العَصّارة - الحلقة الثالثة عشرة

يدخل حمادة من الباب ، حاملا لوازم الفطور ، يستقبله صوت أمه وهى تجاهد لأيقاظ أبيه ..

واد ياسونه ، بتكلم مين في البلكونة عندك ، يالا علشان مدرستك ..

أيوه ياماما ، دا عادل بيسأل على حمادة ،

قوله نازل أهه ، ويالا تعالى على سكتي ،

السلام عليكم ، ازيك يا أخ عادل ،

وعليكم السلام ، بالله عليك ياحمادة ، دي ورطة تورطها لي ؟!

ورطة ايه كفاالله الشر ؟!

كلمة الجماعة الإسلامية في الإذاعة النهاردة ، ياراجل ، دا أنا دخت علشان بس أختار الموضوع ،

والله ما عرفت أذاكر ، ولا حتى أنام ،

وماله يا أخ عادل ، كلنا بنتعاون وبنتعلم ،

دلوقتي بس عرفت قيمة موهبتك ، ماشاء الله عليك ،

مقولتليش ، نشاطنا في الجماعة الإسلامية هيقتصر لحد آخر السنة ، على الإذاعة بس ؟!

مش عارف ، انت رأيك ايه ؟!

قول انت ..

والله ، لو حافظنا على اهتمامنا بفترة صلاة الظهر ، مع الإذاعة ،

 أعتقد دا يكون كافي جدا ، ومناسب لدخلة الإمتحانات ،

ودا رأيي برضه ،

إجمع طابور ....

بخمود الحركة والضجيج ، ونشاط الهدوء والصمت ،

وبينما يعلن اليوم الدراسي عن قرب انتهائه ،

ينتبه حمادة من غفوة اعتاد أن يسرقها في الحصص الأخيرة ،

كلما سنحت له الفرصة ،

ليتكأ عليها بقية يومه المشحون دائما ..

محمد يا جميل ، كلم الأستاذ اسماعيل حسونة ،

السلام عليكم ، يا أستاذ اسماعيل ،

تعال يامحمد ، انت ليه ما قولتش كلمة الإذاعة النهاردة ؟!

أبدا يا أستاذ ، حبيت أشرك زملائي ،

طب أشرك أستاذك الأول يا أخي ، ليه مخدتش رأيي في التغيير ده ؟!

آسف يا أستاذ ، فكرت الموضوع عادي ،

ومالقتش غير الواد الغبي اللي اسمه عادل ده ،

 تخليه يتنيل يتكلم في الطابور ، ويعك الدنيا ، ويحرجنا قدام المدير ،

أنواع نجاسات ايه ، وزفت ايه اللي بيتكلم عنها دي ،

 الله يسد نفسه ، زي ما سد نفسنا على الصبح ،

من هنا ورايح حسك عينك حد يقدم الكلمة دي الا أنت ، فاهم ،

والا والله ألغي يوم الإذاعة المخصص للجماعة ده ، واريح دماغي ،

أنا آسف يا أستاذ ، مش هقدر ،

نعم .. هو بمزاجك ؟!  المدير بذات نفسه ، كلمني النهارة ،

بعد الكلمة المرحاضية بتاع الواد الغشيم ده ،

وقال لي ، ثبت جميل النادي في الفقرة دي ،

وكان مبسوط جدا من أداءك في الحفل ، وهيستقبلك في مكتبه ،

مش عايز يا أستاذ ، مش عايز حاجة ، ولاتثبيت ولاتكريم ،

خد هنا يا واد ، بسم الله الرحمن الرحيم ، ايه اللي جرالك ،

ما انت كنت زي الصاروخ ، ماشاء الله عليك ،

مالك ، قوللي ، حد زعلك ، حرنان ليه ؟!

