نار ،

 آه لويبكون غياب ولي أمر أمتهم الراشد كما أبكى غياب أبي ،

 لو يكافحون لمساعدة أمتهم في غيابه كما اساعد أنا أمي ،

 لو يسلكون كل طريق لأعادته لقيادة سفينهم ،

 كما مزقت أحذيتي في الدروب سعيا لأعادة أبي ..

الله أكبر ..

الله ، منذ زمن لم أصلي في جامع الرشاد ، ما كل هذا العدد من الشباب الجميل ،

معظمهم ملتحون ، يتناثرون في المسجد خافت الأضاءة كنجوم تتألق ،

اقيمت الصلاة ، فاصطفوا في خشوع ، كأسنان المشط ،

قضيت الصلاة ، فتحلقوا حول الأستاذ عبد الحفيظ المنياوي ،

 الذي بدا في جلبابه الرخيص ، ضئيلا 

نحيلا ، جاحظ العينين ، ذو لحية رمادية شعثة !

أخذ يصافح الشباب المتحلق حوله ، الواحد تلو الآخر ، بقوة ، محتضنا اياه بافراط !

ليصعد الجميع الى حيث غرفته المشرعة الأبواب ، ببيت هزيل قبالة المسجد ،

يلحق بهم حمادة ، دون أن يلفت نظر أحد ،

 يتكومون في غرفة كئيبة كالحة ، على جدرانها كتب كأكوام ضباب ،

 تعلوها الأتربة ، لاتميز منها اسما ولا رسما ،

 يحتل ربع مساحتها سريرحديدي أعجف ، يبدو كهارب من أحد معسكرات الجيش ،

 اتخذه حمادة متكئا ليطل منه على تلك الكومة من الشباب .. الورود ،

 ينصتون الى الأستاذ ، الذي لم يعر حمادة أي اهتمام ،
بينما يتناثر من فمه حديثا باردا مفككا ،

 كعربة خشبية فارغة متهالكة تتدحرج على طريق وعرة ، فتعلو وتهبط  ، دون فائدة !

 حاول حمادة أن يتهم نفسه ، فمن المؤكد لم يرق بعد الى مستوى هذا الأستاذ الكبير ،

 قطع اللهاث أنفاسه ، وراء ما يتناثر من شدقي الرجل ، عله يقبض على جملة مفيدة ،

لكن هيهات ، وكأنه ينصت لكلمات مبعثرة من نائم يهذي بلغو ، لاينبني عليه عمل ،

أصل العقاد .. لأن طه حسين ، لا .. سيد قطب دا موضوع تاني ..

انت النهاردة لما تبص لعبد الرحمن بدوي هتلاقي .. تر تر تر ..

بدا حمادة وكأن قطبي رحى ، أحدهما من ذهول والآخر خيبة أمل ،
يطحنان رأسه المرهق أصلا ..

يالا مع السلامة ، في حفظ الله ..

افاق ليجد النجوم الشابة قد أفلت ،
  ليتحسر على ضياعهم في أحضان هذا المعانق الأكذوبة ،

 آه لو يتعرف عليهم حمادة جميعا ، والله لخاض بهم البحر ، لا مناص الآن من المواجهة مع الأستاذ المعانق،

أهلا وسهلا ، أخيرا انتبه لوجود كائن حي ، يجلس بطرف سريره الأعجف مثله ،

أهلا بحضرتك يا أستاذنا ،

أنا حمادة ، محمد حسين النادي ، جدي يبقى الحاج جميل النادي ،

الهيبة الكبارة ،ألف رحمة تنزل عليه ، يتمتم مطرقا ، يهرش لحيته الشعثة ،

خير ؟!

أبدا ، هو حضرتك تعرف الأخوان المسلمين ؟!

مين ؟! الأخوان ! أنت في سنة كام يابني ؟!

فى ثانوية عامة ،

طيب يابني ، مالك أنت ومال الأخوان ؟!

 انت عايز تخدم الأسلام ، اتفضل الطريق واضحة ، العلم ياابني ،

 أجتهد في دراستك ، وتفوق ، ومن موقعك المرموق اللي هتوصل له ، باذن الله ، تخدم الأسلام زي ما أنت عايز !

شكرا يا أستاذنا ، السلام عليكم .. يفجئه بها حمادة وهو يتدحرج على السلم المتهالك،

 مخافة أن يتورط في عناقه المبالغ فيه ،

يطلق زفرة طويلة ، الحمد لله ، يا الهي ..

 كم في واقعنا من أوهام !

