تذكر دائما..

1.    أن تجعل ضميرك  ، وخوفك من الله ، ومصلحة وطنك العليا ، فوق أي إعتبار كان ، سواء عصبية أو حزب أو إنتصار لنفس أو إعجاب بشخص .. كائنا من كان .

2.   أن تتجرد وتنكر ذاتك ، وأن تكف عن الدفاع المستميت عن أفكارك ، وأن تتعلم الإنصات الجيد الخلوق للناس ، كل الناس ، ولتكن كفة الكلام عندك نصف كفة العمل . 

3.   أن  تتخلص من وبال النرجسية  والتعالي ، والإعتقاد بأنك تحتكر الحقيقة ، وأن الآخرين جهلة رعاع ، فالتواضع وخفض الجناح ولين الجانب ، جسور إلى قلوب الناس .

4.   أن تجعل محبة الناس هدفا لك ، بصرف النظر عن الإتفاق أوالإختلاف معهم ، فالخلاف لايفسد للود قضية ، وصناعة الحب كبيرة ، إلا على الخاشعين ، فلتثابر فى طلبها وتصبر على ذلك ، وتبذل من أجله ،  ولتسلك كل السبل لكسب القلوب ، فلا تدع فرصة لإسقاط قطرة حب صافية فى قلب أحد إلا اقتنصتها ، مهما كان مختلفا عنك أو مخالفا لك ، اجعل هدفك المشاركة فى بناء أكبر خيمة للحب يستظل بها أبناء وطنك ، واربأ بنفسك أن تنسل حبلا أراده الله أن يكون متينا ، فأرتمى فى حضن مصر وأهلها ، لاتفرق بين أحد منهم.

5.   أن تجعل من لباقتك إطارا جميلا لعرض أفكارك ، فالنبى محمد صلوات الله عليه ، كان أجمل من الجمال ، أنظف من النظافة ، أطيب من العطر ، أنصع من الشمس ، أسهل من الماء ، فأسلك دربه ، وانسج على منواله ، وحاكيه فى تأنقه وجماله وجلاله . 

6.   أن تبذل جهدا فى التحقق والإطلاع ، والمتابعة الدقيقة الواعية لمجريات الأحداث ، ما استطعت الى ذلك سبيلا ، و أن تتواصل مع كافة الإتجاهات والأفكار، بمعزل عن إتفاقك أوإختلافك معها، ولترتقى بمستوى حديثك وإدارتك للنقاش ، ولاتنحدر لبذاءة الصغار أبدا . 

7.   أن تهتم بالتفاصيل ، فلا تتردد فى إلقاء التحية على كل أحد ، ولتخاطب الناس باللقب الذى يشعرهم بالإحترام والتقدير ، ولا تهمل (من فضلك) قبل كل تعامل و(شكرا) بعد أى تعامل مع الجميع .. الباعة ، سائقي التاكسي ، الموظف فى مكتبه ، شرطى المرور ، حتى الأطفال ، أرفق بهم وأحدب عليهم ، إحرص دائما على أن تترك أطيب إنطباع  . 

  

8.   أن تجعل من نفسك جهازا إعلاميا لصالح وطنك ، فلا تدخر جهدا لدحض الأضاليل والأكاذيب ، ونشر الوعى الوطني ، ليس بالدفاع العاطفى المتحيز ، بل بالعقل والموضوعية ، فى محيط الأصدقاء و الأقارب والجيران وزملاء الدراسة والعمل ، فى المواصلات العامة والأسواق ، فى المداخلات الإعلامية وفى الرد على الصحف ، لاتهدأ ولا تصمت ، ولتكن عدتك  الثقافة والإلمام بالموضوع ، وعقلك الذكى وصدرك الرحب ونفسك الطويل ، وما أعظمها من أدوات.

9.  أن تجيد التجاهل كما أجدت الإهتمام ، فلا تدع أعداء وطنك من المضللين الكاذبين الحاقدين ، وأبواقهم المفضوحة ، يحددون ويفرضون أخبارهم ، مايجب منها أن يذيع و ينتشر ومايجب أن يوأد وينحسر ، بل افعل العكس ، فى الأوساط التى تنشط فيها ، افرض حصارا على أراجيفهم ، وأضرب عليها سياجا من النسيان والتجاهل فلا تساهم فى إشاعتها وترويجها بكثرة الكلام حولها .

10.  أنه لاقيمة لأي إدعاء بالوطنية والتغني بحب الوطن ، دون عمل وإنتاج ، وبناء وإعمار ، وإعلاء للقيم وإحترام للقوانين .

العَصّارة - الحلقة الثالثة عشرة

يدخل حمادة من الباب ، حاملا لوازم الفطور ، يستقبله صوت أمه وهى تجاهد لأيقاظ أبيه ..

واد ياسونه ، بتكلم مين في البلكونة عندك ، يالا علشان مدرستك ..

أيوه ياماما ، دا عادل بيسأل على حمادة ،

قوله نازل أهه ، ويالا تعالى على سكتي ،

السلام عليكم ، ازيك يا أخ عادل ،

وعليكم السلام ، بالله عليك ياحمادة ، دي ورطة تورطها لي ؟!

ورطة ايه كفاالله الشر ؟!

كلمة الجماعة الإسلامية في الإذاعة النهاردة ، ياراجل ، دا أنا دخت علشان بس أختار الموضوع ،

والله ما عرفت أذاكر ، ولا حتى أنام ،

وماله يا أخ عادل ، كلنا بنتعاون وبنتعلم ،

دلوقتي بس عرفت قيمة موهبتك ، ماشاء الله عليك ،

مقولتليش ، نشاطنا في الجماعة الإسلامية هيقتصر لحد آخر السنة ، على الإذاعة بس ؟!

مش عارف ، انت رأيك ايه ؟!

قول انت ..

والله ، لو حافظنا على اهتمامنا بفترة صلاة الظهر ، مع الإذاعة ،

 أعتقد دا يكون كافي جدا ، ومناسب لدخلة الإمتحانات ،

ودا رأيي برضه ،

إجمع طابور ....

بخمود الحركة والضجيج ، ونشاط الهدوء والصمت ،

وبينما يعلن اليوم الدراسي عن قرب انتهائه ،

ينتبه حمادة من غفوة اعتاد أن يسرقها في الحصص الأخيرة ،

كلما سنحت له الفرصة ،

ليتكأ عليها بقية يومه المشحون دائما ..

محمد يا جميل ، كلم الأستاذ اسماعيل حسونة ،

السلام عليكم ، يا أستاذ اسماعيل ،

تعال يامحمد ، انت ليه ما قولتش كلمة الإذاعة النهاردة ؟!

أبدا يا أستاذ ، حبيت أشرك زملائي ،

طب أشرك أستاذك الأول يا أخي ، ليه مخدتش رأيي في التغيير ده ؟!

آسف يا أستاذ ، فكرت الموضوع عادي ،

ومالقتش غير الواد الغبي اللي اسمه عادل ده ،

 تخليه يتنيل يتكلم في الطابور ، ويعك الدنيا ، ويحرجنا قدام المدير ،

أنواع نجاسات ايه ، وزفت ايه اللي بيتكلم عنها دي ،

 الله يسد نفسه ، زي ما سد نفسنا على الصبح ،

من هنا ورايح حسك عينك حد يقدم الكلمة دي الا أنت ، فاهم ،

والا والله ألغي يوم الإذاعة المخصص للجماعة ده ، واريح دماغي ،

أنا آسف يا أستاذ ، مش هقدر ،

نعم .. هو بمزاجك ؟!  المدير بذات نفسه ، كلمني النهارة ،

بعد الكلمة المرحاضية بتاع الواد الغشيم ده ،

وقال لي ، ثبت جميل النادي في الفقرة دي ،

وكان مبسوط جدا من أداءك في الحفل ، وهيستقبلك في مكتبه ،

مش عايز يا أستاذ ، مش عايز حاجة ، ولاتثبيت ولاتكريم ،

خد هنا يا واد ، بسم الله الرحمن الرحيم ، ايه اللي جرالك ،

ما انت كنت زي الصاروخ ، ماشاء الله عليك ،

مالك ، قوللي ، حد زعلك ، حرنان ليه ؟!

