العَصّارة - الحلقة العاشرة

أسكت يا عادل ، أنا مصدوم ، ومتألم جدا ..

 دلوقتي بس عرفت ليه كثير من المتدينيين بيقدموا الإسلام في صورة منقوصة ،

بل ظالمة ،

 من فرط ماهم فيه من حرمان من النور والذوق والجمال ،

 ماذا تنتظر ممن غمس نفسه في الرطوبة والقبح والظلام ،

 وفرغ حياته من أي ملامح جمال أساسية للروح والجسد وللعلاقات الإجتماعية ،

 أدنى حد من الملامح الفطرية ، التي ليس لها علاقة بالفقر أو الغني ..

 كالذوق في استقبال الضيف وإكرامه ، 

بتهيئة المكان اللائق من حيث الإضاءة والتهوية ،

 والنظافة والرائحة ، واللمسات الجمالية ولو لوحة على الحائط  ،

 فبالرغم كل ما عانيناه من شدة ، لم تحرص أمي على شيئ أكثر من حرصها على نظافة وجمال بيتنا وزهاوته !

أيضا المظهر يا أخي ، الشكل والأسلوب ..

 بالله عليك دي مناظر ناس تقدم نفسها للمجتمع على أنها تحمل رسالة الإسلام ، 

دين الحق والخير والجمال ؟!

والله لوبعث النبي ، عليه الصلاة والسلام ، من قبره ، واطلع على ملابسهم الرثة ،

 ولحاهم المفعكشة وعمائمهم المقيحة المنيلة بنيلة ، وأسنانهم الصدئة ونعالهم المتربة القذرة ،

 ورائحة العرق والحلبة والزيوت الزنخة المعبأة في زجاجات صغيرة يخبئونها في سيالة الجلابية ،

ليبيدوا بها الخلائق بزعم أنها مسك !

 طب والله النبي يغمى عليه ، ويقول ياخسارة تعبي وشقايه ..

 ما شفتش العصاية المعفنة اللي حاططها اللي اسمه "فجلة" ده في جيبه ،

 بتنز سائل اصفر نتن ويقولك سواك ، وسنة عن النبي ،

 زي ما التاني اللي بيدلدق الحلبة في الطبق ، وعلى دقنه وهدومه ، و برضه يقولك سنة عن النبي  ،

 آه يانبي يا مظلوم معانا !

 وبعدين ايه الشوم اللي راكنين دقونهم عليه ده ؟!

 أكبر خطر على الإسلام ، ان الأشكال دي توجه الناس ،

هيقدموا صورة عن الدين  مليانة سواد وغم وغباوة  ،

 من الإنغلاق والتخلف والضنك اللي هما منقوعين فيه !

والله العظيم ياعادل ، لو بإيدي ، لأجمع كل الأشكال دي في معسكرات ،

 واعيد تأهيلهم صحيا ونفسيا وثقافيا وذوقيا من الصفر ، 

 على الأقل أعلمهم النضافة يا أخي ،

 وما اسمحش لأي مخلوق يتصدى لدعوة الناس للعودة الى منهج الإسلام ،

 الا لما يكون آية في التأنق والنظافة ، والتحضر والثقافة ،

في الإنفتاح والحكمة والذوق والكياسة !

 ولعلمك ، اللي سايبين الأشكال المشوهة دي تعك و تلغوص في الجوامع ،

نيتهم مش سليمة تجاه الدين ،

 عايزين يبوظوه في عقول ونفوس الناس .. علشان يضيق به المجتمع وينفر من جهل وعشوائية أدعياؤه ،

 أنا هطق ، هتخنق ، أنا مش هسكت ولا هيهدى لي بال ولا يقر لي قرار ، 

الا ما أوصل للى أنا عايزه ،

وهو ايه اللي انت عايزه ياحمادة ؟! ..  انا ساكت لك من ساعتها ،

 وانت عمال تشتم في الناس الطيبين دول ، وتغتابهم ، وتتحامل عليهم ،

 ذنبهم انهم بيجتهدوا ، وعايزين يبلغوا دعوة ربنا ، ناس بسطاء وفقراء ،

 لكن بيأدوا واجبهم في خدمة الدين على أد جهدهم ،

 ولاحضرتك عايز كل من يدعو الى الله ، يكون في شياكة وجمال ولمعان حسين فهمي ،

 ويسمع بتهوفن ، ويدخن البيبة زي الريس ، وبالمرة يركب عربية مكشوفة !