 يالهفي على شباب ، كالرياحين ، يقعون ضحية أمثال هذا الأعجف الغامض ، غير المريح ، المعانق !

انت فين ياحمادة من الصبح ، أمه مدلية رأسها من البلكونة ، أنا ملطوعة من المغربية ، دماغي تجيب وتودي ،

معلش ياماما ، كنت في مشوار ، اصبري عليا مرة لما اطلع فوق ،

مش تقول يا ضنايا ، فكرتك رحت لأبوك ،

يوم الجمعة ان شاء الله ، أجيبه يتغدى معانا ،

ربنا يجبر بخاطرك ، 

اتفضلي ياماما ،

ايه دول ؟!

سبعة جنيه ، انتاج النهاردة ،

ماشاء الله ، ربنا يبارك لي فيك ، ويهديك ،

لو خليتي جنيه بس معايا ، أجيب كتاب ، يبقى كتر خيرك ،

والمرة الجاية هزود الأنتاج شوية ، علشان أجيبلك دكر بط ،

تلحقي تظغتيه علشان تعمليه لبابا في العيد الكبير ، أنت عارفة بيحب الرقاق و البط ،

ربنا يهدي الحال يابني ، الأيام بتجري ، والعيد فاضله شهر ويهل ،

شوف ياحمادة ، أنت ابني وأنا عجناك وخبزاك ، وغلاوة أمك عندك ،

 الكتب اللي عايز تشتريها وتسهر فيها ليلاتي دي ،

 والمواضيع اللي شغلاك ومغيراك اليومين دول ،

 خير لينا وليك ، ولا ايه الحكاية ، ريح قلب أمك الله يريح قلبك ،

 الشيخ زغبي بيقول لأخوك حسن في درس التحفيظ ، أنا خايف على حمادة !

 من ايه ياضنايا ، اعمل معروف ، كفاية عليا الضغط والسكر ،

حتى الجيران حبايبنا بيقولوا حمادة اتغير وما عدتش بيلاغي زي الأول ،

وسلوى طلعت تعيط وتقول حمادة شكله هيبقى متطرف ومش هيكلمني تاني !

بالعكس ياماما ، أنا بعامل جيراننا كويس وكمان سلوى ، بس احنا كبرنا وبقى فيه حدود برضه ،

أما الكتب فهي علشان أتثقف واتعلم ، ويبقي لي قيمة ، دا أنا كل ما أسمع في الراديو ، برنامج زيارة لمكتبة فلان ،

أتجنن وأحلم يكون عندي مكتبة كبيرة ، وأكون زي الشخصيات دي ، ليا قيمة ، مش دا يشرفك برضه ،

كل حاجة منك بتشرفني ياحمادة ، سامحني ياروحي على قسوتي عليك ،
كنت خايفة عليك ،

حد يقول كده برضه يابطة ياغالية ، دا أنا أفديكي بروحي يا ماما ،

وبعدين أنا مش شاغلني الا كل خير ، مش انتي بتحبي النبي و الأسلام ، وبتسمعي القرآن ؟! الحمد لله ، اللهم صلي عليك يانبي ، وهو أنا مصبرني ومبرد ناري الا القرآن ، ياحمادة ، صبح وليل بسمعه وعايشة معاه ،

أهو ياست الكل نفسي أشارك مع الصالحين من المسلمين ، علشان نرجع للأسلام والقرآن وسنة النبي العدنان ، المكانة والصدارة والمجد ، فيه شرف أعظم من كده ،

بس ياابني يا حبيبي ، الظلمة يبهدلوك ، زي ما شوفنا قبل كده ،

ياستي  " قل لَنْ يُصِيبَنَا إِلَّا مَا كَتَبَ اللَّهُ لَنَا " التوبة– 51

هقولك ايه ، انت حد يسلك معاك ، ولا حد يقدر يحوشك عن حاجة في دماغك ،

روح ربنا يحفظك برضاي عنك ،

فين حسن ؟ بيجيب عيش لسندوتشات المدرسة ، بيدوخني على ما يقضي مشوار ، ماكانش طلع زيك ،

سلام عليكم ، أهلا أبوعلي ، يابختك ياعم ، جمعة وسبت أجازة ، زمانك شبعت لعب ،

شكلنا مش هيبقالنا من سته أكتوبر ، الا الأجازات ،

هو أنا بتهنا على لعب ياحمادة ، من مشاوير ماما ونينة ،

معلش يابطل ، قولي ايه أخبارنا مع الصلاة والحفظ ،

لا ماتخافش ، الشيخ زغبي قاعد لي هو كمان ، كل شوية قوم صلي ، أحفظ ، سمع ..