كلامي ونشاطي بيوغر صدور بعض الزملاء ، وبيقولوا ان أنا واكل الجو ، وبستعرض ،

وانهم خايفين عليا من الوقوع في الرياء ،

آه ، كده أنا فهمت ، وطبعا الواد الغبي دا منهم ؟

شوف يا ابني ، انت بسم الله ماشاء الله عليك ، ولد نابه ، وربنا أفاء عليك بمواهب عظيمة ،

فأنت قائد فذ ، لديك براعة نادرة في التجميع والتنظيم ، وخطيب مفوه ، ومتحدث لبق ،

وأجمل مافيك ذكاءك الاجتماعي المبكر النادر ،

 دي يا ابني نعم عظيمة ، سيحاسبك الله عليها ،

فتعهدها في نفسك بالرعاية ونميها بالعلم ، وسخرها لخدمة وطنك ،

ولاتبالي بأصحاب العقول الضحلة ، والعقد الاجتماعية المتأصلة ،

واستعن بالله ولا تعجز ، واخلص نيتك ، وتزود بالتقوى ، واستقم على الطريقة ،

من اليوم فقرة الكلمة الإسبوعية في الإذاعة مسئوليتك ، اتفضل ، مع السلامة  .

السلام عليكم ، ازيك ياعمي ،

أهلا سي حمادة ، وشك ولاالقمر ، بطلت تيجي ليه ؟

معلش كنت بحاول أنظم أموري بين المذاكرة والمحل ،

هيه ، ونظمتها ؟

الحمد لله ، كنت عايز أنجز حاجة النهاردة ، لو فيه شغل ليا يعني ،

بقولك ايه، انت ترسالك على بر ، علشان الشغل اللي هيتركنلك ،

محدش هيعمله الا أنت ، فاهم ،

حاضر ، بس أستأذن في حاجة ،

نعم ،

كنت عايز آخد الكاسيت جنبي وأنا بشتغل ، أسمع عليه شرايط سجلت عليها دروس ،

 أهو أديني أراجع برضه ، وأنا شغال ،

بسيطة دي ، اتفضل خد الكاسيت جنبك ، وخلي توفيق يطلعلك شغل تعمله النهاردة ،

ازيك يا توفيق ، فيه شغل ممكن أعمله النهاردة ؟

خد ، ستة حتت أهم ، توكل على الله ..

طب ممكن من بكرة ان شاء الله ، تعمل حسابي في عشر حتت ،

خف انت ايدك بس ، وربنا يسهل ،

ايه ، خلصت الشغل ،

الحمد لله ، وسلمته لتوفيق ،

كام حته ؟

سته ،

خد حسابك ، وفوت على مراة عمك وانت ماشي ،

حاضر ، انا كنت لسه هستاذن حضرتك ، أفوت على البيت ،

سلام عليكم ،

أهلالالالا ، مش معقول ،

إازيك يا هوبة ،

حمادة ياماما ،

خد تعال هنا ياواد ياحمادة ، أعمل فيك ايه ، هو انت ما تصدق تغطس ،

 مش تيجي ياواد تودنا وتطل علينا ،

والله غصب عني ، ومع ذلك ، أديني جيت أهه ،

خش ، يالا على ما أجيب لك لقمة تاكلها ،

علشان خاطري ، بلاش أكل ، انا عايز حضرتك في موضوع أهم ،

ولا كلمة ، قبل ما تاكل لقمتك ، تقولش جي واكل خروف ياخي ، كل ونتكلم على الأكل ،

يالا ياواد يا ايهاب تعال حط العيش والملاعق  ،

امال نورا فين ؟

في الدرس وزمانها جاية ،

ايه الموضوع المهم قول ،

حضرتك عارفة معزتك عندي ،

دانت في غلاوة العيال دول ، ياما قلبي انفطر عليك ،

بس ماكانش بايدي حيلة ، انت عارف عمك ،

الحمد لله ، اهو مهما كان ، كتر خيره ، المهم حضرتك عارفة الظروف ،

واذا كان فيه عمر ونصيب في الجامعة ، محتاجة تدبير من دلوقتي ،

لأن حتى لو بابا صلح الوضع ، هتبقى الأولوية لجهاز البنات ،

قلبي معاكم والنبي يا ابني ، ان شاء الله ، تتنصف وتروح الجامعة ،

 وربنا يوسع على باباك ويستر البنات ،

قولي بس اقدر اعمل ايه ؟ وانا مش هتاخر ،

ربنا مايحرمني منك ، أنا بحاول أزود انتاجي في المحل ،

علشان أطلع اتنين جنيه على جنب ، بعيد عن ايد ماما ،

عايز حضرتك ، تشوفي لي جمعية ، بحوالي خمسين جنيه في الشهر ،

بحيث لو أقبضها على شهر عشرة الجاي باذن الله ،

أهو تسندني في احتياجات الكلية ، من لبس ، وخلافه ،

من عينيه ، اعتبر الجمعية في ايدك في الوقت الي انت حددته ده ، بس ، طب ومذاكرتك ،

ما تخافيش ، ان شاء الله هنجح وأحقق اللي في دماغي ،

بسم الله ماشاء الله عليك ياحمادة ، من يومك مستقيم وراجل ،

عقبال ما أشوف ايهاب ابني زيك ،

ان شاء الله ، تشوفيه أحسن مني ، يالا متشكرين ، سلام عليكم ، سلموا لي على نورا

ياابني انت مش هتبطل عمايلك دي ، تقدر تقولي كنت فين ؟

كنت في المحل ، وعديت على أم ايهاب ، وبتسلم عليكي ،

الله يسلمها ، طب مش تنبهني قبل ماتنزل الصبح ، ولا تسيبني محتارة كدا ،

وبعدين ايه اللي رجعك المحل ، اعمل معروف ، مش هشيل ذنب نتيجتك آخر السنة ،

معلش ، حقك عليا ، متخافيش ، انا مظبط أموري ، ان شاء الله ، هنصفك ،

مش هتاكل ،

أكلت الحمد لله ، مزنوق ، عايز أجهز لدرس الرياضيات عند الاستاذ مجدي ،

يادوب ألحق أحل التمارين قبل العشاء ما تدن ،

علشان هروح خمس دقايق بعد صلاة العشا مع الشيخ زغبي ،

نعزي الدكتور بشاي في حماته ،

فيك الخير ، بس انتبه لمذاكرتك ،

ادعي لي انتي بس ،

منورنا ياشيخ زغبي ، انت وحمادة ، متشكرين أوي ،

دا نورك يادكتور ، كفاية أبونا باسيلي مشرف الحتة كلها ، متشكر يا شيخنا ،
 دا من أصلك ،

 معلش اتاخرنا ، الله يقدس روح الست تريزا ، كانت نسمة طيبة في دنيتنا،

أبونا باسيلي ، الشاب الصغير الجميل ده ، حمادة ، ابننا ،

ولد متدين ومؤدب ، ريحانة الحي ،

جده الحاج جميل النادي الله يرحمه ،

معقول ؟ أهلا يا ابني ، الحاج جميل ، قل أن يجود الزمان بمثله ،

 كنت لما اروح له الورشة ، في شغل للكنيسة ،

كان يقوم يجري يرحب بيا ، ويهتم ويشرف على كل حاجة بنفسه ،

 لحد ما تتعمل باسرع وقت ، واعلى مستوى ،

ويرفض بشدة انه ياخد اي مصنعية ، حتى بقشيش العمال ،

ويقولي ، زي ما بعمل للجامع أعمل للكنيسة ، كلها بيوت ربنا ، الله يرحمه ،

فاكر يا شيخ زغبي حكاية المحكمة ، أكيد سمعتها من الحاج جميل ،

طبعا ، كان بيحب دايما يحكيها ، ويفخر بيها ،

من حوالي عشرين سنة ، كان جامع سيدي أبو الحسن الكبير ده ،

عبارة عن زاوية أو مصلى ، في ركن من ساحة السوق الممتدة أمام الكنيسة ،

لحد ما نشأت فكرة تكبير المصلى بمساحة السوق كله ،

 ليضاهي الكنيسة ، بل ويتفوق عليها ،

وبالفعل تسابق الجميع ، وبادر أصحاب الورش والمحلات بالتنازل عن أماكنهم ،

عن طيب خاطر لصالح توسعة الجامع،

وكان الحاج جميل على رأس من فعلوا ذلك ، اتنازل عن ورشته ،

وراح خد ورشة كبيرة في شارع الخديوي ..