طبعا أنا ما قلتش كده ..

 أولا على حد علمي الراجل الأستاذ سعيد ده مش فقير ، دا عنده عمارة مسكنها ،

 ودافن نفسه وولاده في القبر ده ، ومع ذلك مالناش دعوة ،

 ممكن تكون فقير دقة ، بس مظهرك نظيف ورحتك حلوة وعندك ثقافة وذوق ،

 وبعدين لحد امتى هتفضل صورة المتدين مدهولة ومتعوسة ،

من صغري بروح مع جدي الجامع الكبير ، وأشوف أساتذة الأزهر
من العلماء نور على نور ،

 في الوقار والثقافة والجمال والنظافة ،

 طب والله ياشيخ لسه ريحة كف فضيلة الإمام عبد الحليم محمود ،

 لما جه آخر مرة وسلمت عليه مع جدي ، لسه ريحة كف ايده وملابسه الزكية
  في روحي وقلبي ،

 ولا الشيخ محمد الغزالي ، آية في النظافة والأبهة والعظمة ،

 أما الشيخ الدكتور البهي وبذلته الأنيقة ووجه الوضاء .. ماشاء الله ، تبارك الله ،

 تعرف مثلا ان الشيخ المطراوي بيتكلم انجليزي والماني بطلاقة ، وهتروح بعيد ليه ،

 عمك الشيخ زغبي ، على طول تلاقيه جميل ونظيف ومتأنق وجزمته بتبرق ،

 علشان كده مخلي المسجد آية في النظافة والجمال .. ده اللي أنا عايز أقوله ،

ما تدخلنيش في سخرية وغيبة ونميمة ..

الفقير البسيط الغلبان المدهول على عينه ، لايتصدي للدين ،

يتفضل يستحمى ويلبس حاجة نضيفة ،

 ويروح يقعد زي الألف في الجامع علشان يتعلم من العلماء الحقيقيين ، 

مش لاقيهم يدور عليهم ،

 ويسمع الراديو ويقرأ الصحف ، ويتواصل مع العالم من حوله ،
علشان يتحضر ويتثقف ويتنجر ،

 الله يخرب بيت كل من يضعف دور الأزهر و يخيب أمل علماؤه ، ويضعف مستواهم ،

 علشان دا بيضر الدين ضرر بالغ ..

لا ياحمادة ما تأخذنيش ، أنت للأسف مغرور ، ومش عاجبك حد ،

 الظاهر الظروف اللي مريت بها خلتك قاسي جدا ، وعايز تهزأ في مخاليق ربنا ،

 هما فين العلماء اللي بتتكلم عنهم دول ، هنقعد نستناهم لأمتى ان شاء الله ، 

لما الدين يضيع ، طبعا لأ ،

 كل واحد يقدر يعمل حاجة وماله ، أهو بيقول للناس خير ، المثالية والأنزحة بتاعتك دي احتفظ بيها لنفسك ،

ولعلمك هتفضل تهاتي وتاكل في نفسك وما حدش هيعبرك ولن تصل لشيء ،

 الناس غلابة يا حمادة ، سيبنالك انت الشياكة والثقافة والفتاكة ياناصح ،

بص يا عادل ، مالكش دعوة بظروفي ، لأنك عارف انا ابن مين وعيلتي مين ،

على الأقل أنا مأصل كابر عن كابر ، ومن عيلة النادي ،

 الدور عليك ، انت وعيلتك نزحتو من ضنك الأرياف وعيشتو هنا بالكاد على أطراف المدينة ،

 ثم ان مالها ظروفي ، والدي غاب ، بس أمي بمية راجل ،
وطلعتني من تحت ايديها راجل ،

 وعلمت نفسي وثقفت نفسي ، أحسن منك ومن ألف زيك ،

 وبفخر بابويا المعلم حسين جميل النادي ، ربنا يتم شفاه ،

 وبعتبره أطيب وأجمل أب في الدنيا غصب عن التخين ،

 اللي عنده جد زي المعلم جميل النادي ، يوريني نفسه ياعادل يا زيني ..

ايه ياحمادة بالراحة انت زعلت ، مش قصدي حاجة ..