وتقولي أجازة ، ياعم  .. مشوحا بيده ،

طب يالا ، لمعت جزمتك ، وكويت هدومك ، وحضرتك حاجتك ..

 الحمد لله ،

 وريني واجباتك أراجعهالك ،

ياماما ،

أيوا يا حمادة ،

 مش تنادي على البنات ، يطلعوا من عند سلوى ، مش وراهم مدرسة الصبح ،

حاضر،

على فكرة ياماما ، مش يصح برضه ، سهام ونادية ، يغطوا شعرهم ،

 ويلبسوا جيبات طويلة ، بدري ياحمادة ، لسه بيدلعوا ،

ولو ، أهو نعودهم سنة سنة يعني ، ولا رأيك ايه ؟

 ان شاء الله ياحبيبي .

يهمس الشيخ زغبي في أذن حمادة ، بصوته الحنون كعادته ، الصلاة خير من النوم ..

لينهض ملبيا ، الحمد لله الذي أحيانا بعد ما أماتنا ، واليه النشور ..

ماء الوضوء الذي تتسلل اليه برودة أكتوبر ، ينعش روحه ،

 يهبط بهدوء ، لينهض في اثره عوكل ،

 قضيت الصلاة ، يشير للشيخ زغبي مودعا للأستعداد للمدرسة ، في حفظ الله يا حبيبي ، رادا تحيته

في طريق العودة الي البيت ، يلقاه عادل فيبادره ..

ما فوتش عليا يعني نروح المشوار اللي اتفقنا عليه امبارح ،

الوقت فات ولقيت نفسي جنب بيته ، قلت أنجز ،

وبعدين .. ولا حاجة ، أوهام ،

يعني ايه ، دا راجل داعية ،

بعدين أفهمك ، نتقابل في المدرسة ..

على صوت تقدمة قرآن السادسة ، يعود الي البيت ، يتبعه عوكل ،

كسرولة الفول من عمي دسوقي ، وعاية اللبن من أم زاهر ،

تستقبله رائحة الفلافل الساخنة ، أعظم هدية صباحية من أمه ،

 عبير الشبت والبقدونس على السلاطة ،

حبات الفول رقصت ، كأنها لوز ، فرحا بالسمن البلدي ،

 تصاعد بخار الشاي بالحليب المنتظر في البلكونة  ،

 أيات بينات من سورة يونس ، يتلوها علينا القارئ الشيخ عبد العظيم زاهر ..

يرفع حسن المصلية بعد أن صلى بأخواته البنات ،

 يبدو جميلا نظيفا ، ممشط الشعر ، بريئ الوجه ، متأنق ..

باب الحجرة مغلق على البنات ، ليخرجن منه ..

 بلوزة بيضاء زاهية ، جيبة كحلية رتبت كسراتها وكويت بعناية ،

 جورب أبيض كولون ، حذاء بناتي أسود لامع محندق ،

 ضفائر سوداء فاحمة، محكمة لامعة ،

 الكل في البلكونة .. يتحلق حول حمادة بزيه المدرسي العسكري كقائد ،

 لتتشاغل الأم في مناولة طبق لكل واحد .. سندوتش فلافل ، ريحته تهبل ،

 خففت سخونته السلاطة والطحينة ،

 وآخر الفول اللوز بالسمن البلدي ، مع كوب شاي بالحليب ،

 ولفافة في حقيبته ليأكلها  بالفسحة !

يتوكلون على الله ، يتقدمهم حمادة ،

 مودعين أمهم .. المغرورقة عيناها دوما بالدموع ..

بالله عليك ياحسين ، فيه حد في الدنيا يفوته المنظر ده ؟!

 جاتك نيلة وانت راجل جبلة وغبي ،

 كرهتك ، كرهتك ..

 لتبقى بالبيت هي .. ودموعها !

العَصّارة - الحلقة السادسة

بعد أيام ، يأخذ كل بيت دوره ، في تأبين شهدائه ،

 ويأخذ كل حي دوره ، في الأحتفاء بأبطاله ،

 الذين يعودون منتصبي القامة ، مرفوعي الرأس ،

 تتناثر عليهم التحايا ،

 وتلاحقهم نظرات أنبهار ..

