العَصّارة - الحلقة الحادية عشرة

بتواجد الأب بالبيت ..

يتسع نشاط حمادة الدعوي ، ويضيق وقته ،

يكثر أصدقاؤه وإخوانه ، ويقل إنتاجه بالمحل ..

ينتهز فرصة التجمع للتدريب على ضرب النار ،

 ليعقد إجتماعا لإخوانه في الجماعة الإسلامية ..

شوفوا يا جماعة ، من النهاردة عايزين نستغل وقت صلاة الظهر أحسن من كده ،

نعمل فيها إيه يعني ، دا حتى يادوب بنصلي ونلحق نجيب حاجة من الكانتين ،

ولو ، يا أحمد ، مادام فيه إقبال من الزملاء ، لازم نستثمره ،

حتى لو نقدم فيها فقرة سريعة في خمس دقائق ،

آية قرآنية مع تفسير مبسط لها ، حديث شريف ، شخصية صحابي ،

موقف من السيرة ، قاعدة أخلاقية ، معلومة أو خبر هام .. و هكذا ،

وأنا جايب معايا نموذج كتبته ، شوفوا كده وقولوا رأيكم ،

ممتاز، بس مين هيقدم الكلام ده ؟!

في الأول ، يا عادل ، كل واحد مننا يقدم يوم ،

وبعدين اللي نلمس فيه تجاوب من الزملاء ، نشجعه ، ونخليه يشارك معانا ،

طب ، وأخبار المجلة إيه ،

والشيخ اللي هندعيه يتكلم في الحفلة الكبيرة عن موضوع الشيعة ؟!

المجلة أنا الحمد لله ، ماشي فيها كويس ، ياهشام ،

وقربت أخلص ، وهتطلع روعة ، هتفاجئ الجميع ،

بس عايز حد يساعدني ، في المطبعة ، يتقاسم معي وقت المتابعة ،

علشان بتعطل عن المذاكرة ،

عادل يساعدك ،

نعم .. ! وانا مالي .. الا المذاكرة ، انتو عايزين أبويا يدبحني ،

خلاص ياحمادة ، أنا هقسم معاك الوقت ، عادل بيشارك في الخطب والكلام بس ،

الزم حدودك يا أطروش ، عايز تضحي ، ضحي وأنت ساكت ، ومالكش دعوة بحد ،

خلاص يا أخواننا مش كده ، استغفروا واصلحوا نيتكم ،

عادل هييجي معايا عند الشيخ  مسعود عطاالله ، علشان ندعيه للحفلة ،

آه كده ، ماشي ،

كمان ، يا حمادة ، عايزين نبدأ نطور اليوم المخصص للجماعة في الإذاعة ،

 خصوصا إن الكل بينتظره كل أسبوع ،

سبقتني يا أحمد ، قول أفكارك ، بس ما تكررش اللي هنعمله في صلاة الظهر ،

بقول نعمل لقاءات اذاعية سريعة مع المدير ، والقائد ، وبعض المدرسين والطلبة ،

نناقش فيها موضوعات الساعة ،

أيضا ، فقرة من كتاب  ، قصيدة شعر ، طرائف ، مسابقات ،

آه ، وياريت ياحمادة ننظم مسابقات لحفظ جزء عم وتبارك ، والأربعون النووية ،

وأنا من ناحيتي ، هجتهد في تطوير الكلمة الأسبوعية ، لتكون أكثر شمولا وتأثيرا ،

ماشاء الله ، هشام الأطروش ، ونادر جورج ، مبدعين في النشاط الرياضي ،

ايوه ، الحمد لله ، ونادر بصراحة جدع ،

ومش في دماغه خالص حكاية الجماعة الإسلامية دي ،

رغم ان الواد جون فخر ، بيزن عليه ، إنه يبعد ، بس هو مش معبره ،

دا حتى أقترح عليا فكرة حلوة جديدة ، أي طالب يلعب فى أي بطولة ،

نحشد جمهور من الزملا وراه ،

من ناحية نشجعه ، ومن ناحية كأنها رحلة خفيفة ، بإشتراك رمزي ، للسندوتشات والساقع ،