خدوا بالكو ، ابونا باسيلي بيحكي تاريخ عظيم ،

بالضبط يا شيخ زغبي ، المفروض الكلام اللي هقوله ده ، يتسطر في كتب التاريخ ،

المهم تسابق الجميع ، ليخرج المسجد في أبهى وأفخم صورة ،

 وليشكل مع الكنيسة لوحة رائعة ، تزهو بها مدينتنا ،

لكن سرعان ماتعالت أصوات من الكنيسة ، تبدي أستياءها من لغوشة ميكرفون الأذان ،

قابلها على الطرف الآخر أصوات أبدت ضيقا من تشويش دق الأجراس !

حتى وصل الأمر الى المحكمة ، جماعتنا احتجوا بأن الكنيسة
 سابقة في المكان على الجامع ،

وأخواننا من أهل الجامع ردوا بأن هذه بلاد المسلمين ، يفعلون بها مايشاءون ،

ثم أين صوت الأذان العذب الخاشع ، من قرع الأجراس المزعج الصادم ؟

احتدم الخلاف ، وتعالت الصيحات وتكهرب الجو ، حتى بدت الحيرة على وجه القاضي ،

ليخترق هذا كله ، رجل يهب واقفا كسد منيع في طريق الفتنة ،

كطود شامخ في وجه الطوفان ،

يندفع المعلم جميل النادي نحو المنصة ، بقامته المهيبة ،

وصوته الجهوري الحاسم ، مستئذنا القاضي في الكلام ،

فياذن له القاضي ، ليقول قولة تكتب بحروف من نور ،

حتى ابكت ابونا باخوم ، وقد كان جالسا الى جواري ،

بل وكثيرين في قاعة المحكمة أيضا ، قال بصوت مؤثر جدا :

يا جناب القاضي ،

 مش هيفضل من خير البلد دي حاجة ، و هيتخلى عنها ربنا ،

ان ماكانش الادان يدن ، والجرس يدق !

لم يبدد صمت الخجل الذي عم المكان ، الا كلام القاضي الحاسم ،

برفض الدعاوى ، وتنبيه طرفي النزاع :

اتوكلوا على الله ، واتوحدوا ، واعبدوا ربنا بحب ، فالله محبة !

رجعنا كلنا مع بعض لحد ما وصلنا السوق ، سلمنا على بعض ،

فبادر الحاج جميل النادي ، بعد استئذان الشيخ رجب امام الجامع .. قائلا :

احنا من ناحيتنا هنوجه الميكرفون الجهة التانية ، ونضبط صوته بحيث ما يعملش دوشة ،

رد أبونا باخوم وقال لي ، يا باسيلي ، مفيش جرس ساعة الآذان ،

 أو وقت الفريضة عند اخواننا في الجامع ..

ماتدقش الأجراس ، إلا لما يخلصوا !

يفشل حمادة في مقاومة دموعه ، فيغمز للشيخ زغبي ، ليستاذنا ،

تصحبهما عبارات إمتنان الدكتور بشاي على السلالم ،  يودع حمادة الشيخ زغبي ،

تغشاه مشاعر مختلطة من الإمتنان لجده ، الذي لو انصف التاريخ ،

 لخصص له صفحة بهذا الموقف وحده ،

والحنين إليه ، وتنسم عبير ذكراه ،

بينما ينطلق مسرعا ليلحق بدرس الرياضيات ..

إزيك يا حمادة ، إتأخرت ليه على الحصة ، مش عوايدك ،

آسف يا أستاذ ، كان عندي مشوار عزا ، ست مسنة جارتنا ،

طب خش حل تمارين مع زملائك .. على فكرة ، الله ينور عليك ، الحفلة أدهشت الجميع ..

آه ، وكمان الأستاذ عاطف الغويط ، عايزك تفوت عليه وانت نازل ،

ياللا ، توكل على الله ، حل معاهم التمارين دي ، و تعال لي ..

الأستاذ عاطف موجود ،

نقوله مين ؟

محمد جميل النادي ،

اتفضل ، أهلا يا أخ محمد ، ابن حلال ،

كنت في انتظارك أنا و الأخ رائد ، علشان أعرفكو ببعض ،

الأخ رائد البسيوني ، رئيس اتحاد طلاب كلية الصيدلة ،

بدا رائد لحمادة ، من أول وهلة ، شابا ربعا ، متوسط الطول ، عريض الصدر ،

مدور الوجه ، ابيضه ، كأنما قد من جبس ، لخلوه من اية انطباعات ،

واسع العينين أسودهما ، كشعره الفاحم ولحيته الكثة ، وحاجبيه الكثيفين ،

يجلس حاملا بيده كتابا ، ينظر بعيني من يتفرد بفهم مالا يفهمه غيره ،

أو يقوم بعمل ربما لايقدرعليه أحد سواه ،

من آن لآخر يبدي لحمادة ابتسامة باهتة ، كلون ثوب قديم ،

أهلا يا أخ رائد ، أنا محمد جميل النادي ، ثانوية عامة ،

ليكمل حمادة جلسته صمتا ، متحيرا من شعور غريب اجتاحه بعدم الارتياح لهذا الشخص ،

فلم يجرب على احساسه كذبا قط ، فهو شديد الحساسية للانطباعات الاولى ،

هيه يا أخ محمد ، عامل ايه في المذاكرة ، باين عليك مرهق ،

الحمد لله ، أنا مرهق كده على طول ،

الأخ حمادة ، ماشاء الله عليه ، شعلة نشاط ، بيشتغل وبيذاكر ، ومجتهد ،

مدرسته الضخمة العريقة ، كانت خامدة كأسد عجوز في قفص ،

فنفخ فيها الروح ، بهمتة ونشاطه وذكاءه ،

واقام فيها عملا جميلا ومنظما ،

أجرى الدم في عروق زملاؤه ، وادهش الجميع .. الأستاذ عاطف متحدثا بفخر !

انت معجب بالأخوان يا محمد ؟!

حمادة ، مندهشا من صلف رائد ، وتجاهله التام لما حكاه الأستاذ عاطف ..

وبينما تقفز الى مخيلته كلمات صديقه فؤاد ، والشيخ زغبي ، يرد :

يعني ، لسه بحاول أفهمهم ، أنا معجب ببعض أفكار الشيخ حسن البنا ،

 لكن معرفش مدى صلتها بالواقع  ،

رائد البسيوني ، محاولا إخفاء اندهاشه من جرأة حمادة ، وتعامله بندية ، وإعتداده بنفسه ..

طيب ياسيدي ، تعال إنت وزملاءك زورونا في الجامعة ، ونتعارف أكتر ، يمكن نعجبك ..

هحاول ، إن شاء الله ، بس الإمتحانات على الأبواب ، ربنا يسهل ،
 استاذن ، سلام عليكم ،

يخرج حمادة من بيت الأستاذ عاطف الغويط ،

ليجد نسمات مارس المنعشة بانتظاره ، لترافقه الي البيت ،

حتى تدخله الي بيتهم ، فيصادف سلوى على السلم ، بتلهف تسأله :

وصلك الشريط ؟!

ايوه طبعا ، شكرا ،

وايه رأيك ؟!

رائع ، إستفدت منه جدا ،

وبعدين ..

ولاحاجة ، لاصوت يعلو على صوت المذاكرة الآن ،

يعني نعطل قلوبنا ؟!

بالعكس ، نشغلها على الآخر .. بس مع ربنا ،

نتوجه اليه يالإستغفار ، وتلح عليه بطلب العون ،

تصبحي على خير ..

يصل حمادة الليل بالنهار ، العمل بالمذاكرة ، الأمل بالرجاء ..

يكاد يسقط من الإعياء ، كي يقطع شوطا على طريقه الوعر ، الطويل ، المضني ،

ليصل الي احدى محطاته المصيرية ، بظهور نتيجته المشرفة ..