 جعلت حمادة يستحضر ، المشهد المزري المهين ،

 الذي طالما أذل قلبه الصغير ، وسحق روحه البكر ،

ابان النكسة ، وهو لم يزل بعد في السادسة من عمره ،

عقب كل جمعة ، في حر يونيو الثقيل  ، يغص الشارع الرئيسي ،

بسيارات الجيش المنهزمة ، الكئيبة المتهالكة ، تنوء بحملها من الجثث ،

 يتبعها جنود تعساء ، صفر الوجوه ، في ملابس كاكية رثة ،

 يحملون محفات ملوثة بدماء مسودة ، تعلوها بقايا من فروا بأرواحهم ،

 من هول الصدمة وخيبة الأمل ،

 تشيعهم أبواق السيارات ، حاملة النعوش ، القابضة المرعبة ،

 ويغطيهم غبار تمرغ الثكالى في التراب ،

 اللائي يكاد صراخهن وعويلهن ، يوقظ الشهداء من نومتهم ،

 ينظر الجرحى من فوق محفاتهم بعيون كليلة حسيرة ،

 الى حشود حزينة ، مغبرة الوجوه ، منكسة الرؤوس ،

 ترافق موكبهم البائس الحزين !

يتيه حمادة فخرا ، بينما يسير متدليا من ذراع عمه منعم ،

 بطل الصاعقة الضخم المهول ،

 كسنجاب ، يتعلق بأسد ،

 يلازمه من بيت الي بيت ، ومن صحبة الى أخرى ،

 يجلس كمارد ، ليحكي أقاصيص النصر ،

 بين تكبير واعجاب ، ومصمصة شفاه !

يهل على حمادة صيف آخر ..

 ينعم فيه بهدنة ، تبدو غير مستقرة ، مع الأيام ،

 بتواجد أبيه بين ظهرانيهم ، وانتظامه الى حد ما في عمله ،

 برشات العطر التي ينتعش بها قلبه ، من حضن جده ،

 بازدياد اعتماد عمه عليه ، وحرصه على عدم أهانته ،

 لألمامه  بشئون المحل والمهنة ، والورش والزبائن ،

 يزين ذلك كله شعور جديد ولذيذ يجتاحه ،

 بعد أن غلظ صوته ، وهل هلال شاربه ، وانتصب عوده ،

 و تخطى النظرة الطفولية للبنات من حوله ،

 ليعيش حالة ذهنية مثيرة ،

 تنشغل بالمعنى الجديد للحب ، وتبحث عنه ،

حالة .. تؤججها في وجدانه رائعة العندليب الجديدة ، فاتت جنبنا !

لكن لأنه ولد ، بلا وقت ، وحرم من ترف الفراغ ،

 فلم يجد وقتا يمارس فيه هذا الشعور اللذيذ الذي يحلم به ،

 وتدفعه أغنيات العندليب ، ليبحث عنه ،

 أقصى ما يتبقى له ، بعد اللهاث في مشاوير أمه وجدته .. والمحل ،

 بالكاد يكفي لتسبيلة عين ، وربما تنهيدة ،

 ليردعه النوم من الأسترسال !

سرعان ما ينهي حمادة مرحلته الأعدادية ،

 بنهاية أيام جده الحبيب ، واغلاق أبواب جنته ،

 وفتح باب شعوره ، باليتم من بعده ،

 ونهاية سيرة المعركة ، لتفتح سيرة السلام ،

 ونهاية ايام فخر ، عمه البطل منعم ،

 ليسقط في بئر الأكتئاب !

تنتشر سحب العودة الي الدين في انحاء مصر ،

 لتمطر ،

 بخروج الأخوان من المعتقلات ،

 ليسابقوا الزمن للأنتشار ، ورص الصفوف لتعويض ما فات ،

وغسل آثار الأشتراكية العلمانية ، من وقع أقدام الناصرية ،

ليجدوا أنفسهم في منازلة مع السادات ، ومشروعه التطبيعي مع الصهاينة ،

يعود الهوان الي بيت حمادة ،

 دافعا الباب بقدمه الغليظة ،

 ليطفئ الأنوار،

 و يفرش الصمت ،

 ويلف رأس أم حمادة ،

مرة أخرى ، في الصداع ،

ليهرب منه حمادة ، الى المسجد ،

 بصحبة عادل الزيني ، الذي استشيخ !

يبتعد مشوار حمادة قليلا ..

 الي مدرسته الثانوية العسكرية ، في زمن السلام !

لتتجرأ الشمس على لسعه من جديد ، بعد غياب جده ،

 وتزحزح أبيه رويدا رويدا ،

 مبتعدا عن البيت ، مقتربا من المقهى !