الله ينور عليك ياهشام ، ويقبل منك ،

كده بندي إنطباع للشباب إن الإلتزام مش هيحرمهم من حاجة ،

لازم نرسخ المعنى دا في كل أعمالنا ، إن الإسلام دين شامل ، يغطي كل جوانب الحياة ،

فكلما صبغنا حياتنا بصبغة الإسلام ، كلما تحولت عاداتنا إلي عبادة ،

وسعدنا في الدنيا والآخرة ..

" صبغة الله ، ومن أحسن من الله صبغة ، ونحن له عابدون "

كمان نادر خلى المجلات الحائطية مزهزهة في المدرسة ،

بفكرة البراويز الكبيرة العبقرية ، اللي حطها في أماكن تجمع الطلاب ،

ولونها وقسمها مربعات فاضية ،

وكتب بخطه الجميل ، على كل مربع عنوان الفقرة الي تتعلق فيه ،

بحيث أي واحد في المدرسة يلزق الفقرة اللي عايز ينشرها بكل حرية ،

آه نسيت أقولك ، خالد طاحون ، وطلعت حبيب ، وإبراهيم أبو زهرة ،

عايزين نضمهم معانا ، ملتزمين وأفكارهم حلوة ،

إيه رأيكم يا جماعة ، موافقين ، الحمد لله ، في الفسحة نقابلهم يا هشام ،

على فكرة يا إخواننا ، أنا عايز أقول حاجة ،

دولقتي أنا عايز أفهم ، مش إحنا جماعة إسلامية برضه ؟!

الحمد لله

يبقى إيه دخل واحد زي نادر جورج ، في وسطينا ؟!

إيه يازيني ، الكلام ده ، عاجبكو كده ياجماعة ،

إهدى بس يا هشام ،

شوف يا أخ عادل ، هي مصر دي دولة إيه ؟!

إسلامية طبعا والحمد لله ،

طب ، إيه دخل نادر جورج وأمثاله فيها ؟!

تعجبني ياحمادة الله ينور عليك ،

ثواني يا هشام ،

مصر دي ياعادل ، بناء حصين ، عظيم ، خالد ،

 كتب على بابه " مصر العربية الأسلامية " ،

يقطنه ، ويحتمي به ، ويشرف بالإنتماء لعنوان حضارته العربية الإسلامية ،

كل مصري على أرض هذا الوطن ،

أيا كان دينه ، فهو إبن هذه الحضارة ، الخالدة ،

ويكتب نفس عنوانها العريق ، على كل مراسيله !

ماشي ياحمادة ، خليك عايش في الأوهام والمثاليات ،

فكرك الكلام ده ، يخش دماغهم بتلاتة مليم ، إبقى قابلني ،

والله ، ياعادل ، دي قناعتي ، وأعتقد انها الأصل ،

ومن شذ ، من أي طرف ، شذ في النار ،

نفسي أعرف ياحمادة بتجيب الكلام ده منين ،

أبدا والله ، يا احمد ، ربنا أكرمني بصديق جميل ،

تعرفت عليه ، في المسجد المجاور للأستاذ مجدي عثمان ،

أثناء فترة الدرس ، رجل مثقف جدا ، ومتدين بإعتدال ،

وعنده مكتبة ضخمة ، فيها كنوز من الجواهر ،

الراجل بيمسك فيا نقرا سوى ونتناقش ، دا حتى معجب جدا بنشاطنا ،

ووعدني يعرفني على الإخوان ،

إجمع في أرض الطابور ، إنتهت فترة التدريب ،

كتيبة صفا .. كتيبة إنتباه ،

إيه حكايتك يا حمادة ،

خير ياعمي ،

إزاي تمشي من غير ما تكمل شغلك ؟

معلش بكون راجع تعبان من المدرسة ، وعايز أذاكر ،

يبقى تقعد في بيتكم ، الشغل شغل ، آه ،

حاضر ، هستأذن علشان بابا في البيت وعايز ألحق صلاة المغرب ، وأقعد معاه شوية ،

سلم لي عليه ، وابقى فوت على نينة ، بتشتكي منك ،

بتقول من بعد موت جده معدتش بيعبرني ،

حاضر ،

حرما يامولانا ، هو بابا ماجاش يصلي المغرب ؟!