التي فجرت ينابيع السعادة في قلب امه ، حتى أغشي عليها من شدة الفرح ،

وأعادت الروح الى قلب أبيه ، الذي انتعش من شدة الزهو ،

وأعادت الأنوار الى البيت ، وذكرت الأحبة بعنوانه ، فأتوه من كل حدب وصوب ،

بالسكر وشربات الورد ، والنقوط السخية ، ورنين الزغاريد ..

أول مرة في حياته يسمع في بيتهم زغاريد ، كم سمع وحفظ من أغان ، وأحبها وطرب لها ،

ليأتي نغم زغاريد يوم نجاحه ، يتردد صداه في بيتهم ، فينسخ كل ما سمع من أنغام ،

إلا صوت العندليب ، حليم ، رفيقه منذ الطفولة ، عاد اليه اليوم ،

بعد طول غياب ، ليصدح ، هاتفا ، الناجح يرفع إيده ..

بدت أمه ملونه بكل ألوان الفرح ، وكأنها دخلت الجنة ، وترتع في رياضها ،

وجهها الأحمر توهج وضاءا حنونا ، كشمس الشتاء ،

علا صوتها ، لعلعت ضحكاتها ، زالت أوجاعها ،

دبت فيها روح عروس ، طال انتظار عرسها ،

وغشيتها نشوة قائد حقق نصرا مؤزرا ، لاسيما بعد أن اكد لها الجميع ،

وعلى راسهم المهندس محسن ،  شقيق سلوى ،

أن مجموع حمادة سيدخله كلية الهندسة مستريح ، باذن الله ،

لم يعد في البيت موطأ قدم ، جدته وشقيقاتها ، خالات أبيه ، نينة عطيات ، ونينة فوزية،

اللائي يذوب فيهن حبا ، من فرط ماذاق من حنان في حجرهن صغيرا ،

جئن فرحات مزغردات ، ليسبح في أحضانهن ، وقبلاتهن ،

ويتبرك بدعائهن ، ونقوطهن السخية ،

وأعمامه ، وزوجات أعمامه ، وأبنائهم ، وخاله الوحيد ، وخالاته ، وابناؤهم ،

مبروك ، ألف مبروك ياحسين يا اخويا ، عقبال ما تفرح بالبنات ،

الله يبارك فيك يا منعم ، منور ياماهر ، صحتك عاملة ايه ؟ الحمد لله ، نحمده ،

بابا ، كلم ، الدكتور بشاي ، على الباب ،

مساء الخير ، مبروك يا معلم حسين ،

يا ألف مرحبا ، خطوة عزيزة يا دكتور ، الله يبارك فيك ، اتفضل ،

الله ، دا كل الناس الطيبين هنا ، مساء الخير ياجماعة ، مبروك لحمادة ،

يسعد مساك يادكتور ، اتفضل استريح هنا ، الشربات يا بنات ،

في الحقيقة يا جماعة ، حمادة ابننا ، مثال للإبن البار ، المستقيم المجتهد ،

لم يكد الدكتور بشاي يكمل كلامه ، حتى أجهش أبو حمادة بالبكاء ،

إيه يامعلم حسين ، أنا آسف ان كنت قلت حاجة ضايقتك ،

العفو يادكتور ، دي دموع فرح ، وحد الله ياحسين ياأخويا ،

سيبني يا منعم  ، مش عارف هعمل ايه للواد علشان يسامحني ،

تخليت عنه ، ودوخته ورايا في القهاوي ، وفي الآخر طلع نفسه مهندس ،

بعلو نشيج أبي حمادة ، يتكوم الجميع فوقه .. والنبي دا كلام ، حد يقول كده ،

هو له بركة إلا انت ، دا روحه فيك ،

وبعدين هو ربنا وفقه إلا ببركة دعاك له ، ورضاك عنه ،

فعلا يامعلم حسين ، حمادة بيحبك وبيحترمك ، ما تزعلناش في لحظة حلوة زي دي ،

ماتسمعونا زغرودة ياجماعة ، واد يا سونة ،

 قول للستات الي ماليين البيت دول ، يهيصوا شوية ،

قولهم عمي منعم عايز رقص وطبل وزمر ، روح إجري ، أمال ،

 أفرح ياحسين بضناك ووحد الله ياراجل ،

جارات أم حمادة ، حبيباتها ، و صويحباتها ،

اللائي يجمعهن بها البياض البض ، والنظافة والشطارة ،

يتناثرن حولها ، كالبط الشهرمان ، خفة ودلالا ،

يتبارين في إظهار الحب لها  ،والفرح لفرحها ،

بموجات متتابعة من الزغاريد الضاحكة ، والضحكات المزغردة ،

وبالقيام بخدمة الضيوف ،

يهرع لصلاة العصر ، متلهفا للقاء الشيخ زغبي ليبشره ،

فيتلقفه الشيخ بالباب ، محتضنا  يقبل راسه ، فيتعلق بعنقه الطويلة ، باكيا بحرقة ..

تعبت يامولانا ، نجحت يامولانا ،

فيصحبه الي غرفة مكتبه ، مرددا ، حاشا لله ، أن يضيع أجر من أحسن عملا ،

ويخر ساجدا شكرا لله ، فيتبعه حمادة ، ليبلل السجادة بدموع فرحه وامتنانه لله ،

يصل جواب مكتب التنسيق ، ليؤكد توقعات الدكتور بشاي ،
 بترشيح حمادة لكلية الهندسة ،

فتنشط الأفراح من جديد ، لتعلن أتها ستستمر ، في بقية الرحلة .. مهما كانت العقبات !

بعد جولة لحمادة على أخوانه ، وزملائه ، تبادلا فيها التهاني ،

فعادل الزيني ذهب الي كلية التربية ، والأطروش للتجارة ،

وأحمد عرجان للهندسة ، ونادر جورج للفنون الجميلة ..

يعود الي البيت الذي يلفه صمت ما بعد الفرح ، ليجد أمه مستلقية
 على كنبتها في البلكونة ،

يجلس قبالتها متمتما ، أخيرا سانفرد بشريك الكفاح ، واي كفاح يا أمي ،

يهمس محييا ، فتصحو كعادتها ،

انت جيت ياضنايا ، تعال الحق أمك ،

خير ياماما ، كفى الله الشر ،

ابدا ، خلصت الزيطة ، والفكر ركبني ،

فكر ايه ؟!

يعني ما انتش عارف ، الكلية وطلباتها ،

وحدي الله انتي بس ، من هنا ورايح ، تفرحي وبس ، هم وغم ، ممنوع ،

والله ما هيهنالي بال ، الا ما اطمن عليك ، ونستر أخواتك ، وافرح بعيالك ،

والله انت طماعة و اروبة ياماما ، هتعيشي دا كله ،

عايزني أموت ياحمادة ،

بعيد الشر ، انا بخزي عنك العين ، يانور العين ،

طب دا أنا ، حسبت كل النقوط طلعوا ربعمية جنيه ،

وفيه جمعية صغيرة عاملها مع طنط عايدة ، علشان الكلية ، هقبضها الشهر الجاي بمتين جنيه ،

يعني ستمية جنيه ، ياست الكل ،

طيب ، وحطي عليهم ستمية كمان ،

منين ؟

من الجمعية اللي انا عاملها ،

لاهو أنت عامل جمعية ، منين ؟

أي زيادة من المحل ، طنط أم ايهاب ، كانت بتحوشهالي ،

لااله الا الله ، والنبي باابني ، ما انا عارفة أقولك ايه ، ولا أكافئك ازاي ،

أنا ماحلتيش غير رضايا عنك ودعايا ليك ، بس تسامحني ،

بلاش دراما الله يخليكي ، خلينا نحسب الحسبة ،

كده المجموع ، الف ومتين جنيه ، انا هحتاج بالكتير أوي ربعمية جنيه ،

ودول هيكفوك ياحمادة ،

ان شاء الله ، دول ينغنغوني ،

انا محتاج ايه غير شوية لبس ، وبعد كده ، ان شاء الله ، هوفر طلباتي من شغلي ،

والباقي نفتح بيه ، دفترين توفير للبنات ، كل واحدة ربعمية جنيه ،

وأي قرش ممكن نوفره ، نحطهلهم في دفتر التوفير ..