كلامي ونشاطي بيوغر صدور بعض الزملاء ، وبيقولوا ان أنا واكل الجو ، وبستعرض ،

وانهم خايفين عليا من الوقوع في الرياء ،

آه ، كده أنا فهمت ، وطبعا الواد الغبي دا منهم ؟

شوف يا ابني ، انت بسم الله ماشاء الله عليك ، ولد نابه ، وربنا أفاء عليك بمواهب عظيمة ،

فأنت قائد فذ ، لديك براعة نادرة في التجميع والتنظيم ، وخطيب مفوه ، ومتحدث لبق ،

وأجمل مافيك ذكاءك الاجتماعي المبكر النادر ،

 دي يا ابني نعم عظيمة ، سيحاسبك الله عليها ،

فتعهدها في نفسك بالرعاية ونميها بالعلم ، وسخرها لخدمة وطنك ،

ولاتبالي بأصحاب العقول الضحلة ، والعقد الاجتماعية المتأصلة ،

واستعن بالله ولا تعجز ، واخلص نيتك ، وتزود بالتقوى ، واستقم على الطريقة ،

من اليوم فقرة الكلمة الإسبوعية في الإذاعة مسئوليتك ، اتفضل ، مع السلامة  .

السلام عليكم ، ازيك ياعمي ،

أهلا سي حمادة ، وشك ولاالقمر ، بطلت تيجي ليه ؟

معلش كنت بحاول أنظم أموري بين المذاكرة والمحل ،

هيه ، ونظمتها ؟

الحمد لله ، كنت عايز أنجز حاجة النهاردة ، لو فيه شغل ليا يعني ،

بقولك ايه، انت ترسالك على بر ، علشان الشغل اللي هيتركنلك ،

محدش هيعمله الا أنت ، فاهم ،

حاضر ، بس أستأذن في حاجة ،

نعم ،

كنت عايز آخد الكاسيت جنبي وأنا بشتغل ، أسمع عليه شرايط سجلت عليها دروس ،

 أهو أديني أراجع برضه ، وأنا شغال ،

بسيطة دي ، اتفضل خد الكاسيت جنبك ، وخلي توفيق يطلعلك شغل تعمله النهاردة ،

ازيك يا توفيق ، فيه شغل ممكن أعمله النهاردة ؟

خد ، ستة حتت أهم ، توكل على الله ..