إنت تايه عن أبوك ، طول عمره كسلان ، ياللا ،

أتوكل على الله وإطلع شوف مذاكرتك، ربنا معاك ،

سلام عليكم ،

تعال ياحمادة ، عايزك ،

حاضر ، أغير هدومي ،

سيبه يتغدى الأول ياحسين ،

اللهم بارك لنا فيما رزقتنا ، وقنا عذاب النار ، بسم الله ، ايوه يابابا ، إتفضل ..

إلا صحيح الكلام اللى أنا سامعه ، إنك ماشي في سكة الأخوان والنشاط الديني ؟!

الحمد لله ، دا شرف كبير إن الواحد ينشغل بأمور دينه وأمته ،

أيوه يابني ماقلناش حاجة ، كلنا مؤمنين وموحدين بالله ، بس ربنا برضه قال :

 ولا تلقوا بأيديكم إلى التهلكة ،

إن شاء الله ، مفيش تهلكة ولاحاجة ،

أمال كتب التعذيب بتاع الإخوان ، وشرايط الفنية العسكرية ،

وكتاب معالم في الطريق ، تسميهم إيه ؟!

وكمان عامل زعيم الجماعة ، وعمال تطبع حاجات في المطبعة ،

والدقون اللي رايح جاي معاهم دول !

يا إبني إعمل معروف ، وما تخليش الحماس ياخدك ، السكة دي آخرتها البهدلة ،

خليها على الله يابابا ، أنا مش ماشي في أي سكة متطرفة أوغلط ،

أنا بس عايز يكون ليا قيمة و لازمة في الحياة ،

قيمتك إنك تريح قلب أمك ، وتشوف مذاكرتك وتعرف مصلحتك ،

فيه إيه ياحسن ؟!

الأطروش بيقولك بص له من البلكونة ، علشان مكسوف يطلع .. حسن هامسا ،

ماتيجي ياهشام ، ماحدش هنا ، كنت باكل وبدردش مع بابا ،

متشكر ، مرة تانية .. قولي ، فيه أي تنبيهات بخصوص اللى هاعمله في المطبعة ،

هتلاقي هناك ظرف كبير ، فيه الأصول كلها ، كل عينة يطبعها ، تراجعها كويس ،

 وتتأكد من نضافة الشغل ،

على ما أجيلك ، هصلي العشا وأروح درس الرياضيات عند الأستاذ مجدي عثمان ،

وأفوت عليك ،

مع السلامة ،

يا سهام ، الله يخليكي ، أكويلي قميص ، علشان عندي درس ،

ماشي ، بس كلم ماما ، عايزاك في المطبخ ،

إيه ، عمك مدكش فلوس النهاردة ؟!

إداني .. إتفضلي أهم ،

إيه دول ؟! اتنين جنيه ، إحنا بنزيد ولابننقص ، إنت ما بتروحش المحل ،
 ولا إيه الحكاية ،

بروح بس بكون هلكان من المدرسة ومصدع ، فيادوب بخلص الأربع حتت بالعافية ،

والنهاردة قالي يا تعمل إنتاج ، يا تقعد في بيتكم ،

إلهي يقعد كببة ، لاراس ولا رقبة ، دا بدل مايخلي عنده دم ويزود الأجرة ،

إبن سكينة اليهودي ده ، ربنا يهده وهوعامل زي الإنجليز ،

طب معلش يا نن عين أمك ، في عرض النبي ، تطول بالك وتتجدعن  شوية ،

انت تايه عن أبوك ، ماتضمنوش ، مفيش منه رجا ،

وحدي الله ياماما ، متقوليش كده ، دا مهما كان ، هو الخير والبركة ،

هسيبك ، يادوب ألحق الدرس ،

بسم الله الرحمن الرحيم ، إزيكو يا ولاد ، النهاردة هندسة فراغية ، وتفاضل ..