روح ، الهي ما يخيب لك رجا يابن قلبي ، يارب ، زي ما بتفرج همي كل مرة ،

سبحان من أعطاك سحر لتفريج الهموم ، روح ربنا يحميك ، عيني عليك باردة ياحمادة !

العَصّارة - الحلقة الثانية عشرة

تعال يا أخ فؤاد ، جيت في وقتك ، نطلع من الدوشة دي علشان نعرف نتكلم ،

ينعطفان ليدلفا الى شارع الداير ، ومنه الى زقاق سيدي الوراق ،

نقعد هنا ، بحب أسند على حيطة سيدك الوراق ،

ياأخ فؤاد ، حضرتك كلمتني عن الإخوان وأبهرتني بفكرتهم ، وأنا ماكدبتش خبر ،

وجريت اشتريت الكتب وقريت ، واقتنعت ، ومن يومها وان بدور على الجماعة دول ،

ومش عارف أوصل لهم ، وكل ما أتوسم في حد انه منهم ، يطلع مالوش دعوة ،

انت رحت لمين ؟!

الأستاذ عبدالحفيظ المنياوي ، والأستاذ سعيد الدياسطي ،

ياابني ، دول ناس غلابة ، إنما الأخوان دول حاجة كده ، زي الكائنات الفضائية !

بقولك ايه ، يا اخ فؤاد ، الله يخليك ساعدني بجد ، علشان ورايا مذاكرة ،

ما انا بساعدك أهه ، وبقولك تاني ، انهم أشبه بالكائنات الفضائية ،

تلقى الواحد منهم ، فيرمقك بنظرة تقيمية فاحصة ، باعتبار انك هدف محتمل ،

نظرة متفحصة ، ملؤها النرجسية والشعور بالأهمية و احتكار الحقيقة ،

فقد سبقك الي الطريق الوحيد المؤدي الي الجنة ، من وجهة نظره ،

فطالما أنت خارج تلك الجماعة الربانية ، فأنت على خطر ،

وكم ستكون محظوظا ، لو وقع اختياره عليك ، لينتشلك من وسط العوام !

لا يا أستاذ فؤاد ، انت كدا متحامل جدا ، وماتزعلش مني ، صدمتني بجد ،

اسمعني للآخر ، وبعدين انت حر ،

ازاي اسمعك وانت بتقول الكلام ده ، على ناس دعاة الي الله ،

 بذلوا في سبيل دعوتهم الكثير ،

ماهي دي العلامة التانية ، هيكلمك عن المعتقل والتعذيب والمحنة ،

ومش بعيد يكشف لك ضهره لترى عليه أثر السياط ،

حتى تود لو تصنع له تمثالا ، تعال شوف جابر رزق وهو داير على الجامعات ،

 يردد ، بينما نحن خلف السوار ..

وهتروح بعيد ليه ، بالك الكتب اللي بتتكلم عن التعذيب ومذبحة ليمان طرة ،

خلت الأخوة بتوع الجماعة الأسلامية يترموا في حضن الإخوان ،

يعني طلعوا من المعتقل ، خدوها على الجاهز ، ودانت لهم بالسمع والطاعة !

أنا هتجنن ، يا أخ فؤاد ، لما أنت متعقد كده من الإخوان ، ليه دفعتني لطريقهم ،

بالعكس ، طب ياريت أعرف اجمع كل الولاد ،

 الموهوبين الأذكيا الشجعان اللي زيك ، من أنحاء مصر ،

وادخلهم جماعة الإخوان ، على الأقل يزيحوا سدنة الفكر التنظيمي ،

 المغرور ، المتعالي النرجسي !

طب ياللا بينا علشان ورايا مذاكرة ،وعندنا حفل مهم بكرة ، ياريت تيجي تشرفنا ،

نكمل كلامنا مرة تانية ، بس أوصيك تراجع نفسك في انطباعاتك الظالمة عن هؤلاء الأطهار !

يقترب حمادة من الباب ، ليتسلل الى سمعه ، صوت شجار حاد ، بين أبويه ،

فيدلف الي غرفته بهدوء ، ليرتمي على فراشه ، منصتا بألم ..

ياعنايات اخزي الشيطان مش كده ، هتسمعي بينا الناس علشان جبت علبة حلاوة ،

 دا جزائي اني عايز أفرح العيال ،

هو أنا لا كده عاجب ولا كده عاجب ، علشان لما أطفش من وشك ماترجعيش تعيطي ،

اتقي الله ياحسين وما تتلككش ، أنا ما بتكلمش على الحلاوة ،

ولا أكره لعيالي الفرح ، بس بالمعقول ،

مش تروح تضيع الفلوس على علبة حلاوة بالشيئ الفلاني ، تكفي جيش ،

 ونقضي بقية الأيام ناكل زلط ،

انت ناسي ان حمادة معدتش بيروح المحل ، والقرشين اللي كان بياخدهم ،

من شغله عند عمه انقطعوا ، بعدما كانوا بيسندوني ،

وهو مابيروحش المحل ليه ، أهو بدل تنطيطه في الجوامع ،

ياحسين حرام عليك ، أنت أيه .. معندكش قلب ،

خلاص اعتبرت شغل الواد بدالك عادي كده ،

هتقدر تشيل ذنبه لو سقط في الثانوية العامة ،

ولا صعبان عليك انه مايضيعش هو كمان ، زي ما كل حاجة ضاعت ،

أمال .. أصلك ماتعرفش القهر والمرار اللي نزلت بيهم فوق دماغه وكبدي بينشوى ،

علشان أثبته زي الوتد ، أشد عليه خيمتي ، واداري بيه خيبتي ،

لما الواد قلبه انكسر ياضنايا و شاخ  قبل الأوان ،

خيمتك ايه وخيبتك ايه ، انتي هتشعري ،

ما وراكيش الا الغم والنواح ، بتموتي في دور الضحية ،

ما تعيشي على أدك وترضي باللي بديهولك ، وتبطلي مجايب ، وعمايل ،

ما تبطل انت قاعدة القهوة والشيشة والسجاير ، واهتدي بالله وروح افتح ورشتك ،

على الأقل تفتح بيوت عمالك الغلابة اللي شردتهم ،

قلتك ميت مرة ماتجيبيليش سيرة الزفت الورشه ،

والا ورحمة أبويا أروح أولعلك فيها ، وفي نفسي وفي السوق كله ،

بتحلف برحمة أبوك ، ألف رحمة تنزل عليك يامعلم جميل ،

طب ياريتك كنت إتعلمت من أبوك ، ربع اللي إتعلمه إبنك منه ،

طب بلاش سيرة الورشة ، ما انا لسه مقابلة مراة بولس ،

امبارح ، في عزا المقدسة ، حماة الدكتور بشاي ،

ومحلفاني أيمان أكلمك توافق تِشرف بس إشراف على ورشة الأسطى بولس
 بعد ما أتوسع ،

ودلوقتي بيعمل قطع غيار وبيودي ليبيا ، بتقولي ،

بولس مستعد يدفع للمعلم حسين ،

مية جنيه في الجمعة ، بس يبص على الشغل ،

لا لا لا ، أنت أكيد أتجننتي ياعنايات ، وشكلي المرة دي هختفي من وشك الى الأبد ،

عايزياني أمد ايدي ، وآخد أجرة من واد كان صبي عندي ، حيا الله بيكنس قدام ورشتي ،

وماله ، مش أحسن من قاعدة الفقريين بتوع القهوة اللي جابولنا الفقر بعد العز ،

ساعتين تلاتة بعد المغربية تظبط للراجل شغله بخبرتك ،
 وانت معزز مكرم ، مش احنا اولى ،

انت أصلك مش داري بالدنيا ، الطاولة لحست مخك ،

وخلتك نسيت ان لك ابن داخل على جامعة ،

وبنات على وش جواز ، مش عايزين هم ما يتلم دول ؟!

خلاص قفلي على الموضوع ده ، أنا جايلي ترقية في الشركة ،

ورشحوني أنفذ تصميمات الخبرا الأمريكان اللي هيعملوا المشروع الجديد ،

ومرتبي هيضاعف ، اتلهي بأه واسكتي ، محسساني اني بقيت شحات ..

جاتك الهم وانتي فقر .. أنا هخفى من خلقتك ، واريحك مني ..