يذهب حمادة متباطئا الي المدرسة ،

 ويذهب السادات مسرعا الى القدس ،

لتعتري حمادة ، حالة من الحزن الشفيف ، والشجن العميق ،

وهو على مشارف الثانوية العامة ،

تدفعه لتلمس رائحة جده في المساجد ،

و استحضار دفء حجره ، في الأستماع الي القرآن ،

وتعلمه وحفظه وتلاوته ،

كغريب بمحطة قطار مصر الرئيسية الضخمة ،

 يتقافز حمادة بين أرصفة الحقبة التي سينطلق منها ،

 باحثا بين قطارات الأتجاه الأسلامي ، عما يتوافق مع ميوله وفكره ،

 ليتعلق به ، ممسكا بيده ، زهوره التي اقتطفها :

.. زهرة من بستان تدين جده السمح ، الذي غمسه في رياض المساجد ،

 وأجلسه عند أقدام علماء الأزهر الأكابر ،

 وسكب في وجدانه حب التنزيل ، وعود أذنيه حلاوة الترتيل ،

.. وزهرة من بستان عمه ، عالم اللغة العربية ،

 الذي عرفه على الأمام محمد عبده، ورشيد رضا ،

 والأمام شلتوت ، والشيخ الشرباصي ، والشيخ الغزالي ،

 و شغفه ببرنامج لغتنا الجميلة

( حتى صار الأستماع اليه طقسا أساسيا من طقوس حياته )

 مما عمق لديه حب اللغة العربية ،

 وأكسبه سليقة مبهرة في سلامة النطق ،

 و موهبة ساحرة في حلاوة التعبير،

وزهور عدة ..

.. من حبه للموسيقى والفنون ،

.. ومن متابعته الجيدة للأحداث المحلية والعالمية ، والمامه بها ،

من خلال التصاقه بالراديو طوال اليوم ، واطلاعه على الجرائد ،

.. من حياته الودودة السمحة المنفتحة ، مع جيرانه وأصدقائه على مختلف دياناتهم ،

 وأخيرا ،

..  من مكابدته المبكرة للحياة ،

التي علمته الصبر ، وسعة الحيلة في ابتكار الحلول ،

و خبرة التعامل مع الناس ، والفراسة في فهمهم  ، والقدرة على أقناعهم !

سيطر على حمادة شعور بأنه كبر ، ولم يعد صغيرا ،

 وأن الوقت قد حان ، ليخرج من مثلث الأعتصار الضيق

 ( بيتهم الذي هجره الأب ، وبيت جدته الذي توفي عنه الجد ، ومحل عمه الذي سيضيع فيه العمر ) ،

 هذا المثلث الذي طالما أضجره و أنهكه ،

 كي يشارك في عمل شيئ ، من أجل دينه وأمته ،

 بعد أن رأى سوق الأنتصار ينفض ، ليقام سوق الأنبطاح !

ضاقت مساحات مزاحه و ضحكه ، لتتسع مساحات تأمله وصمته ،

 تقدم المكث بالمسجد ، على العمل بالمحل ،

 طمس ترتيل القرآن ، طرب الأغاني ،

 وأضحت الصلاة ، خير من النوم !

بدا عمه ، والعاملين بالمحل ، أكثر احتراما للوقار الذي غشيه ،
وللحزن الذي اجتاح عينيه ،

وصارت أمه لاتراه الا راكعا ساجدا ، أو مرتلا باكيا ، أو حزينا شاردا !

  يفتقده أصدقاؤه ، لألتصاقه بعادل الزيني ، الذي يمر عليه بالغدو والآصال ،

 لصلاة الجماعة وجلسات التجويد ، ودروس العلم ،

تغرق أم حمادة في كنبتها الأسطمبولي ، سارحة في دنياها العاقة ،

 يتنازعها شعور بالراحة ،

 لولوج ساعدها الأيمن ، حمادة ، الى أنبوب التدين المعقم ، الذي يضمن لها دوام استقامته وبره ،

 وشعور بالخوف والقلق ،

 من أن تشغله المساجد عن العمل ، فيهتز بنيانهم الذي لايحتمل نسمة هواء تمر بجواره !

 بينما هي دائخة ، في دوامة الحيرة والوحدة والصمت ،

 يفزعها جرس الباب ، لتطل برأسها متثاقلة ، مين ؟!

السلام عليكم ، ازيك يا أمي ، فين الأخ حمادة ؟!

يا حمادة ، يا حمادة ،

كلم الشيخ عادل !

السلام عليكم ، كيف حالك يا أخي ؟! عادل مصافحا ومعانقا بحرارة !