إزيك يا حمادة ، عايزك بعد الدرس شوية ،

هيه عامل ايه ؟

الحمدلله ، يا أستاذ ،

الأستاذ عاطف الغويط ، منبهر بيك أوي ،

وأنا والله فرحان بمعرفته ، وبصراحة أكتر ، بمكتبته ،

هو قارئ من طراز خاص ومحب للعلوم والفنون ، ومتدين ، بس أقرب الي التصوف حبتين ،

أنا متابع نشاطك في المدرسة ، ومعجب بيه جدا ،

أنت ولد قائد موهوب ، وبسرعة عملت من زملائك تشكيل منظم وممتاز ،

الحمد لله ، الفضل بعد ربنا للزملاء ، يا أستاذ مجدي ،

فعلا ممتازين ، وكل يوم بشوف أفكار جديدة ، وتطوير رائع ، لكن قوللي ..

إيه حكاية بحثك عن الإخوان اللي بيقول عليها الأستاذ عاطف دي ؟! هل دا صحيح ؟!

بالضبط يأ أستاذنا ،

طب إشمعنى ؟!

قريت عن منهج دعوتهم ، من خلال الشيخ حسن البنا ، فوجدت فيه ضالتي ،

شوف ياحمادة ، أنا قدامك أهه ، متدين وملتحي ،

وقريت كتاب الظلال لسيد قطب ، وعاصرت الناس دول ،

بس هما مش بالمثالية اللى إنت متخيلها ،

كم من مناهج جميلة ، تغيرت على يد من يطبقوها ،

يعني إيه ؟ تقصد حضرتك إن الإخوان اليوم ، إنحرفوا بالتطبيق عن نهج البنا ؟

مش بالضبط ، بس أنا رأيي ،

 إن نهج البنا " المثالي " ، إنتهى على يد التنظيم السري" الواقعي" !

مش عارف يا أستاذ مجدي ، أنا محتار ، بس لازم برضه أخوض التجربة بنفسي ،

ربنا يوفقك ، ولا تعلم ، يمكن جيلكم يضبط البوصلة ،

أهو الأستاذ عاطف الغويط ، وصل ،

أهلا أستاذنا ، مسكت في حبيبك لحد ماتيجي ،

جزاك الله خير ياأستاذ مجدي ، إزيك يا أخ حمادة ، إبن حلال ،

جايبلك معايا كنز ، شوف كده ،

ماذا خسر العالم بانحطاط المسلمين ، أبو الحسن الندوي ،

عنوان مؤثر ، لكن مين المؤلف ده ؟ أول مرة أسمع أسمه ،

دا من علماء المسلمين في شبه القارة الهندية ، ورئيس رابطة الأدب الإسلامي العالمية ،

ويا سلام لو تقرأ له ، مذكرات سائح في الشرق العربي ، والطريق الي المدينة المنورة ،

يا أستاذ عاطف ، بالراحة على حمادة دا ثانوية عامة ،

وبعدين دا متحمس ، الحاجة اللي تشده مايسبهاش ،

على رأيك يا أستاذ مجدي ، شد حيلك يا أخ حمادة ، وبعد الثانوية ،

 إن شالله تبيت في المكتبة ،

طيب أستأذنكم ، عندي مجموعة ،

في حفظ الله يا أستاذ مجدي ،

هيه أخبارك إيه يا أخ حمادة ، على فكرة ، أتعرفت على أخ من الإخوان ،

وحكيت له عنك ، طلع عارف عنك وعن المدرسة كل حاجة ،

 وعايز يقابلك ويتعرف عليك ،

واسمه إيه ؟

رائد البسيوني ، من ناحية السوق كده ، هو في كلية الصيدلة ،

خلاص ، نخلص الحفلة الكبيرة اللي هنعملها في المدرسة ، ونقعد مع الأخ رائد ،

أستأذن حضرتك ، علشان مستعجل ،

في حفظ الله ، ما تغيبش الكتاب وحافظ عليه ،

خليكو شاهدين على حبايبنا ، خليكو شاهدين  .. بيدورو علي بيتعبنا خليكو شاهدين ..