طب ممكن من بكرة ان شاء الله ، تعمل حسابي في عشر حتت ،

خف انت ايدك بس ، وربنا يسهل ،

ايه ، خلصت الشغل ،

الحمد لله ، وسلمته لتوفيق ،

كام حته ؟

سته ،

خد حسابك ، وفوت على مراة عمك وانت ماشي ،

حاضر ، انا كنت لسه هستاذن حضرتك ، أفوت على البيت ،

سلام عليكم ،

أهلالالالا ، مش معقول ،

إازيك يا هوبة ،

حمادة ياماما ،

خد تعال هنا ياواد ياحمادة ، أعمل فيك ايه ، هو انت ما تصدق تغطس ،

 مش تيجي ياواد تودنا وتطل علينا ،

والله غصب عني ، ومع ذلك ، أديني جيت أهه ،

خش ، يالا على ما أجيب لك لقمة تاكلها ،

علشان خاطري ، بلاش أكل ، انا عايز حضرتك في موضوع أهم ،

ولا كلمة ، قبل ما تاكل لقمتك ، تقولش جي واكل خروف ياخي ، كل ونتكلم على الأكل ،

يالا ياواد يا ايهاب تعال حط العيش والملاعق  ،

امال نورا فين ؟

في الدرس وزمانها جاية ،

ايه الموضوع المهم قول ،

حضرتك عارفة معزتك عندي ،

دانت في غلاوة العيال دول ، ياما قلبي انفطر عليك ،

بس ماكانش بايدي حيلة ، انت عارف عمك ،

الحمد لله ، اهو مهما كان ، كتر خيره ، المهم حضرتك عارفة الظروف ،

واذا كان فيه عمر ونصيب في الجامعة ، محتاجة تدبير من دلوقتي ،

لأن حتى لو بابا صلح الوضع ، هتبقى الأولوية لجهاز البنات ،

قلبي معاكم والنبي يا ابني ، ان شاء الله ، تتنصف وتروح الجامعة ،

 وربنا يوسع على باباك ويستر البنات ،

قولي بس اقدر اعمل ايه ؟ وانا مش هتاخر ،

ربنا مايحرمني منك ، أنا بحاول أزود انتاجي في المحل ،

علشان أطلع اتنين جنيه على جنب ، بعيد عن ايد ماما ،

عايز حضرتك ، تشوفي لي جمعية ، بحوالي خمسين جنيه في الشهر ،

بحيث لو أقبضها على شهر عشرة الجاي باذن الله ،

أهو تسندني في احتياجات الكلية ، من لبس ، وخلافه ،

من عينيه ، اعتبر الجمعية في ايدك في الوقت الي انت حددته ده ، بس ، طب ومذاكرتك ،

ما تخافيش ، ان شاء الله هنجح وأحقق اللي في دماغي ،

بسم الله ماشاء الله عليك ياحمادة ، من يومك مستقيم وراجل ،

عقبال ما أشوف ايهاب ابني زيك ،

ان شاء الله ، تشوفيه أحسن مني ، يالا متشكرين ، سلام عليكم ، سلموا لي على نورا

ياابني انت مش هتبطل عمايلك دي ، تقدر تقولي كنت فين ؟

كنت في المحل ، وعديت على أم ايهاب ، وبتسلم عليكي ،

الله يسلمها ، طب مش تنبهني قبل ماتنزل الصبح ، ولا تسيبني محتارة كدا ،

وبعدين ايه اللي رجعك المحل ، اعمل معروف ، مش هشيل ذنب نتيجتك آخر السنة ،

معلش ، حقك عليا ، متخافيش ، انا مظبط أموري ، ان شاء الله ، هنصفك ،

مش هتاكل ،

أكلت الحمد لله ، مزنوق ، عايز أجهز لدرس الرياضيات عند الاستاذ مجدي ،

يادوب ألحق أحل التمارين قبل العشاء ما تدن ،

علشان هروح خمس دقايق بعد صلاة العشا مع الشيخ زغبي ،

نعزي الدكتور بشاي في حماته ،

فيك الخير ، بس انتبه لمذاكرتك ،

ادعي لي انتي بس ،

منورنا ياشيخ زغبي ، انت وحمادة ، متشكرين أوي ،

دا نورك يادكتور ، كفاية أبونا باسيلي مشرف الحتة كلها ، متشكر يا شيخنا ،
 دا من أصلك ،

 معلش اتاخرنا ، الله يقدس روح الست تريزا ، كانت نسمة طيبة في دنيتنا،

أبونا باسيلي ، الشاب الصغير الجميل ده ، حمادة ، ابننا ،

ولد متدين ومؤدب ، ريحانة الحي ،

جده الحاج جميل النادي الله يرحمه ،

معقول ؟ أهلا يا ابني ، الحاج جميل ، قل أن يجود الزمان بمثله ،

 كنت لما اروح له الورشة ، في شغل للكنيسة ،

كان يقوم يجري يرحب بيا ، ويهتم ويشرف على كل حاجة بنفسه ،

 لحد ما تتعمل باسرع وقت ، واعلى مستوى ،

ويرفض بشدة انه ياخد اي مصنعية ، حتى بقشيش العمال ،

ويقولي ، زي ما بعمل للجامع أعمل للكنيسة ، كلها بيوت ربنا ، الله يرحمه ،

فاكر يا شيخ زغبي حكاية المحكمة ، أكيد سمعتها من الحاج جميل ،

طبعا ، كان بيحب دايما يحكيها ، ويفخر بيها ،

من حوالي عشرين سنة ، كان جامع سيدي أبو الحسن الكبير ده ،

عبارة عن زاوية أو مصلى ، في ركن من ساحة السوق الممتدة أمام الكنيسة ،

لحد ما نشأت فكرة تكبير المصلى بمساحة السوق كله ،

 ليضاهي الكنيسة ، بل ويتفوق عليها ،

وبالفعل تسابق الجميع ، وبادر أصحاب الورش والمحلات بالتنازل عن أماكنهم ،

عن طيب خاطر لصالح توسعة الجامع،

وكان الحاج جميل على رأس من فعلوا ذلك ، اتنازل عن ورشته ،

وراح خد ورشة كبيرة في شارع الخديوي ..