الحمد لله .. حمادة ، بهدوء

عايزين نلحق محاضرة الشيخ عبد الهادي ، في أنصار السنة ،

تاني ! حمادة متعجبا ، محتجا .. يستطرد ،

يا أخي ، قعدتني ساعتين المرة الماضية ، لما صدعت ، ولم أفهم جملة مفيدة ،

حتى الكتب المجانية ، بتاع السعودية ، الي وزعوها علينا ،

 كتب غريبة ،  عن العقيدة الواسطية ،

 ومحمد بن عبد الوهاب ، وحاجات كلها مش مهمة بالنسبة لي !

لاحول ولاقوة الا بالله ، ياأخي اتق الله ، عادل غاضبا ..

 مش تفهم عقيدة التوحيد الأول ، وتتعرف على مزالق الشرك ، لتجتنبها ،

 أمال تبقى مسلم ازاي ؟!

أنا مسلم وموحد بالله ، واعرفه جيدا ، والحمد لله ،

 ما قرأته في العقيدة ، للشيخ شلتوت ، والشيخ الغزالي ،

 أراه كافيا لتغطية هذا الجانب ، و لاحاجة لي بهؤلاء الذين يضيعون وقتي !

ووقتك الثمين ده ، محتاجه فى ايه ، ان شاء الله ، يا أخ حمادة ؟! عادل متهكما ،

نفسي أفهم الشباب ، تصور جميل وشامل للأسلام ،

 الأسلام اللي بيحترم الأنسان .. أي كان ، وييسر له كافة سبل السعادة ،

 بدفعه الى أن يكون دوما في المقدمة ، في كافة المجالات ،

 في العلم وفى الثقافة ، في الفن وفى السياسة ،

 في الحرب وفي الصناعة ، في الرياضة وفى التجارة ،

 نفسي أمتنا  تعيش حياتها متماسكة ، موحدة ، على أحدث النظم ،

 وتسخر كل طاقاتها ، من أجل دفع الشباب ، للثقافة والعلم ، والرياضة والفن ،

 ولكن بصبغة اسلامية حضارية منفتحة ، سمحة معتدلة ،

 يعتز بها كل أبنائها ، حتى غير المسلمين منهم ،  لننعم بالقوة والأمن والرفاهية !

طب ازاي ؟! عادل مندهشا ،

أمتنا دلوقتي بتتعرض لهجمة شرسة ، بتهدد وجودها نفسه ،

 والأولى اننا نوحد المسلمين ، على الحد الأدنى من الثوابت ،

 و نحشد الجهود الدعوية الدينية ، للحث على الأخوة والوحدة الوطنية ،

 والعمل والأبداع في كل المجالات ، حتى لايزداد البون اتساعا بيننا وبين أعداءنا ،

 ونصحو يوما على ضباع تتخطفنا ، واحنا قاعدين نهدر الوقت في الكلام عن العقيدة الواسطية !

آدي آخرة الراديو ، والجرايد ، وبتوع الأزهر اللي بتسمع لهم ،

 قال مش مهم عقيدة واسطية قال ، أستغفر ربنا يا أخي .. عادل ، غاضبا ،

اللي انته بتقوله ده ، كلام الأخوان ! ..

يتدخل الأخ فؤاد ، فجأة ، بعدما حضرالجزء الأخير من كلام حمادة ،

بيقولوا ايه الأخوان ؟! حمادة متسائلا ..

أشتري كتب حسن البنا ، وانت تعرف  ..  يقولها فؤاد مودعا ،

دفع حمادة ، خمسة عشرة قرشا ، ليحصل على كتيب صغير ،

 يحوي احدى رسائل حسن البنا ،

 بعدما توقف طويلا ، ليفهم مغزى عنوانه :

" رسالة المؤتمر الخامس "

قضى الليل كله ، مبهورا بالكلمات ، حتى حفظ منها ، مقاطع كاملة :

( ألجموا نزوات العواطف ، بنظرات العقول

 وأنيروا أشعة العقول ، بلهب العواطف

 وألزموا الخيال ، صدق الحقيقة والواقع

 واكتشفوا الحقائق ، في أضواء الخيال الزاهية البراقة

  ولا تميلوا كل الميل ، فتذروها كالمعلقة

 ولا تصادموا نواميس الكون ، فإنها غلابة

  ولكن غالبوها ، واستخدموها ، وحولوا تيارها

 واستعينوا ببعضها علي بعض

  وترقبوا ساعة النصر، وما هي منكم ببعيد ) !

لقد وجد ضالته ، ولم يبقى الا أن يجد تلك الجماعة العظيمة ،

 التي تحدث عنها هذا المجدد الفذ ، لينال شرف اللحاق بها ،

 وخدمة أمته ودينه من خلالها ، ولكن كيف ؟!