إيه ياماما ، سرحانة مع فايزة أحمد كده على طول ، إسمعي قرآن أحسن ،

أهو ، ساعة لقلبك وساعة لربك ، ياللا ، أقوم أحطلك تتعشى ،

إخواتك ناموا ، وحسن كانت واقفة معاه مسألة ، قلت له ، حمادة يشرحالك الصبح ،

وطبعا بابا على القهوة ،

طب ألحق أحل تمارين درس النهاردة ، قبل ما تطير من دماغي ،

وأحضر درس طنط جورجيت ،

صحيح، الدكتور بشاي جه يسلم على بابا ،

 وزعلان إنك ما قلتلوش إن بابا هنا زي ما وعدته،

إخص على دماغي ، اللي فيها ميت حاجة ، أنا هتأسف له ،

توكلنا على الله ، تعال ايها التفاضل ،

ياصلاة النبي ، إيه دا ان شاء الله ، مش دا كشكول الدرس اللي كان عند سلوى ؟

قلب وسهم ، وسلوى وحمادة ! وبعدين .. في عرضك يا ست سلوى ، عايزين نذاكر ،

أطرووووش ، سلام عليكم ،

إزيك ياعادل ، إزيك ياحمادة ، معلش ما كنتش سامعك ،

الحمدلله إننا اتقابلنا ، أهو نستغل المسافة لحد المدرسة ،

علشان نشوف ترتيبات الحفلة ، ما فضلش غير يومين ،

المهم قبل ما أنسى ، تصفحت إمبارح كتاب مذهل ،

بيتكلم عن الخسارة التي لحقت بالعالم كله ،

بسبب تخلف المسلمين عن أداء دورهم ، هلخصو ،

في شكل فقرات مركزة نقدمها في الإذاعة ، بعد ما ناخد رأي الأخوة ،

إمبارح ، الأستاذ إسماعيل حسونة ، قابلني بالليل ،

وقالي إنه أخد من المدير موافقة بعشرين كرتونة عصير للحفلة ،

طب قربوا ، الطابور هيبدأ ،

نادر ، إيه الحلاوة دي ، خليت في المدرسة عرس مجلات ،

 وأحلى حاجة إن كل واحد يحط الفقرة اللي تعجبه ،

لأ ولسه، هزوق المسرح أنا والأطروش ، علشان الحفلة ،

ربنا يخليك يانادر ،

إجمع طابور ..

السلام عليكم يا أستاذ اسماعيل ،

أهلا ، إزيك يا محمد ، إزيكو يا ولاد .. بارك الله فيكم ،

شفت المجلة ووريتها للأستاذ المدير ، رائعة ،

ضروري النهاردة ، تاكدوا على الشيخ الدكتور مسعود عطاالله ،

علشان الحفلة من غير محاضرته عن الشيعة ، ملهاش لازمة ،

إن شاء الله رايحين له النهاردة بعد العشا ،

ربنا معاكم ،

السلام عليكم ، فضيلة الأستاذ موجود ، إتفضلوا ، ادخلوا على المكتب على طول ،

أهلا بالشباب ، بارك الله فيكم ، أخوكم ، مسعود عطاالله ،

مدرس بكلية أصول الدين ، بالأزهر الشريف ،

أخوكم ، عادل الزيني ، ثانوية عامة ،

تلميذ فضيلتك ، محمد جميل النادي ،

خيرا إن شاء الله ، بلغني أنكم عاملين أنشطة دعوية طيبة مباركة ،

 في مدرستكم ، وهذا مما يثلج الصدر ،

لايخفى على فضيلتكم ، اللبس الحاصل الآن في موضوع الشيعة ،
 منذ قيام الثورة الأيرانية ،