آه بحسب يعني ، أصل تكون فاكرني أتدروشت زيك ، لا ،
أنا آه حابب ديني من تربيتي عليه ،

 ونفسي الإسلام يسود العالم ، وأتشرف بخدمتة ، لكن أنا مش درويش ولا شيخ ، ولاعمري هستشيخ ،

 أنا أسلك مع العفاريت الزرق ، والويل اللي شفته علشان أسد في غياب أبويا ،
مش هيضيع هدر ،

 بالعكس دا سلاحي اللي هحارب بيه اي عقبة في طريقي .. يجهش حمادة بالبكاء ..

خلاص حقك عليك ، أنا مقصدش ، بس أنا مشفق عليك
من ان سخريتك اللاذعة الحارقة دي ،

 وعدم رضاك على اى حاجة ، وانفجارك في وجه مالا يعجبك ،
هينفر الناس منك ، وهيجيبلك المشاكل ..

انت ناسي ، لما آخر مرة بهدلت الأستاذ عبد الهادي في أنصار السنة ، علشان بيتكلم عن الفرق الضالة ،

 وخليت الراجل مكتئب لحد النهاردة ، والله بتكسف أقابله ..

وحضرتك كنت منتظر إيه ان شاء الله ، لما واحد كبير وعاقل وله لحية أد كده ،

 والمفروض ان عنده شوية علم ، وربنا يديله شباب كأشبال الأسود ،

 يلتفوا حواليه علشان يتعلموا حاجة يفيدوا بها وطنهم ودينهم ،

 يقوم يضيع وقتهم وجهدهم ، في الكلام عن فرق بادت ، وراحت في داهية ، 

وأفكار اختفت وانقرضت ،

 ايشي معتزلة ، وايشي جهمية ، وايشي مرجئة ، بالله عليك اذا ماكانش دا لغو ، 

امال اللغو يكون ايه ،

 اليس اللغو هو الكلام الذي لاينبني عليه عمل ؟!

 مال الشباب دول بالمعتزلة والمرجئة ، والرافضة والقابضة ،

 ليه مصرين ننفخ الروح في جثث ماتت ، وعودتها لن تفيد ، بل ستضر ،

 أهو الشباب دول ما كانوش عارفين حاجة عن الفرق دى ،

 خلاهم حضرته هيطلعوا من عنده يغرقوا في الكتب القديمة ،

 ويسيبوا دراسة مقاصد الشريعة، أو النظر والتدبر في كتاب الله ،

 ويقعدوا يتجادلوا في اللغو ده ..

 لوكان درس لهم كتاب العقيدة ، للشيخ شلتوت ،

أو عقيدة المسلم ، أو خلق المسلم ، للشيخ الغزالي ،

 أو حتى رجال حول الرسول ، لخالد محمد خالد ،

 كان قدم لهم أعظم خدمة ..

أنا خايف ياحمادة تنتظر من الدعاة ، يدرسوا للشباب روايات احسان عبد القدوس ، و كلام نزار قباني ..

بس الله يخليك متقولش دعاة ، بل أدعياء ..  والله معظمهم ما حصل حتى رعاة ،

طيب ، اسيبك يا حمادة ، ضاعت ليلة مذاكرة في المناكفة معاك ،

عليا النعمة انت هتشردنا ، ربنا يهديك ، سلام عليكم .

والنبي يرضي ربنا اللي بتعمله في أمك ده ، الدين بيقول تغطس وتسيب أمك لايصة ، وتسيب مذاكرتك كده ؟!

خلاص ياماما ، هعوض الوقت واذاكر دلوقتي ، وبكره الجمعة ما تحمليش هم ،

انا مش هاكلم ، ماعدتش فيا قلب اتكلم ، اعمل ما بدا لك يا حمادة
وبعدين الناس اللي هيتغدوا بكره دول ، هنغديهم طوب ،

ان شاء الله من بدري رايح السوق وهعمل لك كل اللي انتي عايزاه ،

 خلاص وحدي الله انتي ونامي ، تصبحي على خير ،

أخواتك فضلوا مستنيين حضرتك لما ناموا على نفسهم، يالا ربنا يسامحك ، 

وانت من أهل الخير ،

تعالي أيها الكيمياء اللعينة ، لو بايدي لمحيتك من الوجود ،

 أنا عارف ايه اللي خلاني اتنيل ادخل علمي ، وانا كل ميولي ادبية ،

 كيمياء وفيزياء وزفت ، لولاش فصول الأدبي سمعتها طين ، والله كنت دخلت أدبي ،

 أهو كنت أنام على ضهري واقرا شعر وتاريخ .. يالا قدر الله وما شاء فعل ..

 استعنا بالله على بلاء الكيمياء ..