أنت لسه صاحي ، يا حمادة ؟! الحق نام لك ساعة ، قبل الفجر ،

معلش ياماما ، صابحين أجازة ، بمناسبة سته أكتوبر ، حمادة بصوت متهدج ،

نامي أنتي ، أنا هصلي ركعتين وأنزل للشيخ زغبي في الجامع ،

النبي حبيبك ، تسلم عليه ، وتقول له يدعى لنا ياحمادة ، ويدعي لأبوك بالهداية ،

ربنا يهدي الجميع ، يقولها حمادة ، مشمرا للوضوء ، ناظرا بتأثر لأخوته وهم نيام ،

ما أن يفتح حماده ، باب شقتهم في الدور الثالث ،

 حتى يهب كلبه العجوز عوكل واقفا ، ينفض غبار النوم عن جسده المترهل ،

 ليصعد السلالم ببطء ، حتى يلتقي صديقة المقرب حمادة في منتصفها ،

 يكاد يطير فرحا ببزوغه مع الفجر ،

 يرفع رأسه ناظرا اليه بحنان ، تتسارع هزات ذيله ،

  حتى اذا سلك حماده طريقه الى الجامع ، تبعه عوكل في خشوع ،

يدلف حمادة من باب الجامع ، مقدما رجله اليمنى ، متمتما بما حفظه من أدعية لدخول المسجد ..

بسم الله ، اللهم افتح لي أبواب رحمتك ..

 يسوقه قلبه الى موضع سجود جده ، في ركن قصي على يمين المنبر ،

 يصلي ركعتا تحية المسجد ، ويتنسم عطر روح جده ،

 ينتبه الي كف لينة حنون ، تمسح على رأسه ،

 ينتصب قائما بحب وتأدب  .. أهلا مولانا ، منكبا على يديه ، يهم بتقبيلها ،

 لينزعها الشيخ برفق ، مقبلا رأسه ، ايه النور ده ، راسك سخنة يا حبيبي ،

يطرق صامتا ، أبدا شوية فكر ،

مش أنت بس اللي يتيم بعد جدك ، يا حمادة ، وأنا كمان والله ،

أروح أرفع الأذان ، وبعد الصلاة ، نشوف مالك يا غالي ،

الله أكبر ، يصدح بها الشيخ زغبي ، ليهيج الذكرى ،

 شعر حمادة ، وكأن نسيم صباح السادس من أكتوبر ( 1978) ، المسبح من شباك المسجد المجاور له ،

 يرددها بشجن ، لشعوره بفتور ، يتزايد عاما بعد عام ، في استقباله ، بعد أن تعود الحفاوة ! 

تنساب دموع الفتى ، ويشهق ، الهي .. أسترددت جدي ، فصبرت ،

 وتخلى أبي فكابدت ، وتوجعت أمي فبررت وواسيت ،

 اللهم بحق محبتي لجنابك ، ووقوفي ببابك ،

 وشغفي بكتابك ، والتزامي درب محمد نبيك و حبيبك ،

شرفني بشرف خدمة أمتي وديني ، ونور لي الطريق ، نور لي الطريق يارب ،

السلام عليكم ، صليت سنة الفجر ، يا أخ حمادة ، عادل الزيني ، هامسا ،

مكفكفا دمعه ، مجتهدا في اخفاءه ، حالا ، أصليها ،

تقام الصلاة ، ليتألق الشيخ زغبي ، بتلاوته الغضة الطرية :

" وَعِنْدَهُ مَفَاتِحُ الْغَيْبِ لا يَعْلَمُهَا إِلَّا هُوَ وَيَعْلَمُ مَا فِي الْبَرِّ وَالْبَحْرِ ،

 وَمَا تَسْقُطُ مِنْ وَرَقَةٍ إِلَّا يَعْلَمُهَا وَلا حَبَّةٍ فِي ظُلُمَاتِ الأَرْضِ ،

 وَلا رَطْبٍ وَلا يَابِسٍ إِلَّا فِي كِتَابٍ مُبِينٍ " الأنعام:59 ..

 ليكمل حمادة نشيجه ونحيبه ، وكأنما يغتسل بدموعه من وعثاء سفر ،
ليتهيئ لسفر جديد !