والشباب متعطشون للوقوف على حقيقة الشيعة ومذاهبهم ، وقربها أو بعدها ومن السنة ،

لذا نود أن تشرفنا فضيلتك بالمدرسة ، لإلقاء محاضرة تساهم في إزالة هذا اللبس ،

بسم الله ، ماشاء الله ، إلقاؤك جيد ، ولغتك مضبوطة ، فمن علمك هذا ؟!

عمي ، الأستاذ إبراهيم جميل النادي ، أستاذ اللغة العربية ، وهو أزهري أيضا ،

جزاه الله خيرا .. وهل أحضرتم موافقة من إدارة المدرسة ،

بالتأكيد ، فضيلتك ،

على بركة الله نزوركم غدا بإذن الله ، في حفظ الله ،

إيه رأيك يا أخ عادل

فى إيه ؟!

في اللقاء ، مع فضيلة الشيخ ،

كويس ، بس مفيش داعي للفذلكة في الكلام ، حتى لانقع في الرياء ،

يا أخي ، هو الواحد لما يكون شاطر ولبق ،

 ويخاطب الناس بما يليق بهم ، تسمي ده فذلكة ورياء !

هوا علشان أنا في ثانوية عامة ، المفروض أكون عيل ، وأتكلم بهيافة وعبط ؟!

ولا علشان أتفادى الرياء ، أتخرس ، وأسكت خالص ؟!

والله ، ده رأيي ، أنا بحس إن انت بتستعرض ، وشايف نفسك ،

ما ينفعش يا أخ عادل ، نكون أخوة بندعو الى الله ،

ويكون ده شعور واحد فينا ناحية التاني ،

فإذا كنت انت عندك صعوبة في التعبير عن أفكارك ، فتغلب عليها لحد ما تحسن أداءك ،

أما أن تكتفي بالحقد على غيرك ، فده مش مظبوط !

ياسيدي ، لاحقد ولاحاجة ، انا بس كنت بنصحك ، أشوفك بكره ، سلام عليكم ،

يمضي حمادة منشغلا ، بكلام عادل ..

ترى ما سر حساسية مجتمعنا عموما ، والمتدينيين منه خصوصا ..

تجاه الشخص المنطلق على سجيته ، الشاعر بموهبته ، المطاوع لها ؟!

لماذا يبدون اعجابهم بالسلبي الصامت ، ويتعاطفون معه ؟!

ويحتشدون ضد الجريئ اللسن ، الفصيح ، ويتربصون به ..

 ليتصيدوا له الأخطاء ، ويظنون به الرياء ؟!

هل أخطأت يا حمادة ، يوم يممت وجه فكرك ونشاطك ، بل ومستقبلك ..

شطر من يسمون ، بالإسلاميين ،

حتى متى تظل مصرا على ارتقاء الصعب ؟!

الم يكن يسعك أن تمضي حرا طليقا ، لتحقق ذاتك وتخدم وطنك ، دون فظاظة ، وتحفظ ؟!

راجع نيتك جيدا ياحمادة ، فيبدو أنك ستسلك طريقا .. ذات شوك !

يخرج الي شارع البحر ، ليعيد ملء صدره الضيق ، من نسيم فبراير الطري ،

يتنامى الي سمعه صوت موكب المولد النبوي الشريف ،

 الذي اعتادت الطرق الصوفية ، أن تسيره كل عام ،

لشد ما أحب طعم الفرح ، بالسير فيه ، ليجوب المدينة حتى وفت متأخر من الليل ،

فتنسيه متعة الفرجة ، وبهجة الصحبة ، وضمة الأنوار ، وسكرة التواشيح ،

ما سيلاقيه من ويلات على يد أمه ، عندما يعود ،

الآن يعود طفلا ، يكحل عينيه المجهدتين ، بأنوار ملونة تتلألأ ،

 يسبح بها الشارع والبيوت والناس ،

وسط هدير ميكروفونات الموكب ،  الممتد لمسافة خمسة كيلومترات ..