خدوا بالكو ، ابونا باسيلي بيحكي تاريخ عظيم ،

بالضبط يا شيخ زغبي ، المفروض الكلام اللي هقوله ده ، يتسطر في كتب التاريخ ،

المهم تسابق الجميع ، ليخرج المسجد في أبهى وأفخم صورة ،

 وليشكل مع الكنيسة لوحة رائعة ، تزهو بها مدينتنا ،

لكن سرعان ماتعالت أصوات من الكنيسة ، تبدي أستياءها من لغوشة ميكرفون الأذان ،

قابلها على الطرف الآخر أصوات أبدت ضيقا من تشويش دق الأجراس !

حتى وصل الأمر الى المحكمة ، جماعتنا احتجوا بأن الكنيسة
 سابقة في المكان على الجامع ،

وأخواننا من أهل الجامع ردوا بأن هذه بلاد المسلمين ، يفعلون بها مايشاءون ،

ثم أين صوت الأذان العذب الخاشع ، من قرع الأجراس المزعج الصادم ؟

احتدم الخلاف ، وتعالت الصيحات وتكهرب الجو ، حتى بدت الحيرة على وجه القاضي ،

ليخترق هذا كله ، رجل يهب واقفا كسد منيع في طريق الفتنة ،

كطود شامخ في وجه الطوفان ،

يندفع المعلم جميل النادي نحو المنصة ، بقامته المهيبة ،

وصوته الجهوري الحاسم ، مستئذنا القاضي في الكلام ،

فياذن له القاضي ، ليقول قولة تكتب بحروف من نور ،

حتى ابكت ابونا باخوم ، وقد كان جالسا الى جواري ،

بل وكثيرين في قاعة المحكمة أيضا ، قال بصوت مؤثر جدا :

يا جناب القاضي ،

 مش هيفضل من خير البلد دي حاجة ، و هيتخلى عنها ربنا ،

ان ماكانش الادان يدن ، والجرس يدق !

لم يبدد صمت الخجل الذي عم المكان ، الا كلام القاضي الحاسم ،

برفض الدعاوى ، وتنبيه طرفي النزاع :

اتوكلوا على الله ، واتوحدوا ، واعبدوا ربنا بحب ، فالله محبة !

رجعنا كلنا مع بعض لحد ما وصلنا السوق ، سلمنا على بعض ،

فبادر الحاج جميل النادي ، بعد استئذان الشيخ رجب امام الجامع .. قائلا :

احنا من ناحيتنا هنوجه الميكرفون الجهة التانية ، ونضبط صوته بحيث ما يعملش دوشة ،

رد أبونا باخوم وقال لي ، يا باسيلي ، مفيش جرس ساعة الآذان ،

 أو وقت الفريضة عند اخواننا في الجامع ..

ماتدقش الأجراس ، إلا لما يخلصوا !

يفشل حمادة في مقاومة دموعه ، فيغمز للشيخ زغبي ، ليستاذنا ،

تصحبهما عبارات إمتنان الدكتور بشاي على السلالم ،  يودع حمادة الشيخ زغبي ،

تغشاه مشاعر مختلطة من الإمتنان لجده ، الذي لو انصف التاريخ ،

 لخصص له صفحة بهذا الموقف وحده ،

والحنين إليه ، وتنسم عبير ذكراه ،

بينما ينطلق مسرعا ليلحق بدرس الرياضيات ..

إزيك يا حمادة ، إتأخرت ليه على الحصة ، مش عوايدك ،

آسف يا أستاذ ، كان عندي مشوار عزا ، ست مسنة جارتنا ،

طب خش حل تمارين مع زملائك .. على فكرة ، الله ينور عليك ، الحفلة أدهشت الجميع ..

آه ، وكمان الأستاذ عاطف الغويط ، عايزك تفوت عليه وانت نازل ،

ياللا ، توكل على الله ، حل معاهم التمارين دي ، و تعال لي ..