ينهض حمادة من فراشه ، متثاقلا ، يجتهد لإخفاء آثار دموعه ،

 يدخل على أمه ، وكأنه وصل للتو ،

لترمقه بنظرة ، تعرفه فيها أنها أحست به ، وتعرف أنه تابع شجارها مع أبيه ،

ماشاء الله ، ايه الحلاوة دي كلها ، يابركة مولد الحبيب النبي ،

اللهم صلي عليك بانبي ، كنت فين ياحمادة من ساعتها ، وسايب مذاكرتك ؟!

حالا داخل أذاكر ، امال بابا فين ؟!

انت تايه عنه ، جاب حلاوة المولد ، وجرى على حريمه .. القهوة والطاولة ،

واخواتك نامو ، واديني قاعدة وشي في الحيط ، على ما حضرتك تشرف ،
 علشان أعشيك ،

ربنا يخليكي ياماما ، جهزي لي نايب الشيخ زغبي من الحلاوة ، آخده معايا في صلاة الفجر ،

ينهي حمادة صلاته ، ليندفع بشوق إلى الشيخ زغبي ، مولانا الحبيب ،
 كل عام وانت طيب ،

اللهم صلي على صاحب الذكرى ، بالله عليك ياحمادة ده كلام ،

إيه بس يا غالي ،

كل يوم تصلي وتفط ، ملحقش حتى أسلم عليك ، والله واحشني ،

 ياجميل ياحبيب الجميل ، الله يرحمه ،

ألف رحمة عليك يا جدي ، وعلى أموات المسلمين ،

فضلة خيرك ، يامولانا ، من الحلاوة ،

تعيش ، وكل سنة وأنتم طيبين ، المهم طمني عليك ..

لو تعرف يامولانا ، النار اللي في قلبي ..

ليه بس كفى الله الشر ، سلامة قلبك يا حبيبي ، من إيه بس ؟!

من الحيرة ، نفسي يكون ليا دور محترم في الحياة ، حاسس إن ربنا أكرمني بمواهب ،

محتاجة اللي ينميها ويستغلها ، مش عايز أضيع عمري زي بابا ، بحجة الظروف ،

ماشاء الله عليك ، من يومك ذكي ولبق وشاطر ، ربنا يحميك ،

وماله ياحبيبي ، الطموح من شيم الأذكياء ،

المشكلة اني لما قربت من محيط المتدينين ، لقيته مخيف ..

لحى كثة ، ونفوس رثة ،  مناظر مهيبة ، وأفكار رتيبة ،

قامات عالية ، وثقافة متدنية ، الا من رحم الله ، وقليل ما هم ،

لاحول ولاقوة الا بالله ، وعليك من ده كله بإيه بس ياحمادة يابني ،
 مالك انت ومال العك ده ،

ماتبعد وتشوف مصلحتك ، وتنتبه لدراستك ، وناسك وحبايبك والدنيا حواليك ،

أخدمهم وادعيهم ، وطلع فيهم مواهبك ، زي ماانت عايز ، و أنت على طبيعتك الحلوة ،

وسيبك من الناس دول ، دول شيع وأحزاب ، كل بما لديهم فرحين ،

وانت مش هتسلك في وسطيهم ،

أمال ، أني عارفك ، طيب وعلى سجيتك ، والأخوة دول هيستغلوا مواهبك لخدمة أغراضهم ،

وأول ما هتعارضهم ، هيطلعوا فيك القطط الفاطسة ، ويقولوا ، ما رأينا منه خيرا قط !

مش عارف يامولانا ، عندي قناعة راسخة ،

بحتمية العمل من خلال جماعة ، فيد الله مع الجماعة ،

ده دي ، امال احنا ايه يا حمادة ، هما المسلمين اللي ماليين الجوامع دول مش جماعة ؟!

لا يا مولانا ، أنا أقصد جماعة منظمة ، تتحرك في الدنيا كلها ، لتعيد للعالم مجد الاسلام ،

من خلال منهجه الذي يجسد ، بشموله لكل نواحي الحياة ،

 حرية الإنسان وكرامته ، أمنه وسعادته ،

نفسي نقدم الإسلام للعالم ، من باب الحرية والعدل ، وليس من باب التسلط و القمع ،

من باب الإبداع والجمال والفن ، وليس من باب التزمت الخانق والتسلط والكبت ،

جبت الكلام منين ياحمادة ؟!

من الشيخ الغزالي ، كلامه بيسحرني ، تعرف ان أنا بسيب المذاكرة واقرا في كتبه ،

ودا كلام برضك ،

المهم ، الإخوان هما الجماعة الوحيدة المنظمة والعالمية والقوية وصاحبة الخبرة ،

على الساحة ، لكن لحد الآن مش شايف أمارة ،

 انهم مشغولين بحكاية الحرية والأبداع والفن دي ،

كلامهم كله ، وكتبهم ، غم وهم وسواد ، ونواح وتعذيب ، ومذابح ومؤامرات ،

وكمان فؤاد امبارح ، خلى الفار يلعب في عبي منهم ،

قال لك ايه فؤاد ،

للأسف كان متحامل عليهم جدا لحد الظلم ، كان ناقص يشبهم بالمافيا ، زعلني جدا ،

جالك كلامي ، الواد فؤاد ده أصله سوسة ودايس وقاري كويس ،

وبعدين هو سابقك للجامعة ، فمطلع أكتر منك ،

يعني ايه ، يعني انت موافقه على ان الإخوان تنظيم سري غامض ،

والظاهر منهم لايمثل الباطن بالضرورة ،

والله دي قناعتي ، اسمع اللي الشيخ زغبي بيقولك عليه ،

أنا عايشت دا كله قبل ما أنت تتولد ،

الشيخ حسن البنا كان بادئ بأفكار زي البرلنت ، هي عبارة عن امتداد لمن سبقوه ، وخصوصا الإمام محمد عبده ،

ولو كان كمل بأفكاره الوسطية دي ، كان وحد المسلمين ،

وحطهم على الطريق ، ونفخ فيهم الروح ،

يقوم يبوظ دا كله بحكاية التنظيم السري المسلح ،

اللي عمله مع العصبجي السهتان ، اللي اسمه عبدالرحمن السندي ده ،

قال إيه ، بحجة مقاومة الأنجليز فى القنال ، يقوم يبلي الأمة بالبلوة دي ،
ش وعليها ياحبيبي ،

مادام دخل سرطان العمل السري في جسم أي دعوة ، إبقى تعالى قابلنى إن برئت منه ،

وغطت ووطت ، جه سيد قطب ، كملها وخلى أفكار تنظيم الإخوان ،

 أخطر من قنابل تنظيم السندي ،

بالك الإخوان دول دلوقتي عبارة عن ايه ..

دماغ مقسومة نصين ، نص شغال بمكر وخبث وعسكرية عبد الرحمن السندي ،

والنص التاني شغال بتطرف ، ومبالغة أفكار سيد قطب ،

لكن كلام حسن البنا الجميل اللي انت قريته ومنبهر بيه ده ،

كان زمان أيام الخطب الفصيحة ، والناس المطربشين الطيبين ،

ومش هطول عليك ، علشان دراستك ، هختم لك بحاجة واحدة بس ،

مصطفى مشهور المنظر بتاعهم ده ،

بالله عليك اقرا تاريخه كويس ، هتلاقيه من عتاة العمل السري العنيف !

الشيخ زغبي ، ضاربا كفا بكف ، لاحول ولاقوة الا بالله ،

 طب بس قوم ، الحق مدرستك ، وربنا يهديك ، ونتكلم بعدين ،

ينصرف حمادة مكتويا بنيران الحيرة التى أججها الشيخ زغبي ، بعد أن أشعلها فؤاد !

الا انها لم تكن كافية لإثنائه عن عزمه على المضي نحو العمل لتحقيق ذاته ،

وخوض تجربة محاولة الوصول الى الحقيقة ،

يمضي إلي المدرسة لامعا ..