ايه ياسيدي ، انا قلت حمادة هيخلع ، وأتسوح أنا وآخد زمبة في الغدا ،

وانا أقدر يامولانا ، دا احنا بنستنى اليوم اللي تشرف وتبارك بيتنا فيه ،

هيه ، طمني عليك ،عامل ايه ، واخبار الست الوالدة واخواتك ،

الحمد لله

بتروح المحل برضك ،

يعني ، خفيف كده ، الحمد لله

بس شكلك مش حمادة ريحانة الحي والمسجد ، اللي أنا أعرفه ،

أبدا ، كنت في مشوار امبارح حرق دمي ،

لاحول ولاقوة الا بالله ، الله يحرق دم اللي يحرق دمك ، ايه العبارة ..

جماعة سنية ، من اللي بدقون دول سدوا نفسي ،

 وسودوا الدنيا في عيني ، على الصورة اللى هيتسببوا في تكوينها في أذهان الناس عن الدين ،

بس بس ، حياة ابوك ياشيخ ، خد من قلبي وصر منهم ، برررييه منهم  برررييه ،

بالك لو فضل الأزهر والأوقاف سايبنها كده ، ابقى تعال قابلني ، 

هتبقى صورة الدين قاتمة ،

وهتتطلع أجيال جاهلة وغبية ، وامخاخهم زي الصرم القديمة ،

والعالم كله هيتفرج على جرستنا ،

 واهو اديك شايف ، كل شوية رزية من شكل ، ايشي تكفير وهجرة ، وجهاد ،

 والسماوي ، والخزعبلاوي ، وامير الجماعة ..

 يا خيبة أملك يا زغبي يابن شلباية ،

 وأهي غطت ووطت والأخوان ، حبايبك اللي انت واقع في غرامهم ، وبتدور عليهم ،

 طالعين شدين حيلهم من المعتقل ، وخدوا العيال بتوع الجماعات الاسلامية تحت باطهم ،

بالمناحة اللي عملوها عن المعتقلات والتعذيب ، وكده شكلها حتحلو أوي يا شيخ حمادة ، وربك يستر ،

يا مؤمن دا انى مش عارف اكلم في الجامع ، معدتش حد بيسمعني ،

 الا عمك الحاج مليجي ، وشوية المكسحين اللي زيه ،

 والعيال الشبان بتوع اليومين دول بيعاملوني كأني خنفس ،

آه ماهو بتوع الدقون بيفهموهم ، ان أني علشان حالق دقني وأليط ، يعني كخه ،

 ليس لها من دون الله كاشفة ، أى والله ياحمادة يابني ،

سيبك من الغم ده على الريق على الصبح ، دا ني مش هفطر النهاردة ، استعدادا لبط ورقاق وملوخية أم حمادة ،

يا أرحم الراحمين ، بالك لو الكافر شم ريحة طبيخكم ، ادي دقني ان ما اسلم ،

 دا اني كل ما اكل عندكم ، اروح لمراتي اقولها ، لن تدخلي الجنة ، الا لما تطبخي زي ام حمادة !

يكاد حمادة يفطس من الضحك ، على خفة دم الشيخ زغبي ، التلقائية البريئة ،

امال .. تصدق ياحمادة ، انا مابصدق أشوفك ومابقاش عايز ابطل كلام معاك ،

 ربنا يعلم محبتك في قلبي ياابني ، ويجعل دعاي من نصيبك ،

المهم ، مش هتقولي ايه اخبار موضوع بابا ..

أبوك ؟! هو فيه أطيب وأجمل من الراجل ده ؟! أى والله ،
بقولها وهأتسأل عنها يوم الدين ،

واني اللي عرفت أبوك من أيام ماكنا بنشلح ونجري ورا عربية الرش ،

 حسين كان من يومه عاطفي وقلبه طيب ، ومالوش خرباش ، عينه وعافيته انه يلعب مع اصحابه ، وبس ،

 وكان لبق ولسن ، ونزيه ويحب الوجاهة ، وله روح فنان ، مايبطلش دندنة ،

 وأصابع فنان ، هو فيه خراط وبراد زيه ، الا المعلم جميل ، الله يرحمه ،

امال ايه سبب الي هو فيه ، يامولانا؟

جدك !

جدي ، ازاي ؟! مش ممكن جدي يكون سبب في أذية حد ، وخصوصا بابا ،

 دا حتى كان بيحبه ، ويصعب عليه ، وياما عيط علشانه قدامي كذا مرة !