الأستاذ عاطف موجود ،

نقوله مين ؟

محمد جميل النادي ،

اتفضل ، أهلا يا أخ محمد ، ابن حلال ،

كنت في انتظارك أنا و الأخ رائد ، علشان أعرفكو ببعض ،

الأخ رائد البسيوني ، رئيس اتحاد طلاب كلية الصيدلة ،

بدا رائد لحمادة ، من أول وهلة ، شابا ربعا ، متوسط الطول ، عريض الصدر ،

مدور الوجه ، ابيضه ، كأنما قد من جبس ، لخلوه من اية انطباعات ،

واسع العينين أسودهما ، كشعره الفاحم ولحيته الكثة ، وحاجبيه الكثيفين ،

يجلس حاملا بيده كتابا ، ينظر بعيني من يتفرد بفهم مالا يفهمه غيره ،

أو يقوم بعمل ربما لايقدرعليه أحد سواه ،

من آن لآخر يبدي لحمادة ابتسامة باهتة ، كلون ثوب قديم ،

أهلا يا أخ رائد ، أنا محمد جميل النادي ، ثانوية عامة ،

ليكمل حمادة جلسته صمتا ، متحيرا من شعور غريب اجتاحه بعدم الارتياح لهذا الشخص ،

فلم يجرب على احساسه كذبا قط ، فهو شديد الحساسية للانطباعات الاولى ،

هيه يا أخ محمد ، عامل ايه في المذاكرة ، باين عليك مرهق ،

الحمد لله ، أنا مرهق كده على طول ،

الأخ حمادة ، ماشاء الله عليه ، شعلة نشاط ، بيشتغل وبيذاكر ، ومجتهد ،

مدرسته الضخمة العريقة ، كانت خامدة كأسد عجوز في قفص ،

فنفخ فيها الروح ، بهمتة ونشاطه وذكاءه ،

واقام فيها عملا جميلا ومنظما ،

أجرى الدم في عروق زملاؤه ، وادهش الجميع .. الأستاذ عاطف متحدثا بفخر !

انت معجب بالأخوان يا محمد ؟!

حمادة ، مندهشا من صلف رائد ، وتجاهله التام لما حكاه الأستاذ عاطف ..

وبينما تقفز الى مخيلته كلمات صديقه فؤاد ، والشيخ زغبي ، يرد :

يعني ، لسه بحاول أفهمهم ، أنا معجب ببعض أفكار الشيخ حسن البنا ،

 لكن معرفش مدى صلتها بالواقع  ،

رائد البسيوني ، محاولا إخفاء اندهاشه من جرأة حمادة ، وتعامله بندية ، وإعتداده بنفسه ..

طيب ياسيدي ، تعال إنت وزملاءك زورونا في الجامعة ، ونتعارف أكتر ، يمكن نعجبك ..

هحاول ، إن شاء الله ، بس الإمتحانات على الأبواب ، ربنا يسهل ،
 استاذن ، سلام عليكم ،

يخرج حمادة من بيت الأستاذ عاطف الغويط ،

ليجد نسمات مارس المنعشة بانتظاره ، لترافقه الي البيت ،

حتى تدخله الي بيتهم ، فيصادف سلوى على السلم ، بتلهف تسأله :

وصلك الشريط ؟!

ايوه طبعا ، شكرا ،

وايه رأيك ؟!

رائع ، إستفدت منه جدا ،

وبعدين ..

ولاحاجة ، لاصوت يعلو على صوت المذاكرة الآن ،

يعني نعطل قلوبنا ؟!

بالعكس ، نشغلها على الآخر .. بس مع ربنا ،

نتوجه اليه يالإستغفار ، وتلح عليه بطلب العون ،

تصبحي على خير ..

يصل حمادة الليل بالنهار ، العمل بالمذاكرة ، الأمل بالرجاء ..

يكاد يسقط من الإعياء ، كي يقطع شوطا على طريقه الوعر ، الطويل ، المضني ،

ليصل الي احدى محطاته المصيرية ، بظهور نتيجته المشرفة ..

التي فجرت ينابيع السعادة في قلب امه ، حتى أغشي عليها من شدة الفرح ،

وأعادت الروح الى قلب أبيه ، الذي انتعش من شدة الزهو ،

وأعادت الأنوار الى البيت ، وذكرت الأحبة بعنوانه ، فأتوه من كل حدب وصوب ،

بالسكر وشربات الورد ، والنقوط السخية ، ورنين الزغاريد ..