مااااشي بنور الله ، بدعي وأقول يارب .. ماااااااشي ..

بعوده الأيام يا حاج عبد الرحيم ، يانور النبي ..

 صلي على جمال النبي .. معلم صباحي ، وأبو الحجاج ،

الطريقة الرفاعية بتحييكم ، بعوده الأيام ، يانور النبي ..

هدي يابني شوية الله يسترك ، وسع ياض انت وهو من قدام العربية ،

 اللهم صلي على جمال النبي ، مااااشي بنور الله ..

مدد يانبي يانبي ، يانبي مدددددد ، مدد يانبي يانبي مادددددد ..

صلي على سيدك النبي ، الطريقة الخلوتية تهنئ الأمة الأسلامية بمولد الحبيب ..

صلوا عليه .. صلوا عليه .. صلوا عليه ، صلوا عليه ،

باب السلام باب السلالالام ، باب النبي ..

الحاج عنبه ، والحاج بنداري ، والمعلم بلبول ، صلوا على جمال النبي  ..

أنا جيت أزورك يانبي ، وأقول مداددد ..

الطريق يا أخواننا ، اللي معاه عيل ينتبه له ، صلي على جمال النبي ،

يتوغل حمادة في الخضم الهادر ،  ليصل الى ألعاب الرفاعية العجيبة ..

هذا يتمنطق بحزمة من الثعابين ، لا يشبع منها لثما ،

وذاك يدخل مسلة طويلة من صدغه الأيمن ليخرجها من صدغة الأيسر ،

 كخيط في ابرة ، دون قطرة دم ،

كما يفعل رفيقه الذي يدخل السيف من بطنه ، ليخرجه من ظهره ،

والآخر يرشق رأسه وجسمه بالمسامير .. يبدون كسحرة فرعون ،

يتناثر حولهم  الدراويش بثيابهم الخضر المتراكمة ، كطبقات الكرنب ، فوق أجسادهم النتنة ،

تغطيها السبح الطويلة الملونة ، واللحى الكثة الشعثاء الغبراء ،

وتعلوها عيونهم الجاحظة المدموغة بالكحل ، الخالية من الورع ،

يتمايلون ويشهقون ..

 مدددددداددددددددددد .. مددددددددددددددددددددداااااددددددددددددددددد ،

تأخذ بعضهم النشوة ، فيتمرغ في التراب ، وسط تاثر البسطاء ، ومصمصة شفاه النسوة ..

يا أمة الإسلالالام ، يا أمة القرآآآآن .. يا أمة التوحيد ...

صلي على جمال النبي ، كل عام وأنتم بخير ،

 الطريقة الشاذلية تهنئكم بالمولد النبوي الشريف ،

ماشييييي بنور الله ، بدعي وأقول يارب ،

صلي على الحبيب قلبك يطيب يا مؤمن ، صلي على جمال النبي يا أبو طارق ،

دكتووور جلال يابركة ، صلي على جمال النبي ، عمي ناجي يامحترم ،

صلي على جمال النبي كل علم وانتم بخير ..

حاسب يابني ، ابن مين الواد ده ..

مدددد يانبي ، يانبي يانبي مددددد ...

حمادة ، واد يا حمادة ..

مين ؟ فؤاد ! انت فين يا أخ فؤاد ؟!

أنا اللي فين ، انت من يوم ما بقيت زعيم ومحدش شايفك ..

على فكرة وأنا جي شفت أبوك بيجيب حلاوة المولد من زقزوق ، إبسط ياعم ،

روح الحق نايبك .. وشوفني بحتة ملبن ،