.. وأنا أقول فيه سر بين بابا وجدي ، قلبي كان حاسس ان خزنة بابا ، في صدر جدي ،

دماغك ماتروحش لبعيد ياحمادة ، دي كانت ظروف زمن ، وثقافة سائدة ،

 مولانا فى عرضك ، أنا عايز أروح السوق ، وماما قايمة من النجمة
علشان الناس اللي جاية ،

ناس ، ناس مين اللي ناويين يزاحموني ،

هما هيزاحموك بعقل ، كفاية عمي منعم ، سبارتاكوس العزومات ،

 ماما قاعدة بتعمل له طريحة المحشي اللي تكفيه من امبارح ،

ياميلة بختك يا زغبي ياابن شلباية ، بقى يارب يوم ما تفرج بغداء، كالفتح المبين ، عند أم حمادة ،

 ألاقي الصاعقة بحالها محتلة المكان ،

 ومين كمان اللي جاي يا وش السعد ان شاء الله ، قول قول ماهي باظت ، عليه العوض ،

مفيش ، نينة وعمو ماهر ،

الحمد لله ، نينة ملهاش سنان ، وماهر ، عيان وغلبان ، كبيره شوية شوربه ،
ربنا يشفيه ، ويهد منعم المفتري ،

ماتخافش يامولانا ، عمو منعم  مزاجه المحشي ، وخصوصا ورق العنب ،
لكن انت ملك الظفر ،

أمال ، دا أنا ليا أمجاد ياحمادة يابني ، في النهش و التفسيخ ، هيييه ،

نرجع لمرجوعنا ، ومش هطول علشان تشوف مصلحتك ،

انت ياحبيبي، ماشفتش جدك المعلم جميل ده ، في أيام جبروته ، يا لطيف ،

كان يعدي بس من حارة مطحنة ، ماهو البيت القديم كان هناك ،

 بطوله الفارع ، وعينيه الصارمتين ، ووجهه العابس ،

أيام العز والورش العمرانة ، والشغل اللي على أصوله ،

أول أربع بطون جابتهم ستك أم حسين ، ورا بعض ، في أربع سنين ،
كانوا صبيان ، كلهم ماتوا ،

 لما جدك عرف سكة الكيف بسبب البلوة دي ، كانت هيتجنن علشان يجي له عزوة للورش والشغل ،

  يقوم أول واحد يشرف ويكتب له النجاة ، المسكين أبوك ، ووراه السبعة الباقيين ،

طلع أبوك زي أي عيل ، عايز يجري ويدلع ويلعب ، لقى الورشة قدامه ، وكرباج المعلم جميل على ضهره ،

 أبوك كان عايز يطير ، وجدك مسلسله في الورشة ،

اذا حاول  يزوغ ، يتكتف ويتجلد بالكرباج ، لما يبان له اصحاب ،

 ومين يجرؤ يحوشه من المعلم ،

بس أنا مش ممكن أصدق ، ان جدي يعمل كده ، دا كان أحن قلب في الدنيا ،

ياحبيبي ، دي ملهاش دعوة بالحنية ولا بالقسوة ،
قلت لك دي ثقافة سائدة ، في التعامل مع الأبناء ،

 ومازالت الى يومنا هذا ، وهتفضل في طبع المصريين ليوم الدين ، ،

على أساس ان الشدة ، بتربي العيل وتطلعه راجل ،

 وان البنت لما يتكسرلها ضلع ، يطلع لها أربعة وعشرين ،

ومش معنى ان الأب يضرب ابنه ، يعني بيكرهه ،
لا دا علشان خايف عليه ، وعايز مصلحته ،

علشان كده ، ثقافة الأب ، يابخت من بكاني وبكي عليا ، ولاضحكني وضحك الناس عليا ،

أما الأم ، فثقافتها ، أدعي على ابني ، واكره اللي يقول آمين ،

وبعدين ..

جدك ربنا هداه لما شارك في بناء الجامع ، وبعدها جوز أبوك ، وانت نورت ،
لكن الأوان كان فات ..

كان أبوك حرن ، وخد الموضوع على نفسيته ،

 وطول أمد القسوة والضرب ، علشان يتعلم يشيل المسئولية ،

كرهوه في جدك وفي الورشة ، وفي الشغل ، وفي أي شكل من أشكال المسئولية ،

وخصوصا ان الست والدتك ، قوية ، ومش عاطفية زيه ..