أول مرة في حياته يسمع في بيتهم زغاريد ، كم سمع وحفظ من أغان ، وأحبها وطرب لها ،

ليأتي نغم زغاريد يوم نجاحه ، يتردد صداه في بيتهم ، فينسخ كل ما سمع من أنغام ،

إلا صوت العندليب ، حليم ، رفيقه منذ الطفولة ، عاد اليه اليوم ،

بعد طول غياب ، ليصدح ، هاتفا ، الناجح يرفع إيده ..

بدت أمه ملونه بكل ألوان الفرح ، وكأنها دخلت الجنة ، وترتع في رياضها ،

وجهها الأحمر توهج وضاءا حنونا ، كشمس الشتاء ،

علا صوتها ، لعلعت ضحكاتها ، زالت أوجاعها ،

دبت فيها روح عروس ، طال انتظار عرسها ،

وغشيتها نشوة قائد حقق نصرا مؤزرا ، لاسيما بعد أن اكد لها الجميع ،

وعلى راسهم المهندس محسن ،  شقيق سلوى ،

أن مجموع حمادة سيدخله كلية الهندسة مستريح ، باذن الله ،

لم يعد في البيت موطأ قدم ، جدته وشقيقاتها ، خالات أبيه ، نينة عطيات ، ونينة فوزية،

اللائي يذوب فيهن حبا ، من فرط ماذاق من حنان في حجرهن صغيرا ،

جئن فرحات مزغردات ، ليسبح في أحضانهن ، وقبلاتهن ،

ويتبرك بدعائهن ، ونقوطهن السخية ،

وأعمامه ، وزوجات أعمامه ، وأبنائهم ، وخاله الوحيد ، وخالاته ، وابناؤهم ،

مبروك ، ألف مبروك ياحسين يا اخويا ، عقبال ما تفرح بالبنات ،

الله يبارك فيك يا منعم ، منور ياماهر ، صحتك عاملة ايه ؟ الحمد لله ، نحمده ،

بابا ، كلم ، الدكتور بشاي ، على الباب ،

مساء الخير ، مبروك يا معلم حسين ،

يا ألف مرحبا ، خطوة عزيزة يا دكتور ، الله يبارك فيك ، اتفضل ،

الله ، دا كل الناس الطيبين هنا ، مساء الخير ياجماعة ، مبروك لحمادة ،

يسعد مساك يادكتور ، اتفضل استريح هنا ، الشربات يا بنات ،

في الحقيقة يا جماعة ، حمادة ابننا ، مثال للإبن البار ، المستقيم المجتهد ،

لم يكد الدكتور بشاي يكمل كلامه ، حتى أجهش أبو حمادة بالبكاء ،

إيه يامعلم حسين ، أنا آسف ان كنت قلت حاجة ضايقتك ،

العفو يادكتور ، دي دموع فرح ، وحد الله ياحسين ياأخويا ،

سيبني يا منعم  ، مش عارف هعمل ايه للواد علشان يسامحني ،

تخليت عنه ، ودوخته ورايا في القهاوي ، وفي الآخر طلع نفسه مهندس ،

بعلو نشيج أبي حمادة ، يتكوم الجميع فوقه .. والنبي دا كلام ، حد يقول كده ،

هو له بركة إلا انت ، دا روحه فيك ،

وبعدين هو ربنا وفقه إلا ببركة دعاك له ، ورضاك عنه ،

فعلا يامعلم حسين ، حمادة بيحبك وبيحترمك ، ما تزعلناش في لحظة حلوة زي دي ،

ماتسمعونا زغرودة ياجماعة ، واد يا سونة ،

 قول للستات الي ماليين البيت دول ، يهيصوا شوية ،

قولهم عمي منعم عايز رقص وطبل وزمر ، روح إجري ، أمال ،

 أفرح ياحسين بضناك ووحد الله ياراجل ،

جارات أم حمادة ، حبيباتها ، و صويحباتها ،

اللائي يجمعهن بها البياض البض ، والنظافة والشطارة ،

يتناثرن حولها ، كالبط الشهرمان ، خفة ودلالا ،

يتبارين في إظهار الحب لها  ،والفرح لفرحها ،

بموجات متتابعة من الزغاريد الضاحكة ، والضحكات المزغردة ،

وبالقيام بخدمة الضيوف ،

يهرع لصلاة العصر ، متلهفا للقاء الشيخ زغبي ليبشره ،

فيتلقفه الشيخ بالباب ، محتضنا  يقبل راسه ، فيتعلق بعنقه الطويلة ، باكيا بحرقة ..