بملابسه الرمادية العسكرية التي تضوى من الغسيل والكي بالنشا ،

وحذائه الذي أبدع أخيه حسن في تلميعه ، بعد أن نفحه حمادة شلنا ،

ليجد زملائه في انتظاره ، لايقلون عنه لمعانا وتألقا ، فقد نبه عليهم بشدة ،

على ضرورة الظهور بأبهى صورة في حفل اليوم ،

لن يدخل أحد منهم فصله اليوم ، بعد أن استأذن لهم الأستاذ اسماعيل حسونة ،
 من المدير ،

يبدأون اجتماعهم بالمسرح ، بينما يتسلل اليهم صوت أحمد عرجان يعلن في الإذاعة ..

موعدنا اليوم مع احتفال المدرسة ، والجماعة الإسلامية ،

 بذكرى ميلاد الرسول صلوات الله عليه ،

برعاية السيد الأستاذ محمد رشاد القليوبي ، مدير المدرسة ، وسيشرفنا بالحضور ،

فضيلة الدكتور الشيخ مسعود عطالله ، ليلقى محاضرة هامة بعنوان :

الشيعة ، مذاهبهم ، وموقف السنة منهم ،

وذلك عقب الحصة الرابعة باذن الله ، بمسرح المدرسة ..

يتحرك كل بنشاط ، للقيام بدوره الذي كلف به ،

يشرف هشام الأطروش على نظافة المسرح واضاءته وتجميله ،

فيصحب عم فتيحة الجنايني لتوزيع أصص الورد والزرع على جانبي المنصة ،

وفي مدخل وممرات المسرح ،

أبو نجلاء عامل الصيانة ، لمراجعة الإضاءة وضبط الميكروفون ،

بينما ينهمك عمال النظافة في الكنس والرش وتلميع المنصة والمقاعد ،

يميل الأطروش على حمادة ، هدي لكل واحد جنيه ، فيومأ له بالموافقة ،

على المنصة ينهمك عادل الزيني ، ومعه مجموعة من الزملاء ،

في تعليق لافتة تهنئة بالمولد وترحيب بالضيوف ،

كتب عليها موضوع المحاضرة بخط كبير وجميل ،

ووضع الزهور ولافتات تعريفية صغيرة كتبت بخط ، نادر جورج ، البديع ،

لتوضع أمام الجلوس على المنصة ، الى جانب نسخة من المجلة ..

يقف حمادة على المنصة ، فيرى زملائه من أعضاء الجماعة الإسلامية ،

يتناثرون في أنحاء المسرح ،

كورود في أناقتهم ، كنسائم في نظافتهم ، كنحل في دأبهم ، كفرسان في أدبهم ،

منهم من يوزعون نسخ المجلة على المقاعد ،

ومن يشبكون كروت التعريف على صدور زملائهم ،

ويراجعون مظهرهم ، ومن سيصطفون على مدخل المسرح ،

وجانبي المنصة كتشريفة للضيوف ،

ومن سيتولى توزيع العصائر والحلوى ، المهداة من ادارة المدرسة ..

فيتأمل مندهشا ، كيف أقام هو وزملائه هذا النشاط ،

في جو من اخلاص الأخوة والحب ، من هدوء النظام والتفاهم ،

دون حاجة الي سرية تنظيم ، ولا تسلط أوامر ،

ماذا لو جرت أمورنا بهذه البساطة والسلاسة ،

بهذا الوضوح وتلك الشفافية ، ودون استبعاد أحد ، أو الصدام مع احد ..

الله أكبر ، الله أكبر .. يالا ياحمادة ، الصلاة ،

حاضر ياأخ عادل .. جي ،

تقبل الله ، يا أخ احمد عرجان ، جهزت نفسك للتقديم ،

الحمد لله ، هستفتح بخواتيم سورة الفتح : محمد رسول الله والذين معه أشداء على الكفار رحماء بينهم ..

عليه صلوات الله ،

وبعدين نشيد : يارسول الله ،هل يرضيك أنا ، أخوة فى الله للإسلام قمنا ..

وبعدين كلمة المدير ، وبعديها الشيخ على طول قبل ما الزملا يزهقوا ..

وبعد تعقيب الأستاذ اسماعيل حسونة ، نختم بنشيد تاني : يانبي ، سلام عليك ..

ممتاز على بركة الله ، هروح أشوف الأخ عادل ، علشان يروح يجيب الشيخ،

أصطف الحضور على المنصة ..

يتوسطهم الأستاذ  مدير المدرسة ، مربيا فاضلا شامخا في بذلته الداكنة ،

عن يمينه الدكتور الشيخ مسعود ، عالما مهيبا وقورا في ثيابه الأزهرية ،

ثم الأستاذ اسماعيل حسونة ،

سار الحفل هادئا سلسا جميلا ، وأبدع الضيف في إفادة الحضور في مسألة الشيعة ،

فبدد حيرتهم ، وأشبع فضولهم ، بحديثه الموجز ،  وبأسلوبه العلمي المبسط ،

عن فرق الشيعة ، وأي الفرق منها أقرب الي السنة ،

ثم خص منها الشيعة الإمامية الإثنى عشرية ، التي قادت الثورة الأيرانية ،

بتفصيل أكثر فبين المعتدل منها والمتطرف ،

ليعقب الأستاذ اسماعيل حسونة مدرس التربية الدينيه ،

ويوجه الشكر لأبنائه من أعضاء الجماعة الأسلامية ،

ويختم أحمد عرجان بصوته العذب ، بنشيد ، يانبي سلام عليك ،

وسط ترديد الجميع ، وتصفيقهم ،

يصحب الأستاذ المدير ، ومعه بعض السادة الأساتذة ،

 فضيلة الدكتور الشيخ مسعود ، الي مكتبه بحفاوة ،

بينما ينهمك حمادة ، بمعانقة أخوانه ، وتهنئتهم على جهدهم المشرف المنظم ،

يبادره عادل الزيني .. خلاص من النهاردة مفيش نشاط تاني ، تفرغ تام للمذاكرة ،

فيؤمن الجميع على كلامه !

بالرغم من تحفظ حمادة في الظهور ، وامتناعه عن الكلام ما أمكنه ،

وحرصه على مشاركة أخوانه ودعمهم كجندي ، وان رأوه قائدا !

خوفا من مظنة الرياء والإستعراض ، والهيمنة على الجو ، التي حذره منها عادل الزيني ،

الا انه لايستطيع أن يقاوم شعورا غامرا بالغبطة والزهو ..

الغبطة ، أن أفاء الله عليه ووفقه ، لأن يسلك بداية الطريق الى دعوة الناس الي الخير ،

والأخذ بأيديهم الى ما ينفعهم، باخلاص وحب ،

والزهو ، أن أوفى بما عاهد عليه جده ، ساعة احتضاره ..

بأن يكون متدينا مستقيما ذكيا ، رجلا  ناجحا قويا ، له قيمة وكرامة  ،

يمضي في الطريق ، بنظرة جديدة ، للناس والأشياء من حوله ،

يشعر وكأنه أضحى مسئولا عن الجميع ،

عن الأخذ بيد المجتهد ، تنبيه الغافل ، تحفيز الخامل ،

ادخال السرور على كل قلب محزون ، مسح الأسى عن كل جبين مكلوم ..

يود لو يطير ، ليكون نسمة رحمة رطيبة ، ترف على وجوه أتعبتها الهاجرة ،

تحنو على قلوب أضناها الهم ، وأشقاها القلق ،

وشققها الظمأ الى الرحمة ، والتلهف على الحب !

السلام عليكم ، ازيك يانادية ، فين ماما ،

بتأكل الفراخ ، ونازلة ،

وحسن وسهام ،

جوه ،

ازيك يا سهام ، عاملة ايه في المدرسة ، الحمد لله ،

مبروك الإيشارب .. التزمي بيه على طول ، وحافظي على الصلاة ، علشان ربنا يوفقك ،

وانت ياض ياسونة ، انت فين ..

أنا اللي فين برضه ، هو حد بيشوفك يا سي حمادة ،

أيوه والنبي ياحسن ياابني ، قوله ، انت حد بيشوفك ،

ماما ، أنتي نزلتي ،

ايه ياحمادة ، وبعدهالك ، امتى هتشوف مذاكرتك ،

طب المحل وأستعوضت ربنا في مرواحك لعمك ، حتى الراجل عطلان وزعلان ،

تقوم تسيب مذاكرتك ، وتجري ورا الحفلات والعمايل دي ؟!