 فطبعا كانت عايزاه يكبر في السوق ويجيب لها بيت ، ويعيشكوا عيشة مرفهة ،

 ما كدبش أبوك خبر ، وساب لهم الجمل بما حمل ..

 قفل الورشة ، وراح اتوظف في الشركة الهندسية ،

 وأهو كل شهر ، يخصم مصروفه ، ويرمي للوالدة بقية المهية ،

وعزة جلال الله ، قلبي انفطر ، لما رحت له في بيت عماد مطحنة ، ماهو قاعد معاه ،

 حالته تصعب على الكافر ، أهوعماد مطحنة الفقري ده ، هو اللي جاب أبوك ورا ،

ماهو الموكوس دا راخر ، قفل محله اللي كان بيشغي زباين ،
علشان قعدة القهوة والطاولة ،

المهم ، أنا الحمد لله ، روقت أبوك آخر روقان ، وهاتشوف النهاردة ،
الفاتحة ان ربنا يهديه ، ويوسع عليه ،

ينصرف حمادة مسرعا ، ليحضر طلبات أمه ..

 يعود الي البيت ، فيجده وكأن فيه عرسا ، حتى صرير باب الشقة ، كأنه زغاريد ،

 أمه تعمل بألف يد ، تساعدها طنط عايدة ، وقد بدا وجهها كقرص الشمس ،

 من صهد الفرن ، وسخونة الأبخرة المتصاعدة ،

سهام ونادية ، و سلوى ، لفرش البياضات النظيفة المكوية ، والسجاجيد ، وتنسيق المفارش ،

 وتلميع المرايات والبراويز وكل شيئ ، حتى بدا البيت كعروس جلوها ، فردت في وجهها الدموية !

قضيت الصلاة ، لينطلق حمادة ، نحو أبيه ، ومعه أخيه حسن ، فيصافحه الأب بخجل ،

 ويجثوعلى ركبتيه ليحتضن حسن بقوة وتأثر ،

يسحبه حسن من يده .. ياللا بيناعلى البيت ، ماما عامللك أكل حلو ،
وبيتنا مليان ضيوف ،

 يتلفت الأب ، كعادته ، فين الشيخ زغبي ؟! شكله خرج من الجامع ،

 يشير اليهم الشيخ ، من الخارج محملا بأكياس الفاكهة ، يالا  يا حسين يا اخويا ،
أني بتغدى بدري ،

 فيضحك الجميع ،

هاهو البيت الذى كم طال عليه أمد الكآبة والرقاد ، يتنفس وينهض أخيرا ،

 لتفرح السلالم بدبيب الأحبة ، وترتاح الكراسي لدفء الجالسين ،
وتلين السجاجيد لخطو العائدين ،

حتى طقم الصيني وأدوات السفرة ، انتعشت ولمعت ، بالعودة الي العمل ،
بعد طول مكث بدولاب الفضية ،

 يسبق حمادة ..

 طريق ياجماعة ، الشيخ طالع مع بابا ،

 ليدلف الأب من الباب مطرقا ، يهرب من مواجهة أم حمادة ، متشاغلا باحتضان وتقبيل سهام ونادية ،

 متخذا من نحنحات وبسملات الشيخ زغبي ، وسعال الأعمام ، وبكاء الجدة ،

ساترا ليدلف الى غرفة الطعام مباشرة ،

يتالق الشيخ زغبي ، منتشيا لحلاوة الطعام ، فيضفي على البيت بهجة وعلى القلوب سماحة ،

 ويعزف بصوته العذب وضحكاته المجلجلة ، موسيقى الحب والوئام ، فتغمر الفرحة الجميع ،

حتى الصواني التى نشطت ذهابا وايابا ، تحمل الفاكهة ، والشاي والقهوة ..

 ليعود الدبيب و الضجيج الى السلالم  .. شرفتو وآنستو ، خطوة عزيزة ..  أم حمادة ، وقد تهلل وجهها بالبشر ،

 يعز مقدارك .. تسلم ايدك ياست الكل ، دايما عامر .. ضيوفها ، وقد اختلطت أصواتهم ،

 ليودع الأب الجميع على بوابة العمارة ،

 يقابله حمادة وسهام ونادية وحسن ،

رايحين على فين يا حمادة ، هو أنا لحقت أتلم عليكم ؟!

رايحين نسهر عند عمي أحمد ، هنشوف مدرسة المشاغبين

طب خد بالك من أخواتك ، و أوعو تتأخروا ، مع السلامة ..