تعبت يامولانا ، نجحت يامولانا ،

فيصحبه الي غرفة مكتبه ، مرددا ، حاشا لله ، أن يضيع أجر من أحسن عملا ،

ويخر ساجدا شكرا لله ، فيتبعه حمادة ، ليبلل السجادة بدموع فرحه وامتنانه لله ،

يصل جواب مكتب التنسيق ، ليؤكد توقعات الدكتور بشاي ،
 بترشيح حمادة لكلية الهندسة ،

فتنشط الأفراح من جديد ، لتعلن أتها ستستمر ، في بقية الرحلة .. مهما كانت العقبات !

بعد جولة لحمادة على أخوانه ، وزملائه ، تبادلا فيها التهاني ،

فعادل الزيني ذهب الي كلية التربية ، والأطروش للتجارة ،

وأحمد عرجان للهندسة ، ونادر جورج للفنون الجميلة ..

يعود الي البيت الذي يلفه صمت ما بعد الفرح ، ليجد أمه مستلقية
 على كنبتها في البلكونة ،

يجلس قبالتها متمتما ، أخيرا سانفرد بشريك الكفاح ، واي كفاح يا أمي ،

يهمس محييا ، فتصحو كعادتها ،

انت جيت ياضنايا ، تعال الحق أمك ،

خير ياماما ، كفى الله الشر ،

ابدا ، خلصت الزيطة ، والفكر ركبني ،

فكر ايه ؟!

يعني ما انتش عارف ، الكلية وطلباتها ،

وحدي الله انتي بس ، من هنا ورايح ، تفرحي وبس ، هم وغم ، ممنوع ،

والله ما هيهنالي بال ، الا ما اطمن عليك ، ونستر أخواتك ، وافرح بعيالك ،

والله انت طماعة و اروبة ياماما ، هتعيشي دا كله ،

عايزني أموت ياحمادة ،

بعيد الشر ، انا بخزي عنك العين ، يانور العين ،

طب دا أنا ، حسبت كل النقوط طلعوا ربعمية جنيه ،

وفيه جمعية صغيرة عاملها مع طنط عايدة ، علشان الكلية ، هقبضها الشهر الجاي بمتين جنيه ،

يعني ستمية جنيه ، ياست الكل ،

طيب ، وحطي عليهم ستمية كمان ،

منين ؟

من الجمعية اللي انا عاملها ،

لاهو أنت عامل جمعية ، منين ؟

أي زيادة من المحل ، طنط أم ايهاب ، كانت بتحوشهالي ،

لااله الا الله ، والنبي باابني ، ما انا عارفة أقولك ايه ، ولا أكافئك ازاي ،

أنا ماحلتيش غير رضايا عنك ودعايا ليك ، بس تسامحني ،

بلاش دراما الله يخليكي ، خلينا نحسب الحسبة ،

كده المجموع ، الف ومتين جنيه ، انا هحتاج بالكتير أوي ربعمية جنيه ،

ودول هيكفوك ياحمادة ،

ان شاء الله ، دول ينغنغوني ،

انا محتاج ايه غير شوية لبس ، وبعد كده ، ان شاء الله ، هوفر طلباتي من شغلي ،

والباقي نفتح بيه ، دفترين توفير للبنات ، كل واحدة ربعمية جنيه ،

وأي قرش ممكن نوفره ، نحطهلهم في دفتر التوفير ..

روح ، الهي ما يخيب لك رجا يابن قلبي ، يارب ، زي ما بتفرج همي كل مرة ،

سبحان من أعطاك سحر لتفريج الهموم ، روح ربنا يحميك ، عيني عليك باردة ياحمادة !