مالك يا حبيبي ، خيرا ، تعالى ، قم مع حبيبك الشيخ زغبي ، نقعد في المكتب شوية ،

صلى على النبي أمال ، ووحد الله ، دا أنت مؤمن وطول عمرك راجل ،

يمسح دموعه بكمه ، اللهم صلي على كامل النور ،

الفاتحة على روح جدك الحاج جميل النادي ، عمود الجامع ده ،

 وان ربنا يهدي أبوك ، ويستر عليكم بحق جاه محمد ،

وأمة محمد يا شيخ زغبي ، مين يقرالها الفاتحة ،

لا اله الا الله ، أمة محمد لها رب ، ياحمادة يابني ،

واحنا يا شيخ زغبي ، نقعد نتفرج ، على نصرنا بيتخنق ،

 وأرضنا بتتحرق ، أطفالنا بتندبح ، وشرعنا بيترفض ، و ..

عارف ، والله عارف ، وآدي ذكرى النصر جاية ،

 ومش لاقية ريق حلو من القلب ، زي الأول ، الحب كله دلوقتي في السلام ،

بالك ياحمادة ، طب والملك القدوس السلام ، ربنا بريئ من السلام ده ، ده استسلالالالالالام ،

بس ايه بايدينا نعمله يا حمادة يا ابني ؟!

نعمل كتير يا مولانا ، زي ما النبي ، تعب وجاهد ،

 وعمل أمة أصبحت من أعظم الأمم ، من العدم والجهل والشرك والضلال ،

اللهم صلي عليك يانبي ،

اسمع يا شيخ زغبي ، أنا من النهاردة هادور على الأخوان المسلمين ، وامشي معاهم ،

ايه ايه ، بتقول الأخوان ؟! لاحول ولاقوة الا بالله ،

 وانت ايش عرفك سكتهم يا حمادة ، وانت من المدرسة للبيت للمحل ؟!

أنا اللي قريت عنهم ، وعجبني كلام الشيخ حسن البنا ، المرشد المؤسس بتاعهم ،

ياسنة سوخة يا حمادة ، دا أنت طول عمرك ناصح وعاقل ، الأخوان حتة واحدة !

جري ايه يا مولانا ، هو أنا قلت المافيا ولا حاجة ؟!

ياابني ، يا ضنايا ، ربنا يهديك وينزل على قلبك السكينة ،

الأخوان ، يعني سجن وبهدلة ، طب والنبي ، دا أمك تموت فيها ،

فينك يامعلم جميل يا نادي ، تيجي تشوف صاحبك ، اللي هيضيع نفسه ويضيعنا معاه ،

انت بتبالغ يا شيخ زغبي ،

ببالغ ، أمال ، أصلك ما شوفتش اللي كان جري للأستاذ سراج وأخته الست اصرار ،

 وكانوا من خيرة الناس الكمل ، على ايد الظلمة ، بهدلوهم يا ولداه ،

اسمع يا حمادة ، عايز ياابني تخدم الدين ، أتوكل على الله وأجتهد واطلع من الأوائل ،

 والجامع أهه ، جدك اللي شال حجارته على كتافه ،

 اعمل هنا اللي أنت عايزه ،

 تحفيظ قرآن ، محو أمية ، ساعد الغلابة ،

 أمال ، دا حتى ربنا بيقول في كتابه العزيز :

 " وَأَنْفِقُوا فِي سَبِيلِ اللَّهِ وَلَا تُلْقُوا بِأَيْدِيكُمْ إِلَى التَّهْلُكَةِ وَأَحْسِنُوا إِنَّ اللَّهَ يُحِبُّ الْمُحْسِنِينَ "  سورة البقرة – 195 .

قوم يا حبيبي ، قوم اتوكل على الله واسمع الكلام ، ربنا يهديك ،

يا حمادة ، مش هنمشي ، عادل الزيني ، متبرما ،

مستنيك من ساعتها ، مش عارف ايه مزاجك ، تتساير مع الراجل ده ؟!

دا شيخنا وحبيبنا ، وبلبل الجامع الصداح ،

صداح ؟! فيه شيخ معمم ، من غير لحية ، وتقولي صداح ، ياللا بينا ،

عايزين نروح نزور الأستاذ عبد الحفيظ المنياوي ،

اشمعنى ،

راجل داعية وملتحي ،واسمع ان عنده مكتبة كبيرة ، وبيعمل لقاءات أسبوعية للشباب ،

دا صحيح ، لكن احنا مالنا ،

يا أخي ، مش يمكن يطلع أخوان ، أو حتى يدلني عليهم ،

ليه ، هو انت قررت تمشي معاهم ، من كتاب قريته ،

بالضبط ، الكتاب كله أفكار عظيمة ، تتوافق مع طموحاتي ،

ماشي ، نجرب ، هطاوعك علشان بحبك بس ، لكن أنا مليش دعوة !

 خلاص لما نتقابل ، السلام عليكم ،

مع السلامة ،