خلاص ياماما ، وعد ، من النهاردة لحد الإمتحانات ، مفيش غير المذاكرة ،

والله ما أصدقك ، أنا عارفاك ، لما تمشي في سكة ، مين يرجعك منها ؟!

لا أنا بتكلم جد ،

عايزني أصدقك ، تلم الكتب اللي انت مالي بيها الدنيا دي ، ومضيع عليها فلوسك ،

وتديهالي أقفل عليها الدولاب لحد ماتخلص ، وتبطل شرا كتب تاني ،

حاضر ،

هتتغدى ، ولا هتستنى بابا ،

طبعا نستناه كلنا ، على ما أبص على مذاكرة اخواتي وواجباتهم ،

روح ، قلبي وربي ، راضيين عليك ،

ماتحكي لنا ، ياحمادة ، على الحاجات اللي بتعملها في المدرسة ،

دا البنات في مدرستي مش مصدقين ان أنت اللي عملت المجلة الحلوة دي ،

ما عملتهاش لوحدي ياسهام ، أنا وزملائي ، تحت اشراف استاذ الدين ،

وايه الحفلة بتاع النهاردة ، الأطروش قابلني في الطابونة ،

وقالي انكم بدعتم ، صحيح يا حمادة ،

أبدا ياحسن ، احنا بنتعاون كزملاء اننا نعمل أنشطة وحاجات تفيد الناس ،

زي ايه ،

شوفي يانادية ، النهاردة احنا محتاجين نرجع لنبع الإسلام الصافي وننهل منه ،

علشان ننهض ونتقدم زي ما أجدادنا عملوا ،

والله ياحمادة ما أنا فاهم حاجة ،

أنا قاعد لكم ياحسن ، لحد الأمتحانات ، وكل يوم نفهم حتة صغيرة مع بعض .

سلام عليكم ، الأستاذ حمادة هنا ، ايه الحلاوة دي ، لينا حظ نتغدى سوا ،

ازيك يا بابا ، وحشتني والله ، ماتشوفش وحش يا ابني ، هيه عامل ايه ،

الحمد لله ،

يالا الغدا ياعنايات ، اصلي واقع من الجوع ،

ايوه ، حاضر جاهز ،

متعرفش طبخين ايه ياض ياسونة ،

حاجة جامدة جدا يابابا ،

قول ياض شوقتني ،

حسن ضاحكا يجري ، كشرررررري ،

والله ما أنا سايبك يا ابن الكلب ،

يخلو حمادة بكتبه ، ويشرد بفكره ..

فرؤيته لأمه تعاني في صمت ، من انقطاع جنيهاته القليلة التي يكسبها من المحل ، تعذبه ،

يكاد عقله يطير من التفكير في طريقة للتوفيق بين مذاكرته ،

وبين العودة الى المحل ليساعد أمه ،

كيف يحقق طموحه ، وأمنية أمه ، بأن يكون مهندسا ،

كمحسن شقيق سلوى ، وبين العمل من أجل مساعدتها ،

إلهي ، ياعالم بكل شيئ ، تعلم صدق نيتي في الدعوة الي الخير ،

وتطلع على امتلاء قلبي ، ببر أمي والوقوف الي جوارها ، ما استطعت ،

فاغفر لي ، واشرح صدري ، ووفقني لطاعتك ، وطاعة أمي وارضائها ،

يارب عوضني عن ما عانيت خيرا ووفقني يارب ، ولاتكلني الى نفسي طرفة عين ...

حمادة ،

أيوا ياحسن ،

خد ،

ايه ده ،

شريط سلوى قالت لي اديه لحمادة ..

يقلب الشريط مندهشا ،

استأذن من ماما في المسجل ياسونة ،

اتفضل ، ياسي حمادة ، وارحمني من طلباتك ، لو سمحت عندي مذاكرة ،

حاضر يا سونة بيه ،

يدس الشريك في الجهاز .. بتلوموني ليه ..

يقلب محولقا ، مكسوفة مكسوفة منك ..

يسكته مستغفرا ..

يدير ظهره للجهاز ، متمتما بغضب ، ليلتفت اليه فجأة .. الحمد لله ،

سلوى دي ، بنت حلال والله ، فعلا : عسى أن تكرهوا شيئا ، ويجعل الله فيه خيرا كثيرا !

ما تسجل ياواد ياحمادة ، الحاجات اللي عايزة حفظ ، على الشريط الهايف بتاع سلوى ده ،

وتكرره في المحل وانت شغال ، وبكده تضرب عصفورين بحجر ، تشتغل وتحفظ وتراجع ،

دا كمان ممكن تزود الأنتاج شوية ، وتحوش فلوس الزيادة مع مراة عمك ،

طب والله ممكن تعملك جمعية ، تقبضها على دخول الجامعة ،

أمال هتجيب فلوس للكلية منين ..

ان شاء الله ، بكرة بعد المدرسة ، أفوت على المحل ،

واروح اتغدى عند مراة عمي وأقولها ..

توكلنا على الله ، نبدأ ببركة اللغة العربية ، ونسجل واحنا شغالين ...

حمادة ، ياحمادة .. الفجر ياحبيبي ، ايه مش عوايدك ماتسمعش الشيخ ،

الحمد لله ، الذي أحيانا بعد ما أماتنا ، واليه النشور ..

خلاص ياماما صحيت ، ماتصحي بابا يصلي ،

بابا ؟! ادعيله ياابني ، ادعيله ، دا راجع مالوش ساعة من على القهوة ،

 طب بس أعرف أصحيه للشغل ،

اتكل على الله ، انزل صلي وادعيله ،

لاحول ولا قوة الا بالله ،

أهلا حبيبي وقرة عيني ، المعلم جميل الصغير ،

 ايه الهنا اللي أنا فيه ده ياولاد ، يومين ورا بعض هتعبر حبيبك ياحمادة ،

تقبل الله يامولانا ، دا أنا اللي بيحصل لي البركة ،

هيه ، شايف في عينيك جديد ، أمال ، قلبك في عبي ،

 وحاسس بيه ، زي الوابور اللي مابيهديش أبدا ،

شفت يامولانا ، مش بولس ، اللي كان مرمطون في ورشة بابا ،

عنده ورشة كبيرة ، ماشاء الله ،

لأ وبيعمل قطع غيار وبيودي ليبيا !

وهيتجنن علشان المعلم حسين يشرف له على شغل قطع الغيار ،

ومراته بتقول مستعدين يدفعوا لبابا مية جنيه في الجمعة ،

نظير اشرافه على الشغل ساعتين آخر النهار كل يوم !

وطبعا أبوك رفض ،

وعرفت منين ؟!

أبوك دا ياابني ، أنا عاجنه وخابزه .. أنف ومتعب .. سيبك ، ربنا يهديه ،

 انما هي مرات بولس جت لكم البيت ؟!

لأ ، ماما قابلتها في عزا ، المقدسة ، حماة الدكتور بشاي ،

إخص عليا ، بالك آني لحد دلوقت ما عزتش الدكتور ،

ماتيجي ياحمادة معايا بعد العشا ، خمس دقايق نعزيه ، ينوبك ثواب ،

أهو أقله تبقى بدل أبوك ، اللي مش هيسأل ،

ان شاء الله ، لو صليت معاك العشا نروح ،

أستاذنك .. آه كنت عايز آخد رايك في حاجة تانية ..

بفكر أرجع المحل ،

ازاي ، ومذاكرتك ؟!

ربنا هداني لفكرة ، أني أسجل الدروس النظرية على شريط ، وأسمعه وأكرره وأنا شغال ،

وبكده أساعد ماما ، وكمان أعمل بالأجر الزيادة ، جمعية مع مراة عمي ،

تنفعني عند دخول الجامعة ، من غير ما أخسر مذاكرتي ،

ايه رايك يا مولانا ، أنا بقولك علشان تدعيلي ، ان ربنا ينور لي الطريق ،

ويوفقني ، ويعيني على ارضاء أمي !

يجهش الشيخ زغبي بالبكاء ، وينصرف الى غرفة مكتبه ، مرددا بصوت متهدج ،

روح ياابني روح ، الله يحنن عليك ، وينجح مقاصدك ،

روح ، اتوكل على الله ، وجاه محمد ، ربنا ماهيخيب رجاك أبدا يا غالي ،